Morgunblaðið - 05.10.2005, Blaðsíða 10
10 MIÐVIKUDAGUR 5. OKTÓBER 2005 MORGUNBLAÐIÐ
FRÉTTIR
ÞINGFLOKKUR Frjálslyndra
gerði grein fyrir sínum þingmálum á
blaðamannafundi í gær og munu þeir
m.a. leggja áherslu á sjávarútvegs-
og samgöngumál auk áherslu á mál-
efni eldri borgara í upphafi þings.
Magnús Þór Hafsteinsson, þing-
flokksformaður Frjálslyndra, gerði
grein fyrir 16 þingmálum og sagði að
fyrsta málið sem verður lagt fram á
nýhöfnu þingi verði þingsályktunar-
tillaga um tryggan lágmarkslífeyri.
Lagt er til að bótareglum verði
breytt þannig að staða lífeyrisþega
verði bætt. Þ.e. að þeir sem fá
greiddan minni lífeyri úr lífeyrissjóði
en 50 þúsund kr. á mánuði verði ekki
fyrir neinni skerðingu á þessari
grunnupphæð.
Þá hyggst Frjálslyndi flokkurinn
leggja fram þingsályktunartillögu er
varðar láglendisvegi. „Hún fjallar
um að það verði gert átak í því að
koma öllum okkar þjóðvegum niður
á láglendið. Við erum þá sérstaklega
að horfa til jarðganga í því sjónar-
miði,“ segir Magnús og bætir því við
að ekki þurfi að grafa mörg jarðgöng
til þess að þjóðvegurinn verði allur á
láglendinu. Hafa þingflokksmenn
Frjálslyndra lagt fram ákveðnar
áætlanir hvað það varðar þannig að
framkvæmdir verði kláraðar á
næstu 20 árum.
Allir geti stundað fiskveiðar
Þá leggja Frjálslyndir fram frum-
varp um sjávarútvegsmál sem leyfir
öllum Íslendingum að stunda fisk-
veiðar á grunnslóð í kringum landið
með handfærum. Segjast Frjáls-
lyndir eiga von á því að núverandi
sjávarútvegsráðherra, Einar K.
Guðfinnsson, komi til með að styðja
málið.
Frjálslyndir hyggjast einnig
leggja fram frumvarp um að inn-
heimtu löggæslukostnaðar á útihá-
tíðum verði hætt. Magnús bendir á
að málið sé umdeilt og árlega verði
hatrammar deilur um þetta.
Þingflokkur Frjálslyndra kynnir þingmál í upphafi þings
Leggja áherslu á sam-
göngur og sjávarútveg
Eftir Jón Pétur Jónsson
jonpetur@mbl.is
Morgunblaðið/Árni Sæberg
Magnús Þór Hafsteinsson (t.v.), kynnti þingmálin í gær ásamt þeim Mar-
gréti Sverrisdóttur, Guðjóni A. Kristjánssyni og Sigurjóni Þórðarsyni.
FRÆÐSLUMIÐSTÖÐ atvinnulífs-
ins hefur fengið styrk frá Leonardo
Da Vinci starfsmenntaáætlun Evr-
ópusambandsins að upphæð 30 millj-
ónir í tilraunverkefni sem ber titilinn
„The Value of Work“. Verkefnið
miðar að því að þróa aðferðir til að
meta raunverulega færni einstak-
linga í atvinnulífinu. Fræðslumið-
stöðin mun stýra verkefninu. Sam-
starfslönd eru Danmörk, England,
Kýpur, Slóvenía og Svíþjóð.
Fram kemur í frétt frá Fræðslu-
miðstöðinni að áherslan á þróun
mats á raunverulegri færni fólks á
vinnumarkaði hafi verið að aukast í
nágrannalöndum. Í því skyni að auka
gagnsæi sé nú verið að kanna mögu-
leikann á að þróa sameiginlegan
grunn Evrópulanda til að meta raun-
verulega færni þeirra sem eru í
vinnu og sé verkefnið liður í því. Þá
segir m.a. í fréttinni: „Mat á raun-
færni er til þess að draga fram færni
sem starfsmaður býr yfir, skrá hana
og meta út frá settum viðmiðum. Lit-
ið er á vinnustaðinn sem námsum-
hverfi þar sem þróuð er hagnýt
færni; almenn, fagleg og persónuleg
færni. Mikilvægt er að meta kunn-
áttu og þekkingu sem fullorðnir ein-
staklingar hafa byggt upp í gegnum
starfsreynslu sína,“ segir í fréttinni.
Þá segir að á Íslandi verði til-
raunaverkefnið unnið með starfs-
mönnum banka. „Þróuð verða viðmið
fyrir mat á færni fyrir störf al-
mennra starfsmanna í bönkum.
Útbúin verður handbók með lýsingu
á færniþáttum og þróaðar aðferðir
og tæki til að meta færni starfs-
manna. Lögð verður áhersla á yfir-
færslugildi verkefnisins á aðrar
greinar.
