Bændablaðið - 25.05.2023, Síða 10

10 Bændablaðið | Fimmtudagur 25. maí 2023
FRÉTTIR
Hjónin Gunnar Þorgeirsson og
Sigurdís Edda Jóhannesdóttir
hafa sett garðyrkjustöð sína
Ártanga á sölu.
Ártangi er staðsettur í Grímsnes-
og Grafningshreppi og þar eru nú
framleidd kryddjurtir, blóm og
pottaplöntur. Stöðina hafa hjónin
byggt upp frá grunni og rekið í
tæplega fjörutíu ár. „Við byrjuðum
árið 1986 með því að reisa fyrsta
gróðurhúsið, sem var þá 200
fermetrar, en í dag er ræktað í um
4.800 fermetrum,“ segir Gunnar,
en auk ræktunarhúsanna er þar
vinnusalur, kælar, pökkunarhús,
geymsluhús, skrifstofa og rými til
að taka á móti gestum og á sumrin
er opið hús alla daga vikunnar.
Erfitt að selja ævistarfið
Framleiðslan skiptist í þrennt;
kryddjurtir sem ræktaðar eru allan
ársins hring, túlipana sem eru
árstíðabundnir og svo garðplöntur og
annað. Edda sér um daglegan rekstur
en um átta manns starfa auk hennar
á stöðinni. Hún segir mikla vinnu
fylgja rekstrinum. „Þetta er vinna
365 daga á ári og ég er eiginlega bara
búin að fá nóg af því að vera með
þetta á herðunum, ekki illa meint,“
segir Edda, en þar sem Gunnar sinnir
formennsku í Bændasamtökunum
hefur hann haft minni tíma í bústörf.
„Hann er viðhaldið, dyttar að þegar
hann getur,“ spaugar hún.
Þau eru sammála um að
skynsamlegra sé að láta staðar numið
fyrr en síðar. „Maður er orðinn
heldur linur í að skipta um rúður
og ekki yngist maður með árunum.
Við veltum fyrir okkur hversu langlíf
við eigum að vera í þessum bransa.
Garðyrkjustöðin er í toppstandi og
góðum rekstri. En það er ekki einfalt
að selja ævistarfið,“ segir Gunnar.
Veit ekki hvað gamalt fólk gerir
Samkvæmt lýsingu fasteignasölunnar
Árborga á Selfossi, sem hefur
milligöngu um sölu Ártanga, segir
að garðyrkjustöðin sé vel tækjum
búin og í góðum rekstri. Borhola
fyrir heitt vatn sé á landinu en 17,5
hektarar fylgja eigninni sem býður
upp á stækkunarmöguleika. Þá er þar
einnig reisulegt íbúðarhús á tveimur
hæðum á stórri lóð.
Sjálf hafa hjónin ekki ákveðið
hvað bíður þeirra verði að góðri sölu
á Ártanga. „Ég veit ekki hvað gamalt
fólk gerir, ég þarf kannski að fara
að kynna mér það,“ segir Gunnar
sposkur, en Edda segist gjarnan vilja
fara í minna starfshlutfall.
/ghp
Tímamót:
Ártangi til sölu
Ártangi stendur á fallegum stað í Grímsnes- og Grafningshreppi. Landið sem fylgir stöðinni er um 17,5 hektarar.
Mynd / Fasteignasalan Árborgir
Garðyrkjubændurnir Sigurdís Edda Jóhannesdóttir og Gunnar Þorgeirsson
byggðu stöðina frá grunni og hafa rekið í tæplega fjörutíu ár. Mynd / ghp
www.tannland.is
ÓDÝRARI
TANNVIÐGERÐIR
Í B U D A P E S T
tannland@tannland.is
-Þjónusta í gegnum allt ferlið
-Nútímaleg stofa í hjarta Budapest
-Bestu gæði og tækni
-Sótt og skutlað á flugvöll
-Enginn aukakostnaður
Matvælastofnun hefur náð
samkomulagi við sauðfjárbændur
á nokkrum bæjum í Miðfjarðar-
hólfi um að afhending gripa til
slátrunar verði eftir sauðburð.
Um aðgerðir stofnunarinnar
er að ræða í kjölfar smitrakninga
vegna riðutilfella sem staðfest voru
á Bergsstöðum og Syðri-Urriðaá.
Áður hefur komið fram að einhverjir
bændur væru tregir til að láta gripi
sína í hendur stofnunarinnar, meðal
annars vegna þess að sauðburður
væri yfirstandandi.
„Við sendum svör á alla bændur
sem höfðu andmælt. Þar föllumst við
á andmæli vegna frests til aðgerða,
gegn því að ýtrustu smitvarna sé gætt
í millitíðinni. Síðasti afhendingar-
dagur verður því 19. júní samkvæmt
samkomulaginu. Mér sýnist að allir
nema einn hafi samþykkt þetta,“
segir Daníel.
Um 35 gripir
Daníel segir að gripirnir sem um
ræðir séu um 35, mest hrútar, en
reyndar sé einn bændanna tíu sem
um ræðir ekki með sitt skýrsluhald í
Fjárvís þannig að nákvæm tala liggi
ekki fyrir. „Eftir sauðburð búumst
við að þetta verði um 50 gripir með
lömbum,“ segir hann.
