Fréttablaðið - 27.02.2004, Blaðsíða 16

16 27. febrúar 2004 FÖSTUDAGUR
HEIÐURSVÖRÐUR SKOÐAÐUR
Thomas Klestil, forseti Austurríkis, skoðaði
ungverskan heiðursvörð við Sandor-höll í
Búdapest þegar hann fór í opinbera heim-
sókn til starfsbróður síns, Ferenc Madl.
Frumvarp um verndun Mývatns og Laxár:
Miklir varnaglar segir ráðherra
ALÞINGI „Það er ljóst að breyting-
ar sem kunna að verða gerðar á
Laxárvirkjun leiða til þess að
störfum fækkar. Ég er andvígur
bráðabirgðaákvæðinu sem
heimilar hækkun Laxárstíflu og
upplýsingar vantar til að hægt
sé að taka afstöðu til áhrifa
hækkunarinnar á virkjunina,“
sagði Kristinn H. Gunnarsson,
Framsóknarflokknum, en fyrstu
umræðu um frumvarp umhverf-
isráðherra um verndun Mý-
vatns og Laxár er nú lokið á Al-
þingi.
Steingrímur J. Sigfússon,
Vinstri grænum, sagði að ef svo
reyndist að Landsvirkjun teldi
ekki hagkvæmt að reka Laxár-
virkjun áfram yrði auðvitað að
sæta því, en í frumvarpinu væri
heimild Umhverfisstofnunar
fyrir að hækka vatnsborð árinn-
ar, sem væri bannað samkvæmt
núgildandi lögum.
„Það er ekki í tengslum við
raunveruleikann að ætla að
keyra þessa framkvæmd í gegn
með því að setja lög í andstöðu,
sem fyrir liggur, við þá sem þarf
að ná samkomulagi við,“ sagði
Steingrímur og skírskotaði til
andstöðu Landeigendafélagsins
við framkvæmdirnar.
Siv Friðleifsdóttir umhverfis-
ráðherra lagði áherslu á að mál-
ið væri flókið og næðist ekki í
gegn nema með víðtækri sátt og
hún sagðist telja að menn næðu
saman um útfærslu á hækkun
stíflunnar.
„Það eru miklir varnaglar á
frumvarpinu og það er rangt að
ég sé með því að rjúfa grið eða
sáttagjörð. Það er verið að lög-
festa neitunarvald heima-
manna,“ sagði Siv. ■
Brotist inn fyrir
og eftir brunann
Fjölskylda missti allt sitt í bruna og innbroti. 11 ára drengur missti móður sína
örfáum vikum fyrr, en svo allar veraldlegar eigur. Eigur fjölskyldunnar voru ótryggðar.
BRUNI „Við misstum allt okkar í
brunanum og innbrotum sem
framin voru fyrir og eftir að íbúð-
in brann,“ segir Hermóður Sig-
urðsson, sem ásamt konu sinni,
Önnu Maríu Sigtryggsdóttur, kom
að leiguíbúð sinni, Hraunbergi 9, í
kaldakoli eftir bruna fyrir tveimur
vikum. þau segja að greinilegt hafi
verið af ummerkjum að brotist
hafi verið inn í íbúðina fyrir brun-
ann og grunur sé á að um íkveikju
sé að ræða. Því
til sönnunar
segja þau að
kveikt hafi verið
á tveimur elda-
vélarhellum.
„Mér skilst að
innbrotsþjófar noti gjarnan þá að-
ferð að brjótast inn á miðjum dög-
um. Þá er fólk grandalaust fyrir
því að um innbrot sé að ræða,“ seg-
ir Anna María.
Bruninn varð á laugardaginn
fyrir tæplega hálfum mánuði.
Anna María og Hermóður höfðu
brugðið sér í heimsókn til kunn-
ingjafólks um miðjan dag. Milli
klukkan sjö og átta um kvöldið
var hringt í farsíma Önnu Maríu.
Hún segir að húseigandinn hafi
verið í símanum og hann tilkynnti
henni að íbúðin hefði brunnið.
„Aðkoman var hræðileg. Það
var komið myrkur en lögreglu-
maður með vasaljós lýsti okkur
um íbúðina, sem var gjörsamlega
í rúst. Þeir innsigluðu hana síðan
en við fengum inni hjá kunningja-
fólki. Daginn eftir þegar við kom-
um hafði innsiglið verið rofið og
íbúðin opin upp á gátt. Greinilegt
að brotist hafði verið inn um
nóttina, öðru sinni,“
segir Anna
María.
Hún segir
að aðkoman þá
hafi verið
skelfileg og hún hafi
vart upplifað annað eins.
