Morgunblaðið - 17.03.2006, Blaðsíða 53

MORGUNBLAÐIÐ FÖSTUDAGUR 17. MARS 2006 53
ÍSLANDSMEISTARAMÓT í 10 dönsum, með frjálsri að-
ferð, fór fram í Laugardalshöllinni sl. sunnudag. Mótanefnd
Dansíþróttasambands Íslands hafði að venju veg og vanda af
skipulagi keppninnar. Á annað hundrað pör voru skráð til
leiks, annars vegar í Íslandsmeistaramótinu og hins vegar í
keppni í dansi með grunnsporum sem einnig var boðið upp á
samhliða 10 dansa keppninni. Þá var yngstu dansnemend-
unum boðið að koma og sýna dans og var sá hópur dyggilega
studdur af áhorfendum.
Setningarathöfnin var hefðbundin og íslenzka fánanum
vottuð tilhlýðileg virðing, eins og ávallt á dansmótum. Þetta
er ákaflega fallegur siður, sem mér þykir vænt um að sé
hafður í heiðri. Að þessu sinni flutti setningarávarp nýr heil-
brigðisráðherra Siv Friðleifsdóttir og af orðum hennar má
ráða að dansinn eigi þar öflugan stuðningsmann.
Reynir á keppendur
Að keppa í öllum 10 dönsunum er síður en svo auðvelt mál
og reynir verulega á þolrifin hjá keppendum í slíkri keppni.
Sérstaklega þó þegar keppendur keppa í fleiri en einum
flokki, eins og eitthvað var um á sunnudaginn. Í heildina voru
dansararnir í hörkufínu formi að mínu mati.
Robert Bellinger er breskur danskennari, hann er yfirdóm-
ari í barna- og unglingakeppninni í Blackpool, sem sennilega
er einhver sterkasta keppni fyrir þennan aldurshóp sem
haldin er. Það er mikill fengur að fá svo stór nöfn í dans-
heiminum hingað heim til að dæma, en hann var nú í annað
sinn að dæma hér og sagði m.a. í samtali við Morgunblaðið:
„Ég var mjög, mjög ánægður með daginn í dag, dansararnir
dönsuðu yfirleitt mjög vel, mun betur en þegar ég var hér
síðast. Í rauninni er ótrúlegt að sjá hversu miklu betri dans-
inn var í dag en fyrir tveimur árum. Hér er gríðarlega mikill
og góður efniviður og greinilega góðir fagmenn sem halda á
spilunum. Ég er viss um að þónokkur af þeim pörum sem
kepptu í dag geta náð langt, ef þau ætla sér það á annað
borð!“
Dómarar keppninnar voru fimm, Annette Behrendsen
Köhler frá Danmörku, Sissel W. Nilsen frá Noregi, Claus
Wodstrup frá Svíþjóð, Heinz Riehn frá Þýskalandi og áð-
urnefndur Robert Bellinger frá Englandi. Það er fastur liður
í þessum greinum mínum að gera athugasemd við það að
ekki séu allir dómararnir faglærðir og fær sú athugasemd að
fljóta hér með að venju.
Keppnin gekk vel fyrir sig í flesta staði, þó svo að tímatafl-
an riðlaðist nokkuð og væri á undan áætlun, sem er ný-
breytni. Það er svosem ekki mikið betra að vera á undan
áætlun, en það er erfitt að gera ráð fyrir blessaðri flensunni,
þegar tímatöflur eru settar upp í slíkri keppni. Ég tel það
hafa verið rétt hjá keppnisstjóranum Eggert Claessen að
keyra keppnina á þennan hátt og fækka þar með hléum yfir
daginn, sem gera hann yfirleitt mjög langdreginn. Eins og
áður sagði sýndu keppendur í langflestum tilfellum mjög góð-
an og skemmtilegan dans og voru dyggilega hvattir af sínum
stuðningsmönnum af hliðarlínunni.
Í flokki unglinga I F var einungis eitt par skráð til leiks og
teljast þau því öruggir sigurvegarar. Það er ekki auðvelt að
vera eina parið í keppnisflokki en Hilmar og Elísabet gerðu
þetta mjög vel og eru á mikilli siglingu. Sérstaklega var ég
ánægður með mikla bætingu í fótaburði hjá þeim í sígildu
samkvæmisdönsunum.
