Fréttablaðið - 27.09.2008, Side 58

38 27. september 2008 LAUGARDAGUR
sport@frettabladid.is
Margrét Lára Viðarsdóttir skoraði sigurmarkið í fyrri leiknum á móti
Frakklandi og hún hefur skorað í öllum sjö leikjum undankeppninnar.
Margrét Lára hefur unnið marga glæsilega sigra á ferlinum en hún
játar að þessi dagur gæti orðið sá stærsti.
„Þetta er langstærsta verkefni og stærsti leikur sem ég hef tekið
þátt í. Það væri draumur að ná að vinna eða gera jafntefli og ná að
komast áfram á EM. Þetta er stærsti leikurinn sem hefur verið spilað-
ur í íslenskri knattspyrnu,“ segir Margrét Lára. „Við verðum samt að
passa okkur að vera ekki með of hátt spennustig því það getur verið
hættulegt,“ segir Margrét.
Hún segir íslenska liðið kannski hafa haft heppnina með sér í fyrri
leiknum sem Ísland vann 1-0. „Við vörðumst út í rauðan dauðann í
fyrri leiknum og áttum þá mjög góðan leik. Þóra var frábær og lokaði
markinu og vörnin hélt því sem halda þurfti. Það er hægt að segja
að við höfum verið heppnar en ég trúi því að maður skapi sína eigin
heppni í íþróttum,“ segir Margrét.
„Við erum búnar að bæta okkur mikið síðan þá. Þær koma eflaust
miklu grimmari til leiks núna heldur en þá því kannski vanmátu þær
okkur eitthvað. Þetta er allt annar leikur,“ segir Margrét.
Hún ætlar sér að skora í áttunda Evrópu-
leiknum. „Ég geri mér fulla grein fyrir því
að ég mun fá færi eins og ég fæ í öllum
leikjum og ég þarf bara að klára það. Ég
ætla mér að klára það fyrir liðið.“
Margrét Lára sem segir stelpurnar vita
vel að stuðningi þjóðarinnar. „Ég hef aldrei
upplifað svona mikið umstang fyrir einn
leik, hvort sem er hjá knattspyrnusamband-
inu, hjá fólkinu í landinu eða frétta-
mönnum. Þetta er frábært fyrir okkur
og við upplifum okkur þannig að við
séum svolítið mikils virði á Íslandi
eins og handboltalandsliðið. Það
snerist allt um það þegar þeir voru
að spila sem þeir áttu fyllilega
skilið og nú er komið að okkur að
standa okkur eins vel.”
MARGRÉT LÁRA VIÐARSDÓTTIR: GETUR SKORAÐ Í ÖLLUM LEIKJUM UNDANKEPPNINNAR
Stærsti leikur í sögu íslenskrar knattspyrnu
FÓTBOLTI Sigurður Ragnar Eyjólfs-
son hefur talað mikið um varnar-
leik íslenska kvennalandsliðsins
og liðið hefur einbeitt sér að því að
byggja hann upp.
Þetta hefur borið árangur og
hafa íslensku stelpurnar nú haldið
hreinu í fjórum síðustu leikjum og
aðeins fengið á sig tvö mörk í níu
landsleikjum sínum á árinu.
Þetta er besta ár íslensku varn-
arinnar frá upphafi en tveir lykil-
menn í varnarleik liðsins eru þó
sjaldnast í sviðljósinu.
Þetta eru þær Guðrún Sóley
Gunnarsdóttir, sem hefur byrjað
alla leiki undir stjórn Sigurðar
Ragnars, og Ólína Guðbjörg Við-
arsdóttir, sem vann sér sæti í byrj-
unarliðinu í vor og hefur ekki
fengið á sig mark í A-landsliðinu í
670 mínútur.
Þessir tveir leikmenn eru tákn-
mynd fyrir stöðugleika liðsins í
síðustu leikjum og þær tvær sem
hafa spilað flestar mínútur með
liðinu á árinu.
Ólína hefur verið í byrjunarlið-
inu frá fyrsta leik ársins og hefur
varla misst úr mínútu síðan.
