Sjómannablaðið Víkingur - 01.04.2008, Blaðsíða 44

44 - Sjóm­annablaðið Víkingur­
Gámaskipið Mette Mærsk siglir undir traustri stjórn íslensks skipstjóra út
úr skipasmíðastöðinni í Óðinsvéum.
Nýtt skip
Það er ekki oft sem ég fjalla um afhendingar á nýsmíðuðum
skipum á þessum síðum. Hér kemur þó frásögn af einni slíkri.
Það þykir nú vart til mikilla tíðinda að hið stóra skipafélag A.P.
Möller í Danmörku fái afhent nýsmíðað skip því slíkt er að ger-
ast svo til í hverjum mánuði allt árið um kring. Mér þótti þó
við hæfi að segja ykkur lesendum frá því að í byrjun október
s.l. fékk skipafélagið afhent 7000 TEU gámaskip frá Lindö
skipasmíðastöðinni í Danmörku. Skipið sem er af gerðinni L
214, var skírt af frú Yumiko Arakawa sem er eiginkona stjórn-
arformanns Bridgestone samsteypunnar, og fékk það nafnið
Mette Mærsk. Það er þó öllu merkilegra að skipstjóri þessa nýja
skips er íslenskur. Hann heitir Davíð Guðmundsson og hefur
starfað á dönskum skipum allt frá því hann lauk farmannaprófi
frá Stýrimannaskólanum í Reykjavík árið 1977. Í þætti á DR1
sjónvarpsrásinni í Danmörku var svo viðtal við þennan stolta
Íslending þar sem hann sagði fréttamanni frá nýja skipinu sem
flokkast undir svokallað „grænt skip.“ Óskum við Davíð til
hamingju með skipið.
Davíð Guðmundsson skipstjóri lengst til vinstri ásamt útgerðarmanninum
Eivind Koldin, guðmóður skipsins Yumiko Arakawa, forstjóra skipasmíða­
stöðvarinnar Finn Buus Nielsen og yfirvélstjóranum Harald Aastrup eftir
nafngjöfina.
Eins manns brú
Góð vísa er víst aldrei of oft kveðin. Það virðist iðulega sem
skipstjórnarmenn gleymi því að samkvæmt alþjóðasiglinga-
reglum á ekki að vera einn maður á stjórnpalli á siglingu skips
og allra síst að nóttu til. Nýlega dæmdi dómstóll í Southampton
íslenska útgerð í sekt fyrir að hafa brotið siglingareglur, ISM
öryggisstjórnunarkerfi og reglur um farmflutninga. Um var að
ræða strandflutningaskipið Sunnu sem var í eigu NES skipa-
félagsins í Hafnarfirði en skipið strandaði kl 04:40 að morgni
10. janúar 2007 á vesturströnd Swona á Orkneyjum. Sunna
var lestuð 1900 tonnum af járngrýti frá Grundartanga og varð
skipið fyrir umtalsverðum skemmdum við strandið. Náðist það
á flot á háflóði daginn eftir með aðstoð dráttarbáts og björg-
unarskips en Sunna var síðan dregin til hafnar í Lyness. Við
rannsókn á málinu kom í ljós að stýrimaður var einn í brúnni
við strandið en um borð voru aðeins sjö skipverjar. Skipstjórinn
hafði gefið þau fyrirmæli að hásetar gengju ekki vaktir í brú
heldur ynnu aðeins í dagvinnu á siglingu skipsins. Þremur
mánuðum áður hafði skipstjórinn verið aðvaraður eftir hafn-
arríkisskoðun (Port State Control) að samkvæmt STCW sam-
þykktinni væri þess krafist að útvörður væri á stjórnpalli ásamt
stýrimanni meðan skuggsýnt væri eða myrkur. Skipstjórinn var
ákærður og sakfelldur fyrir dómstóli í Kirkwall og hlaut sekt
upp á 2500 pund fyrir að hafa ekki mann á vakt með stýri-
manni.
Réttarkerfið lét þó ekki þar við sitja og í september s.l. var
útgerðin dæmd til að greiða 10.500 pund auk 5.987 punda til
viðbótar fyrir þessi þrjú brot.
Því er við að bæta að útgerðin lýsti yfir sekt sinni fyrir dóm-
stólnum. Jæja, félagar, nú er að hafa í huga að ef þið ætlið að
spara gjaldeyrir og virða lög þá hafið háseta með ykkur á vakt
að næturlagi.
Kreppan skellur á
Það er skammt stórra högga á milli en í síðasta blaði sagði ég
frá metnaðarfullum áformum Evergreen skipafélagsins um upp-
byggingu skipaflota síns. Nú hafa þeir tilkynnt að hætt sé við
áform um smíði skipagerðar sem átti að geta flutt 12.400 TEU.
Fleiri fregnir af samdrætti í þessum geira flæða yfir nánast á
hverjum degi. Stöðugt fleiri útgerðir hætta við nýsmíðar enda
fjármagn ekki eins aðgengilegt og áður var. Gríðarlegt áfall varð
fyrir starfsmenn rúmenskrar skipasmíðastöðvar í eigu Daewoo
samsteypunnar þegar smíði 8 4.250 TEU gámasysturskipa var
slegin út af borðinu.
!!! Nýjustu fréttir !!!
Þær gleðilegu fréttir bárust rétt áður en Víkingur fór í prent-
un að Kristo Laptalo hefði verið sýknaður af áfrýjunardómstól í
Grikklandi þann 27. nóvember s.l. og losnaði hann samdægurs
úr 17 mánaða fangelsisvist. Það tók fimm manna dómstólinn
ekki nema tuttugu mínútur að komast að þessari niðurstöðu en
þá höfðu vitnaleiðslur staðið aðeins yfir í dagpart. Meðal þeirra
sem báru vitni var aðalritari IFSMA, Rodger MacDonald, sem
sagði algjörlega útilokað að skipstjóri gæti vitað hvað væri falið
í farmi skips hans. Fagna því öll hagsmunasamtök skipstjóra
um heim allan, sem og allir skipstjórar, þessari niðurstöðu.
Erfiðleikar skipstjóra
Í framhaldi af máli Kristo Laptalo er rétt að láta þess getið
hér að um þessar mundir munu, samkvæmt upplýsingum frá
IFSMA, rúmlega 30 skipstjórar vera í fangelsum vítt og breytt
um heiminn vegna starfa sinna. Af þessu hafa samtök skip-
stjórnarmanna vaxandi áhyggjur þar sem ekki lengur þarf að
finna hinn eina sanna sökudólg heldur er skipstjórinn sá sem
lögreglan tekur fastan til að tryggja örugga réttarmeðferð og
skaðabætur. En orð varaformanns sjómannafélaga Króatíu,
sem hann viðhafði að dóminum í Grikklandi gengnum, læt ég
fylgja hér með sem aðvörun til íslenskra skipstjórnarmanna:
„Herramenn, farið varlega í að fara til Grikklands þar sem þið
getið átt á hættu að fá 10 til lífstíðar fangelsi hvort heldur sem
þið eruð sekir eða saklausir!“
Hilmar Snorrason skipstjóri
Utan úr heimi