Samstarfsaðilar FA í verkefninu
hér á landi eru Íslandsbanki, Lands-
bankinn, KB banki, Menntaskólinn í
Kópavogi, Samband íslenskra
bankamanna, Verslunarmannafélag
Reykjavíkur, Starfsgreinaráð fjár-
mála- og verslunargreina og
menntamálaráðuneytið. Fulltrúar
þessara aðila mynda faghóp í verk-
efninu sem mun reglulega fara yfir
framvindu mála. Samskonar faghóp-
ar hagsmunaaðila verða myndaðir í
hverju landi.“
Verkefnið mun standa yfir í tvö ár
og munu upplýsingar um framvind-
una ásamt afurðum birtast á vefsíðu
verkefnisins sem opnuð verður í jan-
úar 2006. Upplýsingar verður einnig
að finna á vefsíðu Fræðslumiðstöðv-
ar: www.frae.is.
Fær styrk til að
meta færni einstak-
linga í atvinnulífi
INGIBJÖRG Sólrún Gísladóttir, al-
þingismaður og formaður Samfylk-
ingarinnar, var fyrst í ræðustól að
lokinni stefnuræðu forsætisráðhera.
Hún hóf mál sitt á að segja að nið-
urstaða samkeppni um nýtt tónlist-
ar- og ráðstefnuhús í Reykjavík
markaði tímamót. Samvinna okkar
besta fólks úr heimi hönnunar, lista
og viðskipta og góður stuðningur
stjórnmálamanna úr öllum flokkum,
hefði þar verið til fyrirmyndar.
Hún minnti á að nú væru rúm 15
ár liðin ár frá því að verkalýðshreyf-
ing, atvinnurekendur og stjórnvöld
náðu tökum á verðbólgunni með
þjóðarsáttarsamningunum. Þá fyrst
hefði hugtakið „stöðugleiki“ farið að
heyrast í íslenskum stjórnmálum.
„Ég hygg, góðir landsmenn, að
núna eigið þið mörg hver erfitt með
að átta ykkur á klisjukenndu tali
landsfeðranna sem segjast verja
stöðugleikann. Hvaða stöðugleika?
Forsætisráðherra var á þessum nót-
um í ræðu sinni og dró upp mynd af
sýndarveruleika. Raunveruleikinn
er allt öðruvísi,“ sagði Ingibjörg Sól-
rún. „Blikurnar hrannast upp. Við-
skiptahallinn hefur aldrei verið meiri
síðan mælingar hófust. Útflutnings-
greinar eru í bráðum vanda. Grein-
ingardeildir banka spá allt að 8%
verðbólgu. Öll met hafa verið slegin í
skuldasöfnun, sem leggst þyngst á
heimilin og ungt fólk. Forsendur
kjarasamninga eru að bresta.“
Betri umgjörð um landsmenn
Geir H. Haarde, utanríkisráð-
herra og varaformaður Sjálfstæðis-
flokksins, gerði m.a. að umtalsefni
það sem honum þótti standa upp úr
eftir sjö og hálft ár í embætti fjár-
málaráðherra, en hann lét af því fyr-
ir rúmlega viku. Fyrst nefndi hann
mjög góða afkomu ríkissjóðs yfir
tímabilið í heild, umtalsverðar
skattalækkanir, nýtt fæðingarorlofs-
kerfi, einkavæðingu ríkisfyrirtækja
og niðurgreiðslu skulda og lífeyris-
skuldbindinga framtíðarinnar.
„Allt stefnir þetta að því sama,
þegar öllu er á botninn hvolft. Því að
tryggja betri og öruggari umgjörð
um fólkið í landinu, utan um einstak-
lingana og fjölskyldurnar,“ sagði
Geir.
Hann sagði að aðhaldsstigið í fjár-
lagafrumvarpinu fyrir 2006, sem nýr
fjármálaráðherra lagði fram í fyrra-
dag, væri hátt enda umsvif mikil í
hagkerfinu. „Efnahagsstjórn við
þessar aðstæður er úrlausnarefni
sem gengið verður til af ábyrgð og
festu. Þá skiptir miklu hve búið er að
létta miklum byrðum af ríkissjóði á
undanförnum árum og þar með
skattgreiðendum framtíðarinnar.“
Marglas stefnuræðuna
Steingrímur J. Sigfússon, formað-
ur Vinstri hreyfingarinnar – græns
framboðs, sagðist m.a. hafa þurft að
marglesa stefnuræðu forsætisráð-
herra til að leita af sér allan grun um
að forsætisráðherra véki ekki einu
orði að jafnvægisleysi í efnahagsmál-
um þjóðarinnar eða heldur að verk-
efnum sem framundan væru í hag-
stjórn á næstu dögum.
