Morgunblaðið - 04.07.2005, Blaðsíða 10

10 MÁNUDAGUR 4. JÚLÍ 2005 MORGUNBLAÐIÐ
FRÉTTIR
ÓÁNÆGJA er komin upp á ný meðal lækna
Landspítala – háskólasjúkrahúss (LSH) með
stimpilklukkukerfi spítalans. Eiginlegar
stimpilklukkur eru reyndar ekki lengur til
staðar heldur hringja starfsmenn sig inn og út
frá vinnustað í gegnum síma. Nýlega er farið
að tengja þetta kerfi við vinnuskýrslur lækna
og dæmi eru um að læknar hafi ekki fengið
unnar stundir greiddar. Formaður Skurð-
læknafélags Íslands hefur í bréfi til lækninga-
forstjóra spítalans farið fram á að notkun kerf-
isins, er nefnist Vinnustund, verði tafarlaust
hætt og a.m.k. einn læknir hefur tilkynnt
formlega að hann muni ekki nota þetta kerfi
lengur.
Óánægjualda fór af stað meðal lækna í kjöl-
far bréfs sem þeir fengu allir frá Jóhannesi M.
Gunnarssyni, lækningaforstjóra LSH, um
miðjan júní og fjallaði um vinnutíma lækna og
skráningu í Vinnustundina. Þar segir m.a. að
vinnutími hvers læknis í dagvinnu sé í hlutfalli
við ráðningarhlutfall hans og skuli allur falla
innan þessara tímamarka, vera reglubundinn
og fyrirfram skilgreindur af yfirmanni.
Jóhannes segir einnig í bréfinu að starfs-
menn með fastan dagvinnutíma fái hvorki um-
fram tíma greiddan né geti þeir safnað honum
til úttektar seinna meir. Hinn svonefndi tíma-
banki haldi utan um vinnuskil dagvinnu manna
með sveigjanlegt vinnufyrirkomulag og eigi
því ekki við um lækna spítalans. Því sé rétt að
skrá alla lækna inn í Vinnustund með fastan
vinnutíma. Segir Jóhannes að um lækna í
hlutastarfi gildi sömu reglur, þ.e. að viðvera
þeirra sé skilgreind fyrirfram samkvæmt
ákvörðun yfirlæknis og í samræmi við ráðning-
arhlutfall hans. Síðan segir í bréfi lækninga-
forstjórans: „Í kjarasamningi lækna er þó að
finna fráviksheimild til að haga vinnutíma með
öðrum hætti en hér greinir en þá með skrif-
legu samkomulagi. Þessu ákvæði er þó ein-
ungis beitt í undantekningartilvikum og með
samþykki viðkomandi yfirlæknis og sviðs-
stjóra.“
Tíðkast hvergi annars staðar
Nú undir mánaðamótin fékk Jóhannes bréf
frá Helga H. Sigurðssyni, formanni Skurð-
læknafélags Íslands, þar sem skráningu á
vinnutíma lækna er harðlega mótmælt. Fékk
Helgi mikinn stuðning við þetta bréf frá
starfsfélögum sínum við flestar deildir spít-
alans. Í bréfinu til Jóhannesar segist Helgi
hafa alvarlega verið að íhuga sína stöðu á
sjúkrahúsinu. Segir hann aðferðina við að skrá
vinnu lækna óásættanlega og margsinnis hafi
verið mótmælt notkun á stimpilklukkum fyrir
skurðlækna. Helgi segir það hvergi tíðkast að
skurðlæknar séu skyldugir til að skrá vinnu
sína með stimpilklukku og að auki hafi þessi
fyrirskipan verið gerð án nokkurrar heimildar
í kjarasamningi lækna.
„Ef til vill er kerfið hentugt við starfs-
mannahald einhverra annarra starfsstétta, en
algjörlega óraunhæft og nánast fáránlegt við
að mæla vinnuframlag og afköst skurðlækna
og sennilega annarra lækna LSH,“ segir í
bréfi Helga til lækningaforstjórans en afrit af
því fengu einnig læknaráð LSH, formaður
Læknafélags Íslands og forstjóri LSH, Magn-
ús Pétursson. Undir lok bréfsins fer Helgi
fram á að notkun Vinnustundar fyrir skurð-
lækna verði tafarlaust hætt og fundnar verði
aðrar leiðir í samráði við læknana til að meta
þeirra vinnuframlag.
„Stimpla mig út og skilja
sárið eftir opið?“
Meðal þeirra lækna sem eru ósáttir við þetta
fyrirkomulag er Hannes Hjartarson, sérfræð-
ingur í háls-, nef- og eyrnalækningum. Hefur
hann ritað stjórnendum spítalans bréf og til-
kynnt að hann ætli ekki að notast við þetta
kerfi lengur. Hannes segist í samtali við Morg-
unblaðið vera í hálfu starfi á spítalanum og
gengið hafi verið út frá því að hann ynni þar
ákveðna daga og í ákveðinn tímafjölda. Vinni
hann aðra daga á vakt segist Hannes vera í
sjálfboðavinnu og ekki fá laun sín greidd.