Hörð keppni hjá unglingum
Hörð keppni var háð í flokki unglinga II F. Fyrsta sætið
hrepptu Alex og Ragna, eftir nokkuð harða baráttu. Þau
dönsuðu mjög vel á sunnudaginn að mínu mati og eru greini-
lega í góðri þjálfun. Í samkvæmisdönsunum þarf Alex aðeins
að passa á sér vinstri höndina. Honum hættir til að missa
olnbogann niður og þá „brotnar“ úlnliðurinn. Þetta veldur því
að hann nær illa sway og swingi á vinstri hlið. Hins vegar var
fótavinnan hjá honum til fyrirmyndar. Samban hjá þeim var í
uppáhaldi hjá mér, vel dönsuð og skemmtileg. Alex og Ragna
voru mjög glæsileg í þessari keppni og hafa þroskast mjög
mikið sem dansarar á sl. vetri. Ég var líka mjög ánægður
með Sigurð og Söru, sem unnu silfurverðlaunin. Að mínu
mati var þetta það bezta sem þau hafa gert í keppni mjög
lengi. Sérstaklega var ég ánægður með dansstöðuna í sígildu
samkvæmisdönsunum, þau hafa greinilega sinnt fótvinnunni
vel, því dansstaðan þeirra var miklu afslappaðri og formbetri
en áður. Suður-amerísku dansarnir voru einnig skemmtilegir,
ég myndi helst benda þeim á að reyna að klára betur allar
hreyfingar, sérstaklega í línum og vinna alltaf í gegnum gólf-
ið.
Í flokknum ungmenni I F sigruðu Björn Ingi og Hanna
Rún mjög örugglega að mínu mati. Þau voru sigurvegarar
dagsins, það geislaði af þeim öryggi og dansgleði. Í sígildu
samkvæmisdönsunum komst enginn nálægt þeim, að mínu
mati og tangóinn … váááá. Jive-ið var að mínum dómi þeirra
sísti dans, reyndar á það eiginlega við allan hópinn, en jive-ið
þarf að dansa meira niður í gólfið og fá swingið með þeirri
pressu, þegar það er dansað svona „hátt“ verður það svolítið
skoppandi, ef svo má að orði komast.
Jón Eyþór og Helga Soffía unnu til silfurverðlauna, eftir
mjög harða keppni við Jónatan og Ástu. Jón Eyþór og Helga
Soffía komu greinilega í þessa keppni til að láta að sér kveða
og gerðu það svo sannarlega, sérstaklega í sígildu samkvæm-
isdönsunum, sem að mínum dómi er þeirra sterkari grein.
Þar hefur þeim farið mikið fram í vetur og sennilega hefur
það átt einna stærstan þátt í því að þau hrepptu silf-
urverðlaunin.
Eins og áður hefur komið fram, stóðu keppendur sig með
stakri prýði. Þarna var verið að velja fulltrúa Íslands til að
taka þátt í Evrópu- og heimsmeistaramótum í 10 dönsum og
það er ég viss um að þessi pör eiga eftir að bera hróður ís-
lenzkra dansíþróttamanna mjög víða á komandi misseri.
Úrslit í 10 dansa keppninni
Unglingar I F
Hilmar S. Gunnarsson/Elísabet Halldórsdóttir GT
Unglingar II F
Alex F. Gunnarsson/Ragna B. Bernburg HV
Sigurður M. Atlason/Sara R. Jakobsdóttir DÍH
Júlí H. Halldórsson/Telma R. Sigurðardóttir DÍK
Sigtryggur Hauksson/Eyrún Stefánsdóttir GT
Hörður Ö. Harðarson/Steinunn M. Gísladóttir Br.bl
Sigurþór Björgvinsson/Þórdís Bergmann DÍH
Ungmenni F
Björn I. Pálsson/Hanna R. Óladóttir DÍH
Jón E. Gottskálksson/Helga S. Guðjónsdóttir HV
Jónatan A. Örlygsson/Ásta B. Magnúsdóttir GT
Haukur F. Hafsteinsson/Denise M. Yaghi HV
Baldur K. Eyjólfsson/Anna K. Vilbergsdóttir GT
Magnús A. Kjartansson/Rakel Magnúsdóttir DÍK
Fullorðnir F
Björn I. Pálss./Hanna R. Óladóttir DÍH
Jón E. Gottskálksson/Helga S. Guðjónsdóttir HV
Alexander Mateev/Lilja Harðardóttir HV
Magnús A. Kjartansson/Rakel Magnúsdóttir DÍK
Jón G. Guðmundsson/Sigrún T. Gunnarsdóttir DÍK
Haraldur Ö. Harðarson/Karen M. Magnúsdóttir Br.bl
Nánari upplýsingar um úrslit má finna á www.danssport.is
Á annað hundrað pör skráð til leiks
Björn Ingi Pálsson og Hanna Rún Óladóttir
í flokki Ungmenni F.
Sigurður Már Atlason og Sara Rós Jakobsdóttir
í flokki Unglingar II F.
Morgunblaðið/Jón Svavarsson
Alex Freyr Gunnarsson og Ragna Björk Bernburg
í flokki Unglingar II F.
Pétur Fannar Gunnarsson og Aníta Lóa Hauksdóttir
í flokki Börn I K.
Jón Eyþór Gottskálksson og Helga Soffía Guðjónsdóttir
í flokki Ungmenni F.
DANS
Laugardalshöll
ÍSLANDSMEISTARAMÓT Í 10 DÖNSUM
Jóhann Gunnar Arnarsson