Í kjölfar riðutilfellisins á Bergs-
stöðum, þar sem tæplega 700 fjár
var fargað, fór Matvælastofnun í
smitrakningu á gripum sem höfðu
verið seldir þaðan og fannst smit í
einni gimbur sem rakin var á Syðri-
Urriðaá og hafði komið þangað
árið 2020.
Ekkert smit í 70 gripum
Að sögn Daníels hafa um 70 sýni
úr gripum frá Syðri-Urriðaá verið
greind eftir að rannsóknastofan
á Keldum tók aftur til starfa eftir
eldsvoða þar, en einungis þetta eina
sýni hefur reynst jákvætt. „Það er
afar líklegt að gimbrin hafi á þessum
tíma náð að smita út frá sér en það
virðist vera sem svo að smitið hafi
ekki náð fótfestu í hjörðinni að
Syðri-Urriðaá. Því lá mér mikið á
að kalla inn þessa gripi alla áður en
þeir næðu að smita út frá sér.“
Daníel segir að greining á sýnum
frá Syðri-Urriðaá sé aftur komin á
fullt á Keldum. Hann vonast til
að góð mynd af stöðunni á Syðri-
Urriðaá gæti orðið ljós á næstu
dögum. /smh
Smitrakning riðutilfella:
Afhending eftir sauðburð
Landsmót til Reykjavíkur
Landsmót hestamanna árið 2024
verður haldið á félagssvæði Fáks
í Víðidal í Reykjavík.
Stjórn Landssamtaka hestamanna-
félaga (LH) og Landsmóts ehf.
samþykktu beiðni hestamanna-
félagsins Spretts í Kópavogi,
sem óskuðu eftir heimild til að
halda mótið í samstarfi við Fák á
mótssvæðinu í Reykjavík. Í frétt
LH segir að mótsvæðið í Víðidal
hafi sannað sig og vonast sé til
Landsmótið verði haldið af miklum
glæsibrag í samstarfi tveggja stærstu
hestamannafélaga landsins.
Hestamannafélagið Sprettur
hafði hug á að halda mótið á
félagssvæði sínu í Garðabæ og
Kópavogi. Landsmót hefur verið
haldið þrisvar í Reykjavík, árin
2000, 2012 og 2018.
Landsmótið 2024 verður haldið
dagana 1.–7. júlí að því er fram
kemur á vefsíðu mótsins. /ghp
Erfðamengisúrval:
Arfgreining nautgripa gengur vel
Búið er að lesa næstum 20 þúsund
niðurstöður arfgreininga í gagna-
grunn nautgriparæktarinnar.
Af þeim eru rúm fimm þúsund
úr gripum fæddum 2022 og rúm
1.600 úr gripum fæddum í ár.
Markmið verkefnisins miðar að því
að arfgreina allar íslenskar kýr. Enn
hafa nokkur bú ekki pantað DNA-
merki og hafið þátttöku. Þær kvígur,
sem eru fæddar á árunum 22-23, og
hafa verið arfgreindar koma frá 365
búum. Í heildina eru tæp 500 kúabú
á öllu landinu. Frá þessu er greint í
frétt á heimasíðu Ráðgjafarmiðstöðvar
landbúnaðarins (RML).
Arfgreiningar eru til úr helmingi
þeirra rúmu 10 þúsund kvígna sem
voru ásettar til lífs hjá íslenskum
mjólkurframleiðendum á síðasta ári.
Á þessu ári er búið að skrá rúmlega
fjögur þúsund kvígur til lífs á búum
með mjólkurframleiðslu og er búið að
arfgreina tæp 40 prósent þerra.
Minna en eitt prósent sýna er með
of lágt greiningarhlutfall erfðavísa.
Ekki er hægt að nota sýni með
lægra en 0,9 í greiningarhlutfalli
erfðavísa til staðfestingar ætternis eða
við erfðamat.
Hraðari erfðaframfarir
Erfðamengisúrvalið hefur skilað því
að hægt er að nota yngri kynbótanaut á
sæðisstöð. Áður þurfti að framkvæma
afkvæmaprófun og voru nautin að
jafnaði 70 mánaða þegar þau fóru í
notkun. Nú eru komin naut sem eru
allt niður í 21 mánaða gömul, þó
meðaltalið sé rúmlega þrjú ár, eða 39,7
mánuðir. Erfðamengisúrvalið hefur
nú þegar skilað þeim ávinningi að nú
eru í notkun naut sem eru allt niður
í 21 mánaðar gömul. Meðalaldurinn
er kominn niður í 39,7 mánaða
þegar nautin eru tekin í notkun, það
er rúmlega þriggja ára. Það er mikil
breyting frá því sem var, en nautin
voru jafnan nálægt 70 mánaða þegar
þau komu til notkunar að lokinni
afkvæmaprófun. Þetta skiptir máli,
því með þessu verða erfðaframfarir
íslenska kúastofnsins hraðari. /ÁL