Árbók Landsbókasafns Íslands - Nýr flokkur - 01.01.1979, Side 25

FISKE-SAFNIÐ í ÍÞÖKU
25
hinar íslenzku bókmenntasögur sínar á ensku mestmegnis á bókakosti
Fiske-safnsins.
Safnið hefur notið ýmiss konar stuðnings utan Cornell-háskólans.
Má fyrst geta árlegs styrks til bókakaupa á Islandi, sem Mennta-
málaráðuneytið hefur veitt því síðan 1958. Var til styrksins stofnað í
tilefni áttræðisafmælis Halldórs heitins. Þá var mikils virði sá stuðn-
ingur, sem safnið naut frá meðlimum Bókaútgefendafélags Islands
(áður Bóksalafélags Islands), sem veittu því um margra ára bil, meðan
aðstæður voru aðrar en nú, 50% afslátt af bókaverði. Hér má enn nefna
sjóð til bókakaupa, sem stofnaður var 1964 af manni að nafni Peter B.
Dirlam, frá Southbridge í Massachusettsríki, sem útskrifaðist frá há-
skólanum 1956. Áhugi þessa manns á Islandi og Fiske-safninu hafði
kviknað, er hann sótti námskeið í íslenzkum formbókmenntum („Edda
og saga“), sem fyrirrennari minn Jóhann S. Hannesson hélt á sínum
tíma.
Pá má að lokum geta mjög rausnarlegs styrks, sem safninu var
nýlega veittur til þriggja ára af Menningarsjóði Bandaríkjanna (Nat-
ional Endowment for the Humanities) til þess að endurskrásetja og
flokka bækur safnsins og færa alla spjaldskrá inn á tölvubanka, sem
staðsettur er í Ohio-ríki. Við það verður bókakostur safnsins miklu
aðgengilegri fræðimönnum um gervöll Bandaríkin og jafnvel víðar. En
safnið sjálft hefur upp úr fyrirtæki þessu fyrstu heildarspjaldskrá yfir
bækur þess, síðan fyrsta bindi hinnar prentuðu bókaskrár safnsins var
gefið út 1914. Umsóknin um styrkinn var reist á þeirri forsendu, að
safnið mætti telja einn af þjóðardýrgripum Bandaríkjamanna. Felur
styrkveitingin því í sér mikla viðurkenningu á ágæti safnsins, enda er
safnið vel þekkt, hvar sem íslenzk og norræn fræði eru stunduð um víða
veröld.