Greinilegt hafi verið að menn
hafi farið um allt. Föt hafi ver-
ið tekin út úr skápum. Margt var
horfið úr íbúðinni svo sem golf-
sett, örbylgjuofn og tvö sjón-
varpstæki,
„Mér brá við að sjá hve mikið
var horfið úr íbúðinni. Það voru
skítug skóför í hjónarúminu okk-
ur. Við erum ekki með neinar
tryggingar en sárast var að missa
alla persónulega muni sem ekki er
hægt að bæta. Það var eins konar
sorgarferli sem ég gekk í gegnum
við að upplifa þetta,“ segir Anna
María.
Hermóður segir að sárast
hafi verið fyrir 11 ára son hans,
Anton Helga, að missa eigur
sínar. Tveimur vikum
fyrr hafði hann misst
móður sína með voveifleg-
um hætti.
„Hann missti þarna heim-
ili sitt í annað sinn á tveimur
vikum. Ofan á móðurmiss-
inn bættist að eigur hans
brunnu,“ segir Hermóður.
Anna María og Hermóður
segja að lögreglan hafi ákveðna
menn undir grun um að vera
viðriðnir innbrot og íkveikju. Þó
segjast þó hafa litla von um að
meintir innbrotsþjófar séu borg-
unarmenn fyrir tjóninu.
„Við erum allslaus eftir brun-
ann en mamma Hermóðs hefur
verið að safna peningum til að
koma okkur til hjálpar. Við erum
mjög þakklát fyrir það en sumt
verður aldrei bætt svo sem fjöl-
skyldumyndir og annað persónu-
legt. Stór hluti af fortíð okkar
brann,“ segir Anna María.
rt@frettabladid.is
„Stór hluti
af fortíð okkar
brann.
RICHARD MAY
Aðaldómarinn lætur af störfum af heilsu-
farsástæðum eigi síðar en í lok maí.
Réttað yfir Milosevic:
Málflutningi
sækjenda
lokið
HAAG Saksóknarar í réttarhöldun-
um yfir Slobodan Milosevic, fyrr-
verandi forseta Júgóslavíu, hafa
ákveðið að ljúka máli sínu fyrr en
áætlað var vegna veikinda sak-
borningsins og aðaldómarans.
Ákæruvaldið átti eftir að kalla
til nokkur vitni og leggja fram
gögn máli sínu til stuðnings þegar
lögð var fram beiðni um að fá að
leggja málið í dóm. Milosevic hef-
ur verið veikur í tvær vikur en
um helgina var tilkynnt að dómar-
inn Richard George May léti af
störfum af heilsufarsástæðum í
lok maí.
Þegar gengið hefur verið frá
beiðni sækjenda verður gert
þriggja mánaða hlé á réttarhöld-
unum til að gefa Milosevic færi á
að undirbúa málsvörn sína. ■
JOSHUA DAVEY
Sætti sig ekki við að yfirvöld neituðu að
greiða prestsnám hans.
Styrkir til náms:
Borga ekki
prestsnám
WASHINGTON, AP Nemendur sem
leggja stund á trúarlegt nám með
það fyrir augum að verða prestar
eiga ekki kröfu á að ríkið greiði
hluta af námi þeirra, segir í niður-
stöðu hæstaréttar Bandaríkjanna.
Nemi í guðfræði kærði þá ákvörð-
un yfirvalda Washington-ríkis að
svipta hann skólastyrk þegar í
ljós kom að hann hugðist læra til
prests.
„Þjálfun einstaklings til að
veita söfnuði forstöðu er í raun
trúarleg viðleitni,“ sagði William
H. Rehnquist, forseti hæstaréttar,
í dómnum. Dómurinn er þvert á
niðurstöðu hæstaréttar í mörgum
málum að undanförnu þar sem
hann hefur leyft ríkisfjárveiting-
ar til trúfélaga og verkefna á
þeirra vegum. ■
KRISTINN H. GUNNARSSON
Þingmaður Framsóknarflokksins er andvíg-
ur bráðabirgðaákvæði í frumvarpi Sivjar
Friðleifsdóttur, umhverfisráðherra og
flokkssystur sinnar, sem heimilar Umhverf-
isstofnun að fallast á hækkun Laxárstíflu.
ALLSLAUS
Þau Hermóður Sigurðsson og Anna María Sigtryggsdóttir misstu allar sínar veraldlegu eigur í brunanum. Anton Helgi, sonur Hermóðs, hafði skömmu áður misst móður sína með
voveiflegum hætti og við það bættist mikill eignamissir.
HRAUNBERG 9
Hermóður og Anna María segja greinilegt
af ummerkjum að brotist hafi verið inn í
íbúðina fyrir brunann.