Hið sama gerist þegar hann sé kallaður til
starfa úr sumarfríi. Hannes segir stimp-
ilklukkukerfi af þessu tagi henta illa fyrir
lækna þegar þeir þurfi að rjúka inn á vinnu-
staðinn í neyðartilvikum og sinna alvarlega
sjúku fólki. Þá horfi menn ekki fyrst til þess að
fara í símann og stimpla sig til starfa. Að auki
vinni læknar ýmisleg verk heima fyrir á kvöld-
in og um helgar, m.a. við undirbúning aðgerða
og símtöl við aðra sérfræðinga. Sú vinna sé
ekki skráð og þar af leiðandi ekki greitt fyrir
hana. Stimpilkerfi segi ekkert til um viðveru
lækna. „Það er mikil óánægja meðal lækna og
ég á von á að fjölmargir sætti sig ekki við
þetta. Svona kerfi hentar ekki þessu starfi.
Það hentar ágætlega vaktavinnufólki og
starfsmönnum verksmiðja að stimpla sig inn
og út. Okkar starf er allt annars eðlis,“ segir
Hannes og tekur sem dæmi að ef hann sé við
aðgerð fram yfir klukkan fjögur á daginn fái
hann ekki greitt fyrir þá yfirvinnu. „Á ég þá
bara að stimpla mig út og skilja sárið eftir op-
ið?“ spyr Hannes.
Byrjunarörðugleikar
Niels Christian Nielsen, staðgengill lækn-
ingaforstjóra LSH, segist kannast við
óánægju lækna. Ákveðnir byrjunarörð-
ugleikar séu við skráningu vinnutíma lækna í
nýja kerfinu en vonandi takist að aðlaga það
aðstæðum lækna. Ekki standi til að breyta
vinnutilhögun þeirra eða starfskjörum.
Sjúkrahúsið sé að bjóða upp á rafræna skrán-
ingu vinnutíma allra starfsmanna, sem ætlunin
sé að verði skilvirkari og þægilegri. Skrán-
ingin hafi verið innleidd hjá hjúkrunarfræð-
ingum fyrir ári og þá hafi komið upp vandamál
í upphafi sem hafi tekist að leysa. Niels bendir
á að eftir sem áður sé það yfirlæknir sem skrifi
upp á vinnuskýrslur lækna og ákveði vinnu-
tilhögun, engar tölvur ráði því. Læknar verði
að semja við sína yfirmenn um sveigjanlegan
vinnutíma. Reglan sé sú að yfirvinna sé ekki
greidd nema yfirmaður hafi beðið um hana.
Mikil óánægja með-
al lækna með vinnu-
tímaskráningu
Morgunblaðið/ÞÖK
Formaður Skurðlæknafélags Íslands hefur ritað lækningaforstjóra Landspítala – háskóla-
sjúkrahúss bréf og farið fram á að hætt verði að nota það kerfi sem skráir vinnutíma lækna.
Bréfaskipti milli lækna og stjórnenda þar sem
læknar segjast ætla að hætta að stimpla sig inn
Eftir Björn Jóhann Björnsson
bjb@mbl.is
BYGGÐAÞRÓUN og matvæli
voru í brennidepli á fundi Nor-
rænu ráðherranefndarinnar á
sviði fiskveiða, landbúnaðar,
skógræktar og matvæla sem
fram fór í Árósum í Danmörku
síðastliðinn fimmtudag. Nor-
rænu ráðherrarnir tólf sam-
þykktu yfirlýsingu um byggða-
þróun þar sem fram kom að
hana bæri að efla með því að
auðvelda fólki að starfa saman
og bera saman bækur sínar,
bæði svæðisbundið og á milli
ríkja.
Ræddu drög um bætta
heilsu og lífsgæði
Þá var einnig lögð áhersla á
norræna matargerðarlist auk
þess sem ráðherrarnir komu
sér saman um megindrög að
norrænni framkvæmdaáætlun
um bætta heilsu og lífsgæði.
Viðbragðsáætlanir vegna smit-
sjúkdóma sem brjótast út í búfé
og einnig fuglainflúensu voru
ræddar meðal ráðherranna en
þeir ráðgera þétt samstarf
dýralækna svo að hægt verði að
bregðast fljótt við til að ein-
angra og ráða niðurlögum
slíkra sjúkdóma.
Ráðherrarnir voru á einu
máli um að Norðurlandaþjóð-
irnar ættu að vera í farar-
broddi, bæði í sínum hluta og
hnattrænt, þegar leitað væri
leiða til að stjórna auðlindum
hafsins. Telja þeir einnig að
hnattvæðingin ætti að leiða til
markvissari fiskvinnslu.
