Goðasteinn - 01.09.2005, Side 27

Goðasteinn 2005
Notaði fararstjóri tækifærið og hressti upp á mannskapinn með hinum sígildu
Skotabröndurum sem féllu í góðan jarðveg því það er nefnilega alltaf jafn vinsælt
að skemmta sér á annarra manna kostnað. Síðan var stansað í ullarmarkaðnum í
Perth og tækifærið notað til að ná í skotapils og annan fatnað úr vandaðri ull á
fjölskylduna sem heima beið. Að því búnu var haldið heim á hótel þar sem
hópurinn sameinaðist aftur við kvöldverð. Þar má segja að ánægjan yfir endur-
fundunum hafi verið óneitanlega meiri en ánægjan yfir málsverðinum. Var haft á
orði að lfldegast væri það kokkinum fyrir bestu að snúa sér að einhverju öðru en
matargerð ... og vitið þið hvað? Litlu síðar stormaði kokkurinn út úr eldhúsinu,
kastaði svuntunni og settist inn á hótelkrána með gítar í hönd og spilaði og söng
fram eftir kvöldi og tókst ljómandi vel upp. Tíndumst við svo ein af annarri upp á
herbergi, lúnar eftir langan og góðan dag, pökkuðum niður og undirbjuggum
heimferðina morguninn eftir.
Jæja, þá var komið að því, heim skyldi halda. Drifum við okkur allar tímanlega
í morgunmat og farið var að bera töskurnar út í rútu. Komumst við að þeirri
niðurstöðu að farangursgeymslurnar hefðu nú heldur skroppið saman yfir helgina.
En allt tókst þetta með góðri skipulagningu og keyrt var yfir til Glasgow en þaðan
var flogið heim. Nokkur spenningur var við innritunina hvernig færi með yfirvigt
og önnur tæknileg vandamál. En hagsýnar húsmæður höfðu náttúrulega vit á því
að deila töskum á milli þannig að allt gengi upp. Farið var í loftið kl. 11:15 að
staðartíma frá Glasgow og lent var í Keflavík kl. 12:25 að íslenskum tíma. Þegar
við höfðum aftur heimt fósturjörðina undir fætur okkar og aðeins bætt við okkur
farangri úr fríhöfninni tók Helgi skólabílstjóri á móti okkur og sá um að flytja
okkur síðasta spölinn.
Við ferðalok er ánægjulegt að líta til baka og gleðjast saman yfir myndum og
minningum eftir velheppnaða ferð. Þrátt fyrir að ákvörðun hafi verið tekin um að
halda upp á afmæli kvenfélagsins með þessum nýstárlega hætti, kom það þægi-
lega á óvart hve mikil þátttaka var í ferðinni og aldursbil milli fararkvenna þurrk-
aðist út. Blandaðist hópurinn mjög vel og segja má að upphaflegur tilgangur
kvenfélagsins hafi náð fram að ganga sem er að styrkja samhug og samstöðu
meðal kvenna. í beinu áframhaldi leiðir maður þá hugann að því hvort upphafleg
markmið með starfsemi kvenfélaganna séu enn þann dag í dag raunverulega í
gildi, 70 árum eftir stofnun þeirra. Við þurfum bara að „uppfæra þau“ og laga að
okkar aðstæðum.
-25-