„Forsætisráðherra víkur ekki
einu orði að uppsögnum í sjávarút-
vegi, að erfiðleikum ferðaþjónust-
unnar, að gjaldþroti Slippstöðv-
arinnar á Akureyri og erfiðleikum
skipaiðnaðarins eða almennt skilyrð-
um útflutnings- og samkeppnis-
greina. Staðreyndin er sú, góðir
landsmenn, að við erum núna að
upplifa af fullum þunga ruðnings-
áhrif stóriðjustefnunnar sem eru að
ýta öðru atvinnulífi úr vegi.“
Steingrímur spurði m.a. hvers
vegna forsætisráðherra hefði ekki
minnst á harkalega vaxtahækkun
Seðlabankans.
Guðjón A. Kristjánsson, formaður
Frjálslynda flokksins, ræddi m.a.
sjávarútvegsmál og óskaði nýjum
sjávarútvegsráðherra velfarnaðar.
Guðjón sagðist vilja bera þá von í
brjósti að Einar Kr. Guðfinnsson
myndi, þrátt fyrir yfirlýsingar um að
fylgja „einbeittum kvótavilja forvera
síns“, hafa skynsemi og frumkvæði
til að opna fyrir innkomu nýliða í út-
gerð og fækka kvótabundnum fisk-
tegundum.
„Sjávarbyggðirnar mega alls ekki
við því að dugnaðarsjómenn eigi ekki
leið til þess að komast að í grunn-
atvinnuvegi þeirra. Hvernig væri
komið fyrir Bolungarvík ef þeir, sem
þar gera út, hefðu ekki átt opna leið
inn í útgerð smærri báta á sínum
tíma?“
Umræður á Alþingi í gærkvöld í kjölfar stefnuræðu forsætisráðherra
Morgunblaðið/Kristinn
Ingibjörg Sólrún Gísladóttir í ræðustóli Alþingis við umræðurnar um stefnuræðuna í gær, Sólveig Pétursdóttir sit-
ur í stóli forseta og til hægra sést Árni Mathiesen sjávarútvegsráðherra.
Hörð gagnrýni stjórnarand-
stöðu á efnahagsstjórnina
Ingibjörg Sólrún Gísladóttir í ræðustóli Alþingis við umræðurnar um stefnuræðuna í gær, Sólveig Pétursdóttir sit-
ur í stóli forseta og til hægra sést Árni Mathiesen fjármálaráðherra.
GUÐJÓN A. Kristjánsson, formað-
ur Frjálslynda flokksins, hóf mál
sitt á að ræða Baugsmálið og sagði
það hafa vakið athygli á því að hér
virtust vera „sérstakar innvígðar
klíkur, sem með sérstökum send-
ingum og samráði er ætlað að
leggja línur um málsmeðferð. Og á
það lagt mat hvort til dæmis fjár-
málaráðherra vilji gefa samþykki
sitt fyrir því að til þess bærar stofn-
anir fái mál til meðferðar. Sagt er
að það sé svo gott að eiga alla þessa
samráðsbræður í málum sem ganga
til rannsóknar og dómstóla. Menn
verða innmúraðir í trúnaði sínum
við sinn flokk eftir að hafa und-
irbúið „rétta leið“ í málsmeðferð-
inni og fengið vitneskju um að að-
förin væri með fullum vilja
forystumanna.“
Guðjón sagði að þjóðin fengi vart
trúað því að neðanjarðarspilling af
þessu tagi ríkti hér. „Við eigum
sem betur fer ekki neina aðkomu í
klíkuskapinn, í tölvupóstunum eða í
matarboðin sem virðast vera að-
dragandinn að því hvort fólk telji
mögulegt að leita réttar síns. Við í
Frjálslynda flokknum ætlum að
hafa þá trú að treysta megi því að
þeir víki úr máli, sem því tengjast,
svo almenningur missi ekki trú sína
á íslenskt réttarfar.“
Eiga enga
aðkomu í
klíkuskapinn
ÁSTA Möller alþingismaður ræddi
meðal annars um fjölmiðlana í
ræðu sinni og sagði að nú ríkti ann-
ar veruleiki en á dögum flokksblað-
anna. Útgáfa þeirra hefði tryggt
ákveðna fjölbreytni og ritstjórn-
arstefnan verið öllum ljós. Nú væri
eignarhald á stórum hluta fjöl-
miðlamarkaðarins á einni hendi og
önnur sjónarmið ríktu, eins og fólk
hefði orðið vitni að upp á síðkastið.
Taldi Ásta að flestum væri nú
ljóst að fjölmiðlalögin, sem numin
voru úr gildi á síðasta ári, hefðu átt
rétt á sér. „Nú er kallað á slíka
lagasetningu, vegna almannahags-
muna. Markmiðið er breitt eign-
arhald á fjölmiðlum til að tryggja
frelsi fjölmiðla og lýðræðislega um-
ræðu og skapa okkar annars ágæta
fjölmiðlafólki starfsumhverfi sem
það á skilið,“ sagði Ásta.
Nú er kallað eftir
fjölmiðlalögum