Goðasteinn - 01.09.2005, Page 64

Goðasteinn 2005
Ólöf Kristófersdóttir Hvolsvelli:
Aðfararorð
Nú á tímum er oft talað um ferðaþjónustu sem efnilegasta vaxtarbroddinn í
atvinnulífi íslenskra sveita. Margt hefur breyst, hefðbundinn búskapur er á undan-
haldi og tæknin hefur haldið glæsilega innreið sína í atvinnulíf sveitanna.
Ferðalög hafa tíðkast hér á landi frá alda öðli, enda komu landnámsmennirnir
sumir víða við. Mér finnst að lesendur Goðasteins þurfi að fræðast um þann gisti-
og veitingastað í héraðinu sem var einstakur í sinni röð á fyrri hluta 20. aldar, það
er hótelið í Múlakoti í Fljótshlíð. Einnig um það eljusama og bjartsýna fólk sem
þar bjó. Svo heppilega vill til að Sigríður Hjartar, húsfreyja í Múlakoti, samdi
lokaritgerð í sagnfræðideild Háskólans um „Mannlíf í Múlakoti". Ég fór þess á
leit við Sigríði að hún leyfði okkur að birta hluta úr ritgerðinni sem fjallar um
hótelreksturinn. Sigríður brást við beiðni minni af vinsemd og röskleika og birtist
hér á eftir þessi úrdráttur. Þess ber að geta að margt fleira fléttast inn í sögu
Múlakots svo sem garðrækt Guðbjargar og þáttur Ólafs Túbals og annarra málara.
Verður þeim þáttum vonandi gerð skil síðar í ritinu.
Sjöfn Ámadóttir hefur verið svo vinsamleg að rifja upp minningar frá sumr-
unum 1954 og 1955 þegar hún var starfsstúlka á hótelinu. Vona ég að þær endur-
minningar verði til þess að fleiri starfsstúlkur eða aðrir heimilisvinir rifji upp og
segi frá kynnum sínum af staðnum. Það væri mjög vel þegið fyrir Goðastein.
Margrét Björgvinsdóttir fyrrum ritstjóri Goðasteins hefur tekið saman mjög
fróðlegan pistil um sýningar og málaraferil Ólafs Túbals sem sýnir hve afkasta-
mikill Ólafur hefur verið í listinni, þrátt fyrir hótelrekstur heimafyrir.
Þessum þremur konum kann ég bestu þakkir fyrir hjálpina við að kynna þenn-
an þátt í menningu héraðsins fyrir lesendum Goðasteins.
Ritað í góubyrjun 2005
Olöf Kristófersdóttir
-62-