Fréttablaðið - 11.09.2004, Síða 53

37LAUGARDAGUR 11. september 2004
Á sunnudagskvöldið hefst ný
sería af Sjálfstæðu fólki á Stöð
2. Jón Ársæll Þórðarson og fé-
lagar hafa eytt dágóðum tíma í
að elta vel valda Íslendinga á
röndum og kynnast lífi þeirra.
Sumir eru þjóðþekktir á meðan
aðrir skera sig úr vegna lífs-
reynslu sinnar.
„Viðmælandi okkar í fyrsta
þættinum er Helgi Einar Harð-
arson hjartaþegi,“ segir Stein-
grímur Jón Þórðarson framleið-
andi þáttanna hjá Stöð 2. „Við
erum búnir að fylgjast með hon-
um í tvö ár. Við fórum tvisvar
með honum út í hjartaaðgerðir. Í
fyrra skiptið komst hann að því
að hjartað passaði ekki. Í seinna
skiptið var gamla hjartað tekið
og nýtt sett í staðinn. Í leiðinni
var sett auka nýra, hann er því
með þrjú nýru. Gömlu nýrun
voru byrjuð að gefa sig eftir allt
álagið.“
Helgi fékk þar sitt annað
hjarta því að hann fór í sína
fyrstu hjartaígræðslu 15 ára
gamall. Líkaminn var byrjaður
að hafna hjartanu.
Steingrímur segir að Helgi
Einar hafi verið harður í horn að
taka. Með árunum og reynslunni
hafi hann lært nánast allt um
hjartaígræðslur og þess vegna
hafi hann farið óhræddur út í
þetta. „Við spurðum hann hvort
hann væri hræddur við að
deyja. Hann sagði það aldrei
vera inni í myndinni. Hann stóð
á því föstum fetum að þetta
myndi allt fara vel.“
Jón Ársæll og Steingrímur
voru búnir að fá leyfi til þess að
birta þáttinn, sama hvernig
færi. „Kraftaverkið er að fylgj-
ast með því hversu miklu betur
þetta fór en hann þorði að vona.
Það var tekið sýni af nýja hjart-
anu og höfnunin er nánast eng-
in. Í lokin förum við með honum
þegar hann fer á hestbak. Það er
ótrúlegt að hann skuli treysta
sér í það.“ ■
Hjartans mál í
Sjálfstæðu fólki
HELGI Í RÚMINU Helgi Einar hjartaþegi er gerður að umfjöllunarefni í fyrsta þætti nýrrar
seríu Sjálfstæðs fólks. Framundan í vetur eru m.a. Halldór Ásgrímsson, Þorgrímur Þráins-
son og Tryggvi Ólafsson.