Goðasteinn - 01.09.2005, Qupperneq 19

Goðasteinn 2005
Föstudagsmorgunninn rann upp og til stóð að fara í skoðunarferð um borgina.
Meðlimir Freyju tóku daginn snemma í morgunmat, sól skein í heiði og dagurinn
lofaði góðu. Því næst stigum við upp í rútu og við tók ökuferð um gamla og nýja
hluta borgarinnar. Þar fengum við að sjá marga merka staði, t.d. vettvang skáld-
sagnapersóna eins og Sherlock Holmes og dr. Watsons og dr. Jekyll og mr. Hyde.
Eins var okkur bent á fallegar og merkar byggingar og minnismerki. Við fengum
að sjá húsið þar sem þjóðsöngurinn okkar var saminn og einnig vorum við frædd-
ar á fyrirkomulagi nokkurra safnhúsa í borginni. Þar eru eldri borgarar fengnir til
að sjá um söfnin, vera þar til staðar og fræða gesti og gangandi um söguna. Þykir
eldri borgurum heiður að þessu hlutverki og gegna því með miklum sóma.
Því næst fórum við í elsta borgarhlutann og skoðuðum Edinborgarkastala sem
var heimili og virki Skotakonunga allt þar til Skotland og England sameinuðust
og konungsfjölskyldan flutti aðsetur sitt til Lundúna í byrjun 17. aldar. Kastalinn
stendur á kletti uppi á einni af hæðum borgarinnar og gerði sú lega hann illvinn-
anlegan. Dreifðist síðan byggðin út frá honum, en frá kastalanum er mikið útsýni
yfir borgina. Við innganginn fór Kjartan fararstjóri yfir helstu atriði úr sögu
kastalans og því næst var okkur sleppt lausum og notuðum við tímann vel við að
skoða í hvem krók og kima. Ekki var laust við að maður fylltist lotningu við að
ganga steinlagða stígana milli hlaðinna virkisveggja. Auðvelt var að gera sér í
hugarlund hestvagna hlaðna vörum á ferð um götuna og varðmenn á gangi fram
og til baka meðfram virkisveggjunum að fylgjast með að allt væri með felldu.
Eins var hátíðlegt að koma inn í st. Margaret,s Chapel sem er mjög lítil kapella
miðsvæðis í kastalanum. Þar þykir afskaplega fínt að gifta sig nú til dags og
-17-