Morgunblaðið - 18.05.2002, Blaðsíða 16
SUÐURNES
16 LAUGARDAGUR 18. MAÍ 2002 MORGUNBLAÐIÐ
MARGIR íbúar við Ásabraut í
Grindavík eru óánægðir með veg-
tengingu úr nýju íbúðahverfi,
Lautarhverfi, sem er fyrirhugað
sunnan brautarinnar í nýlegu deili-
skipulagi sem hefur verið í kynn-
ingu. Kærufrestur vegna bæði að-
al- og deiliskipulags rann út á
miðvikudag þar sem tvær athuga-
semdir bárust við deiliskipulag
hverfisins, annars vegar frá einum
einstaklingi sem gerði m.a. athuga-
semd við umrædda vegtengingu og
hins vegar frá 34 íbúum við Ása-
braut sem skiluðu inn mótmælum
á undirskriftalista vegna vegteng-
ingarinnar. Þá bárust fimm at-
hugasemdir vegna aðalskipulags-
ins, sem gilda á fyrir
lögsagnarumdæmi Grindavíkur-
kaupstaðar til ársins 2020.
Verið að skapa þrengsli
og óþarfa slysahættu
Halldór Þorláksson, skipstjóri
og íbúi við Ásabraut, afhenti undir-
skriftalistann fyrir hönd nágranna
sinna. Í samtali við Morgunblaðið
sagði hann að umferðaröryggi væri
ógnað með því að tengja útkeyrslu
úr hverfinu á þessum stað inn á
Ásabrautina, þarna færu börn um
á leið í skóla og verið væri að
skapa óþarfa slysahættu. Þá kæmi
vegtengingin nánast beint á móti
innkeyrslunni hjá sér sem hann
taldi skapa mikil þrengsli. Halldór
taldi að skipuleggja hefði mátt
hverfið með öðrum hætti þannig að
útafaksturinn væri á öðrum stað.
Fer fyrir
skipulagsnefnd
Einar Njálsson bæjarstjóri sagði
við Morgunblaðið að skipulags- og
byggingarnefnd bæjarins kæmi til
með að skoða innkomnar athuga-
semdir við aðal- og deiliskipulagið.
Um mótmæli íbúanna við Ásabraut
vildi hann ekki tjá sig sérstaklega
á þessu stigi málsins. Einar benti
þó á að aðalvegtenging inn í Laut-
arhverfið væri um Dalbraut, og sér
vitanlega hefðu engar athuga-
semdir borist við það. Tengingin
inn á Ásabraut hefði verið hugsuð
til að hafa fleiri möguleika á leið-
um inn og út úr hverfinu. Einar
sagði að reiknað hefði verið með að
hefja gatnaframkvæmdir í hverf-
inu síðar í sumar en mikill skortur
væri á nýjum byggingarlóðum í
bænum. Í Lautarhverfi er gert ráð
fyrir 44 íbúðum sem gætu hýst á
annað hundrað manns. Varðandi
aðalskipulagið sagði Einar að at-
hugasemdir vegna þess gætu ekki
talist alvarlegs eðlis.
Deiliskipulag nýs íbúðahverfis í Grindavík
Mótmæli frá 34
íbúum við Ásabraut
Grindavík
SAMEIGINLEGUR fundur með
framboðunum þremur í Reykja-
nesbæ fór fram í félagsheimilinu
Stapa á fimmtudagskvöldið. Var
fundurinn vel sóttur en umræður
þóttu ekki mjög líflegar ef marka má
frásagnir viðstaddra.
Eftir ræður tveggja frambjóðenda
frá hverjum flokki, Sjálfstæðisflokki,
Framsóknarflokki og Samfylkingu,
sátu fyrir svörum fundargesta efstu
menn listanna, þeir Árni Sigfússon
(D), Kjartan Már Kjartansson (B) og
Jóhann Geirdal (S). Meðal þess sem
þeir voru spurðir um var afstaða til
nýjustu tíðinda af fyrirhugaðri stál-
pípuverksmiðju í Helguvík, sem þeir
fögnuðu og voru sammála um að
verksmiðjan væri góður kostur fyrir
Reykjanesbæ. Málefni Reykjanes-
hallar komu einnig til tals sem og
mögulegt meirihlutasamstarf flokk-
anna. Sögðu oddvitarnir engar slíkar
þreyifingar hafa farið fram, flokk-
arnir gengju óbundnir til kosninga.
Morgunblaðið/Hilmar Bragi Bárðar
Vel fór á með þeim Jóhanni Geirdal, Kjartani Má Kjartanssyni og Árna
Sigfússyni á framboðsfundinum í Stapa.
Stálpípuverk-
smiðju fagnað
Reykjanesbær
SANDGERÐISLISTINN sem
kennir sig við bókstafinn Þ hélt
grillveislu fyrir Sandgerðinga á
dögunum. Fjölmenni var í veisl-
unni og hátt í 400 pylsur runnu
ljúft niður, að sögn Marteins
Ólafssonar, umboðsmanns listans.