„Ég er svo heppin að spila við
hliðina á Kötu (Katrín Jónsdóttir)
og Gunnu (Guðrún Sóley Gunnars-
dóttir) en þær eru alveg frábærir
hafsentar. Það er ótrúlega gott að
koma inn í liðið og spila með þeim
því þær hjálpa manni alveg svaka-
lega mikið,“ segir Ólína, sem er
þekkt fyrir gífurlega vinnslu og
ósérhlífni í baráttu við fljóta kant-
menn andstæðinganna.
„Það skiptir öllu máli að vera
með einhverja í kringum sig sem
maður treystir hundrað prósent.
Mér finnst við hafa náð því að
treysta hver annarri mjög vel. Við
Gunna höfum verið svolítið vinstra
megin og við erum vanar því að
spila saman í KR. Við þekkjum
hvor aðra út og inn,“ segir Ólína,
sem er ekkert að pirra sig á því að
sóknarmennirnir fái alla athygl-
ina.
„Við erum oftar sýndar þegar
hitt liðið skorar heldur en þegar
við skorum. Mér finnst miklu
skemmtilegra að spila traustan
varnarleik en að gera einhverjar
gloríur í sókninni,“ segir Ólína.
Guðrún Sóley er einn af reynd-
ari leikmönnum íslenska liðsins
og hún vill líta raunhæft á varnar-
leik liðsins í ár.
„Ég er mjög ánægð með vörnina
í ár en reyndar höfum við ekki
fengið mikla mótspyrnu í leikjun-
um í sumar. En þetta er leikurinn
þegar við þurfum að spila okkar
besta leik. Við pökkuðum eigin-
lega svolítið í vörn í síðasta leik á
móti þeim. Aðalatriðið hjá okkur
er að vera vel skipulagðar en við
ætlum líka að pressa á þær líka.
Við ætlum ekki að vera hræddar
við að sækja á þær en númer eitt,
tvö og þrjú þarf varnarleikurinn
að vera góður,“ segir Guðrún, sem
hefur byrjað inn á í síðustu nítján
A-landsleikjum.
„Ólína er búin að standa sig frá-
bærlega vel. Hún var að glíma við
meiðsli í fyrra en síðan kom hún
rosalega sterk til baka. Það er frá-
bært að spila með henni,“ segir
Guðrún Sóley.
Íslensku stelpurnar mæta
Frökkum klukkan tvö í dag að
íslenskum tíma og verður leikur-
inn sýndur beint í Sjónvarpinu.
Sigur eða jafntefli tryggir liðinu
sæti í lokakeppninni en tapist leik-
urinn eiga stelpurnar ennþá mögu-
leika á að komast til Finnlands í
gegnum tvo umspilsleiki.
Guðrún Sóley veit hve stutt er í
markmiðið. „Við vitum að við
getum komið okkur á þetta mót
með því að taka þennan eina leik.
Þetta er stysta leiðin og hana vilj-
um við fara.“
Varnarleikurinn þarf að vera góður
Ólína Guðbjörg Viðarsdóttir og Guðrún Sóley Gunnarsdóttir eru nýkrýndir bikarmeistarar með KR og lyk-
ilmenn í hinni sterku vörn kvennalandsliðsins, sem mætir Frökkum í dag í úrslitaleik um sæti í lokakeppni
EM. Íslenska vörnin hefur haldið markinu hreinu í heilar 360 mínútur.
STEMNING Stelpurnar gera ýmislegt til
að stytta biðina fram að leiknum stóra
sem fer fram í dag. FRÉTTABLAÐIÐ/STEFÁN
ÞJÁLFARINN Sigurður Ragnar Eyjólfsson
getur náð einstökum árangri með lands-
liðið í dag. FRÉTTABLAÐIÐ/STEFÁN
VARNARJAXLAR KR-ingarnir Ólína Guðbjörg Viðarsdóttir og Guðrún Sóley Gunnarsdóttir hafa spilað frábærlega í íslensku vörn-
inni. Það mun mikið mæða á þeim í leiknum í dag. Þær sjást hér á göngu á ströndinni í gær. FRÉTTABLAÐIÐ/STEFÁN
FRAKKLAND-ÍSLAND
ÓSKAR ÓFEIGUR JÓNSSON
skrifar frá Frakklandi
ooj@frettabladid.is
FÓTBOLTI Katrín Jónsdóttir,
fyrirliði íslenska liðsins, hefur
upplifað ýmislegt með landsliðinu
enda leikur hún sinn 76. landsleik
í dag. Katrín segir mikla athygli
fjölmiðla ekki trufla stelpurnar,
sem séu kannski ekki vanar slíku.