Byggða-
þróun og
matvæli í
brennidepliSKÓLAHLJÓMSVEIT Kópavogs,undir stjórn Össurar Geirssonar,
vann sl. miðvikudag fyrstu verð-
laun í norrænu konsertkeppninni
Gautaborg Musik Festival. Keppt
var bæði um gæði og verkefnaval. Í
tilefni þessa góða árangurs tóku
bæjaryfirvöld í Kópavogi á móti
sigurvegurunum. Gunnar Ingi
Birgisson bæjarstjóri og Hansína
Ásta Björgvinsdóttir bæjarfulltrúi
voru meðal þeirra sem tóku á móti
tónlistarfólkinu.
Sigruðu í nor-
rænni kons-
ertkeppni
Morgunblaðið/ÞÖK
KVENNASAMTÖK mótmæla viðskiptum ríkis-
valdsins á klámi. Þetta kemur fram í yfirlýsingu
sem borist hefur frá samtökunum. Þar er bent á að
ríkisfyrirtækið Síminn hefur um nokkurt skeið
dreift og selt aðgang að stöðinni Adult Channel í
gegnum breiðbandið. Nýverið fjölluðu fjölmiðlar
síðan um að Skjár 1, sem er að hluta til í eigu sama
ríkisfyrirtækis, hefði gert samning við sjónvarps-
stöðina Playboy TV um dreifingu á klámefni. Fyr-
irtæki í einkaeigu stunda einnig dreifingu og sölu
klámefnis. Er í yfirlýsingunni nefnt að 365 ljós-
vakamiðlar selja klámstöðina Private Blue í gegn-
um Digital Ísland.
„Nokkrar tilraunir voru gerðar af hálfu einstak-
linga til að kæra dreifingu og sölu kláms á síðasta
ári. Í öllum tilfellum ákvað saksóknari að ákæra
ekki. Það er því svo að ákvæðum hegningarlaga
um klám er ekki fylgt eftir af neinum þeim aðilum
sem eiga að sjá um að lögum sé framfylgt,“ segir í
yfirlýsingunni. Er bent á að Ísland er aðili að
CEDAW-samningi Sameinuðu þjóðanna og þar er
kveðið á um afnám allrar mismununar gegn
konum. En þar segir í 3. gr.:
„Aðildarríkin skulu gera allar viðeigandi ráð-
stafanir á öllum sviðum, sérstaklega á sviði stjórn-
mála, félagsmála, efnahags og menningar, þ. á m.
með lagasetningu, til þess að ábyrgjast fulla þróun
og framfarir til handa konum í þeim tilgangi að
tryggja að þær geti á grundvelli jafnréttis við
karla framfylgt og notið mannréttinda og grund-
vallarfrelsis.“
Skora á stjórnvöld að framfylgja lögum
Hinn 19. júní síðastliðinn, á baráttudegi ís-
lenskra kvenna, afhentu níu samtök Árna Magn-
ússyni jafnréttismálaráðherra kröfugerð. Þar
kom fram sá vilji kvennahreyfingarinnar að lög
gegn klámi yrðu virt. „Undirrituð samtök skora á
stjórnvöld að sinna lögbundinni skyldu og sjá til
þess að lögum sé framfylgt. Ennfremur mótmæla
samtökin því harðlega að fyrirtæki í eigu ríkisins
skuli stunda starfsemi sem brýtur í bága við lands-
lög og vinnur gegn jafnrétti kynjanna.
210. gr. hegningarlaga er svohljóðandi: „Ef
klám birtist á prenti, skal sá, sem ábyrgð ber á
birtingu þess eftir prentlögum, sæta sektum eða
fangelsi allt að 6 mánuðum.“
Ennfremur er í yfirlýsingunni bent á að hver
sem flytur inn eða hefur í vörslu sinni ljósmyndir,
kvikmyndir eða sambærilega hluti sem sýna börn
á kynferðislegan eða klámfenginn hátt skal sæta
sektum eða fangelsi allt að 2 árum ef brot er stór-
fellt. Sömu refsingu varðar að flytja inn eða hafa í
vörslu sinni ljósmyndir, kvikmyndir eða sambæri-
lega hluti sem sýna börn í kynferðisathöfnum með
dýrum eða nota hluti á klámfenginn hátt.
Undir yfirlýsinguna rita þær: Katrín Anna Guð-
mundsdóttir, f.h. Femínistafélags Íslands, Helga
Guðmundsdóttir, f.h. Kvenfélagasambands Ís-
lands, Auður Eir Vilhjálmsdóttir, f.h. Kvenna-
kirkjunnar, Margrét Steinarsdóttir, f.h. Kvenna-
ráðgjafarinnar, Þorbjörg Inga Jónsdóttir, f.h.
Kvenréttindafélags Íslands, Guðrún Elín Jóns-
dóttir, f.h. Samtaka um kvennaathvarf, Guðrún
Jónsdóttir, f.h. Stígamóta, og Rósa Erlingsdóttir,
f.h. UNIFEM á Íslandi.
Ríkisfyrirtæki brjóta landslög og
vinna gegn jafnrétti kynjanna