Ritið : tímarit Hugvísindastofnunar - 01.01.2022, Blaðsíða 160
HAMFARIR SAMFéLAGSSJóNLEIKSINS
159
landlæknisins. Það má því segja að endurminningar landlæknisins einkennist
af endalausri leit og viðleitni til að bæta fyrir það sem gerðist í fortíðinni,
þótt hann finni aldrei neinar lausnir á vandamálum sínum og elskendurnir
séu að eilífu aðskildir.
Í Seltu er 19. öldin sviðsett sem póst-apókalyptískt sögusvið eftir eldgos.
Kannski er það ekki jafn nýstárlegt og það kann að virðast. Mætti ekki segja
að Jónas Hallgrímsson leggi ákveðnar línur í kvæðinu „Íslandi“ í fyrsta hefti
Fjölnis 1835: „Hvar er þín fornaldar frægð, frelsið og manndáðin best?“ Eða
þegar hann bætir þessum línum við síðar í kvæðinu:
En á eldhrauni upp, þar sem enn þá Öxará rennur
ofan í Almannagjá, alþing er horfið á braut.
Nú er hún Snorrabúð stekkur og lyngið á lögbergi helga
blánar af berjum hvurt ár, börnum og hröfnum að leik.83
Að sviðsetja 19. öld líkt og hún komi á eftir heimsslitum rímar þegar allt
kemur til alls ágætlega við sögusýn þjóðernishyggjunnar um niðurlægingar-
skeiðið sem ríkti frá lokum sögualdar þar til sjálfstæðisbaráttan hófst. Að
sama skapi hefur annar áratugur 21. aldar orðið að öðru niðurlægingarskeiði
í hinni þjóðernissinnuðu sögusýn, eins og sést á því að sumir hafa farið að
tala um hið svokallaða Hrun.84 Ef Móðuharðindin í Gestakomum í Sauðlauks-
dal spegla þjóðfélagslegan veruleika ritunartímans má á svipuðum nótum
halda því fram að hugtakið „eftireldaöld“ spegli annan áratug 21. aldar í
heild, sem þá mætti kalla eftirhrunsáratuginn.
Lokaorð
Snúum okkur nú aftur að upphafsspurningu umfjöllunarinnar: Hvers vegna
komu út svona margar skáldsögur um náttúruhamfarir á öðrum áratug 21.
aldar? Hér hefur hin háa tíðni verið tengd úrvinnslunni á þeim sögulegu
atburðum sem kenndir eru við Góðærið, Hrunið og eftirmál þess. Að þessu
leyti líkist blómatími íslenskra náttúruhamfaraskáldsagna gullöld banda-
rískra stórslysakvikmynda á áttunda áratugnum, sem iðulega hefur verið
tengd þjóðfélagsumbrotum á tímum Víetnamstríðsins. Þótt engin af þeim
skáldsögum sem hér hafa verið greindar fjalli beint um Hrunið þá verður
83 Jónas Hallgrímsson, Ritverk I, Reykjavík: Svart á hvítu, 1989, bls. 63.
84 Varðandi bælingu niðurlægingarskeiðsins í Íslandssögunni bendi ég á grein Högna
óskarssonar, „Freud í hvunndeginum: bæling, maður og samfélag“, Ritið 2/2003,
bls. 9–23.