„Ég held að þetta hafi ekki svo
mikil áhrif á okkur. Við erum
búnar að vera með Þóru og
Hrafnhildi með sjónvarpsvél á
okkur í öllum ferðum,“ segir
Katrín en þær eru að vinna mynd
um kvennalandslið. „Maður er
orðinn vanur því og mér finnst
frábært að flestir fjölmiðlar séu
að senda fulltrúa hingað. Þetta er
náttúrlega mikil breyting frá því
sem áður var,“ segir Katrín.
„Það hefur náðst góður árangur
hjá kvennalandsliðinu áður, en
núna er búið að ganga sérstaklega
vel og það er frábært að því sé
sýndur áhugi,“ segir Katrín, sem
er klár í leikinn. „Það er bara smá
spenna í okkur en stressið er ekki
komið ennþá. Það er meira bara
tilhlökkun að fara að spila
þennnan leik,“ sagði Katrín að
lokum. - óój
Katrín Jónsdóttir fyrirliði:
Athyglin trufl-
ar okkur ekki
HVERNIG FER MAÐUR Í ÞETTA? Fyrirliðinn og læknirinn Katrín Jónsdóttir reynir hér að
komast í vestið og markverðirnir María Björg Ágústsdóttir og Þóra Björg Helgadóttir
fylgjast með af áhuga fyrir aftan. FRÉTTABLAÐIÐ/STEFÁN
FÓTBOLTI Það er stutt í stríðnina
hjá sumum leikmönnum í íslenska
liðinu og þær hjálpa oft mikið við
að létta andann í hópnum þegar
mikið liggur við. Þeirra er þó enn
leitað sem skvettu ísköldu vatni
yfir fararstjórn íslenska hópsins
þegar hún lá í sólbaði í fyrradag.
Atvikið náðist á myndband,
sem bendir til þess að atburður-
inn hafi verið vel skipulagður, en
væntanlega verður hægt að sjá
þetta myndbrot í nýju myndinni
um kvennalandsliðið sem er nú í
framleiðslu.
Annars er afar létt yfir öllum
hópnum og mikið gert til þess að
halda andanum góðum. - óój
Prakkarar í landsliðinu:
Hver skvetti
vatninu?
FÓTBOLTI Íslensku stelpurnar
æfðu á keppnisvellinum í fyrsta
sinn í gær en leikvöllurinn er
mjög sérstakur þar sem hallandi
hjólreiðabraut er allt í kringum
hann.
Sigurður Ragnar Eyjólfsson
landsliðsþjálfari fór meðal ann-
ars yfir taktík morgundagsins á
æfingunni og þar var ekki hægt
að sjá annað en að hann ætlaði að
halda sig við sama byrjunarlið
og í síðasta leik.
Það er því engin sérstök varn-
aruppstilling í gangi og Hólm-
fríður Magnúsdóttir var einnig
með á æfingunni og spilar því
væntanlega á morgun.
Hólmfríður tók þó reyndar
ekki þátt í allri æfingunni heldur
hljóp einnig ein með sjúkraþjálf-
arnum. - óój
Byrjunarliðið verður að öllum líkindum óbreytt:
Hólmfríður klár í slaginn
TILBÚIN Hólmfríður æfði í gær og
er tilbúin í slaginn. FRÉTTABLAÐIÐ/STEFÁN
> Tryggvi gengur til liðs við Mafíuna
Tryggvi Guðmundsson, framherji FH, verður í leikbanni
þegar Hafnfirðingar mæta Fylki á Fylkisvelli í lokaumferð-
inni í dag. Tryggvi lætur þó ekki sitt eftir liggja og ætlar að
styðja við bakið á liðinu eins mikið og hann mögulega
getur. „Það þýðir ekkert annað en að styðja við bakið á
strákunum fyrst maður getur ekki verið með
sjálfur. Ég ætla að sitja með FH-mafíunni
í stúkunni og hvetja liðið áfram,“ segir
Tryggvi. Dennis Siim, miðjumaður FH, verð-
ur líka í leikbanni eins og þrír leikmenn
Fylkis, þeir Kjartan Ágúst Breiðdal, Ólafur
Ingi Stígsson og Þórir Hannesson.