Morgunblaðið - 27.05.2005, Blaðsíða 21

ERLENT
MORGUNBLAÐIÐ FÖSTUDAGUR 27. MAÍ 2005 21
ARNALDO Otegi, leiðtogi Batasuna, hins ólög-
lega flokks baskneskra aðskilnaðarsinna á
Spáni, var handtekinn í gærmorgun. Hann
dvelst nú í einangrun í Soto del Real-fangelsi í
Madríd en stjórnvöld fullyrða að Otegi sé félagi
í ETA, aðskilnaðar- og hryðjuverkahreyfingu
baskneskra þjóðernissinna.
Lögmaður Otegis upplýsti að gerð hefði verið
krafa um 400.000 evra tryggingu (sem svara til
rúmlega 32 milljóna króna) gegn því að honum
yrði sleppt úr haldi. Yrði sú upphæð greidd „á
næstu dögum“. Lögmaðurinn sagði handtökuna
„pólitískt og lögfræðilegt hneyksli“.
Bann var lagt við starfsemi Bata-
suna-flokksins, sem sagður er hinn pólitíski
armur ETA-samtakanna, í marsmánuði árið
2003. Otegi og fleiri fulltrúar flokksins nutu hins
vegar þinghelgi fram til 17. apríl síðastliðins
þegar fram fóru kosningar til þings Baska.
Spænsk yfirvöld grunar að Otegi og náinn
samstarfsmaður hans, Jon Salaberria, hafi
komið nærri fjármögnun baráttu ETA. Sala-
berria hefur einnig setið á þingi Baskalands og
er nú eftirlýstur. Salaberria hafði einnig verið
kallaður til yfirheyrslu í tengslum við rannsókn
á „byltingarskattinum“ svonefnda, sem er gjald
sem fjölmörg fyrirtæki í Baskalandi greiða fyrir
að fá að starfa í friði fyrir ofbeldismönnum á
vegum ETA.
Otegi er fæddur í Elgoibar í Guipuzcoa, einni
sýslu Baskalands, árið 1958. Að sögn spænska
dagblaðsins El Mundo gekk hann til liðs við rót-
tæka þjóðernissinna er hann var aðeins tvítugur
að aldri. Hann tók fyrst sæti á þingi Baskalands
árið 1995 þegar hann leysti af þingkonuna Beg-
oña Arrondo, sem þá var dæmd í fangelsi fyrir
samstarf við hryðjuverkamenn. Áður hafði
hann setið í fangelsi fyrir mannrán og hann hef-
ur einnig hlotið dóm fyrir að hvetja til hryðju-
verka.
„Hurðinni skellt í lás“
Juan Fernando López Aguilar, dómsmála-
ráðhera Spánar, lýsti yfir því í gær að með því
að handtaka Otegi hefði eitt skref til viðbótar
verið stigið í þeim tilgangi að binda enda á starf-
semi ETA. „Réttarríkið er virkt,“ sagði ráð-
herrann, að því er fram kom í frétt El Mundo.
Talsmaður Batasuna-flokksins, Joseba Per-
mach, lýsti rás atburða hins vegar þannig að
„hurðinni [hefði] verið skellt á vonir basknesku
þjóðarinnar um lýðræði og frið“. Sagði hann
Jose Luis Rodriguez Zapatero, forsætisráð-
herra minnihlutastjórnar spænska Sósíalista-
flokksins, bera beina ábyrgð á handtökunni og
þróun mála í samskiptum baskneskra þjóðern-
issinna og stjórnvalda í Madríd. Permach sagði
að efnt yrði til mótmæla vegna handtökunnar og
áttu þau að hefjast í gærkvöldi við skrifstofur
Sósíalistaflokksins í Baskalandi.
Fyrr í mánuðinum lýsti Spánarþing yfir
stuðningi við þá stefnu Zapateros að efna beri til
viðræðna við fulltrúa ETA lýsi samtökin fyrst
yfir því að þau hafni ofbeldi sem lögmætu vopni
í baráttunni fyrir sjálfstæðu ríki Baska. Á Spáni
er almennt litið svo á að þessu frumkvæði for-
sætisráðherrans hafi samtökin svarað með
sprengjuárás í Madríd á miðvikudag.
Handtakan í gær og árásin í Madríd hafa því
orðið til þess að draga mjög úr bjartsýni um að
takast megi að koma á viðræðum stjórnvalda og
fulltrúa ETA. Á hinn bóginn voru þær vonir
tæpast reistar á raunsæju mati. Enginn vafi
leikur á því að ETA-samtökin eru ekki jafn öfl-
ug og forðum. Á hinn bóginn þarf ýmislegt að
ganga á áður en skipulögð glæpasamtök leggja
upp laupana, hvað þá viðurkenna í reynd ósigur
sinn.
Leiðtogi Batasuna-flokks-
ins handtekinn á Spáni
Vonir um viðræður
milli stjórnvalda og
herskárra þjóðern-
issinna dvína
Reuters
Arnaldo Otegi kemur ásamt lögmanni sínum
fyrir dómara í Madríd á miðvikudag. Í gær var
hann síðan handtekinn, sakaður um að taka
þátt í fjármögnun ETA.
Eftir Ásgeir Sverrisson
asv@mbl.is
Kaíró. AFP. AP. | Kosið var um breytingar á
egypskum kosningalögum í þjóðaratkvæða-
greiðslu í landinu gær og samþykktu um
83% kjósenda tillöguna, að því er stjórnvöld
segja. Kosningaþátttaka er sögð hafa verið
um 54% sem þykir góður árangur fyrir
stjórnvöld í landinu og lýstu þau yfir mikilli
ánægju með útkomuna. Stjórnarandstæð-
ingar vefengja hins vegar úrslitin og tala um
kosningasvindl, en samtök á þeirra vegum
höfðu hvatt fólk til að hunsa kosningarnar.
Breytingarnar sem samþykktar voru í
gær fela í sér að fleiri en einn geti boðið sig
fram í forsetakosningum í haust, en stjórn-
arandstæðingar segja þetta sýndarumbæt-
ur þar sem lögin feli í sér strangar takmark-
anir á framboði. Með nýju lögunum geti í
raun engir aðrir boðið sig fram en meðlimir
Þjóðlega lýðræðisflokksins, flokks Hosni
Mubarak forseta, sem hefur verið við völd
síðan 1981 án þess að fá raunverulegt mót-
framboð.
Ofbeldi gegn mótmælendum
á kjördag fordæmt
Mótmælendur voru áberandi á götum
Kaíró í gær og kom til átaka milli þeirra og
útsendara stjórnvalda þar sem mótmælend-
ur voru barðir og konur í hópi þeirra nið-
urlægðar. Aðfarir stjórnvalda gegn mót-
mælendum hafa verið harðlega gagnrýndar
og fordæmdar, meðal annars af George W.
Bush Bandaríkjaforseta, sem sagði að
svona ætti ekki að „halda frjálsar kosning-
ar“.
Stjórnvöld í Egyptalandi leyfðu ekki al-
þjóðlegt eftirlit með atkvæðagreiðslunni í
gær, en nú er talið að þrýstingur um að þau
leyfi eftirlit með komandi forsetakosningum
hafi aukist verulega.
Egyptar
samþykkja
kosningalaga-
breytingar