Boðið var upp á andlitsmálningu
og Halli Valli tók nokkur létt lög
á gítarinn við góðar undirtektir.
Hér skreytir Sigurbjörg Hjálm-
arsdóttir, einn frambjóðenda Þ-
listans, andlitið á ungum Sand-
gerðingi.
Sandgerðingum
boðið í grill
Sandgerði
SKIPULAGSSTOFNUN hefur bor-
ist tillaga Hitaveitu Suðurnesja og
verkfræðistofunnar Línuhönnunar
að matsáætlun vegna mats á um-
hverfisáhrifum lagningar 220kV há-
spennulínu frá Reykjanesi að
Svartsengi.
Athugasemdir við tillögurnar
þurfa að hafa borist Skipulagsstofn-
un eigi síðar en 29. maí næstkomandi
og stefnir stofnunin að því að skila
niðurstöðu sinni fyrir 12. júní.
Í tilkynningu frá Skipulagsstofn-
un segir að allir geti kynnt sér tillög-
urnar og lagt fram athugasemdir.
Hægt er að nálgast þær á skrifstofu
stofnunarinnar á Laugavegi 166 í
Reykjavík eða á vefsíðu Línuhönn-
unar, www.lh.is.
Skipulagsstofnun hefur leitað um-
sagnar Grindavíkurkaupstaðar,
Reykjanesbæjar, Ferðamálaráðs,
Fornleifaverndar ríkisins, Heil-
brigðiseftirlits Suðurnesja, Holl-
ustuverndar, iðnaðar- og viðskipta-
ráðuneytisins, Löggildingarstofu og
Náttúruverndar ríkisins.
Matsáætlun háspennulínu
Reykjanes
SUMARHÁTÍÐ eldri borgara verð-
ur í Framsóknarhúsinu, Hafnargötu
62 í Keflavík á annan í hvítasunnu, 20.
maí, kl. 15. Guðni Ágústsson landbún-
aðarráðherra mun segja sögur úr
sveitinni, rokkarinn Rúnar Júlíusson
leikur nokkur lög, Kjartan Már
Kjartansson, bæjarfulltrúi Fram-
sóknarflokksins, fer með gamanmál
og Freyr Sverrisson, einn frambjóð-
enda flokksins, sýnir töfrabrögð.
Sumarhátíð
eldri borgara
Reykjanesbær
FJÖGUR ungmenni á aldrinum 17–
20 ára slösuðust er fólksbifreið sem
þau voru í valt út af Stafnesvegi í
Sandgerði snemma í gærmorgun,
skammt frá Hvalsneskirkju. Voru
þau flutt á sjúkrahúsið í Keflavík en
reyndust öll hafa hlotið minniháttar
meiðsl.
Að sögn lögreglunnar voru nokkur
ungmennanna við skál en bílstjórinn
með öllu óölvaður. Varð það ung-
mennunum til happs að þau voru öll í
bílbeltum. Hlutu þau aðeins skrámur
og mar hér og þar. Bifreiðin er
gjörónýt að sögn lögreglu og var
fjarlægð af vettvangi með dráttarbif-
reið.
Bílvelta á
Stafnesvegi
Sandgerði
VORTÓNLEIKAR Tónlistarskóla
Reykjanesbæjar hefjast næstkom-
andi þriðjudag þann 21. maí og
stendur tónleikahaldið yfir fram á
föstudagskvöldið 24. maí. Á tónleik-
unum kennir margra grasa þar sem
fram koma m.a. strengjasveitir,
lúðrasveitir, barnakór, bjöllukór og
einstakir nemendur, bæði styttra og
lengri komnir í skólanum. Skólaslit
verða svo 26. maí nk.
Vortónleikar
að hefjast
Reykjanesbær
♦ ♦ ♦
♦ ♦ ♦
Háskólakórinn
ætlar að halda vortónleika sína miðvikudaginn 22. maí
kl. 20 í Keflavíkurkirkju. Á efnisskránni eru íslensk þjóðlög,
m.a. eftir Atla Heimi Sveinsson, Báru Grímsdóttur,
Hafliða Hallgrímsson, Hjálmar H. Ragnars, John Hearne,
Jón Ásgeirsson, Jón Leifs og Þorkel Sigurbjörnsson.
Stjórnandi kórsins er Hákon Leifsson.
Aðgangur er ókeypis og allir velkomnir.
ⓦ Blaðbera vantar í
sumarafleysingar í
Ytri-Njarðvík.
vantar í afleysingar í Ytri-
Njarðvík
Upplýsingar veitir
umboðsmaður,
Eva Gunnþórs-
dóttir í síma
421 3475
og 868 3281.