Morgunblaðið - 05.01.2007, Blaðsíða 12
12 FÖSTUDAGUR 5. JANÚAR 2007 MORGUNBLAÐIÐ
FRÉTTIR
Vegna miðbæjar-
brunans mikla verður
lokað næstu daga.
FLUGFÉLAGIÐ Ernir hefur tekið
í notkun skrúfuþotu sem tekur 19
farþega og verður hún einkum notuð
við áætlunarflug til Hornafjarðar og
Sauðárkróks.
Vélin er bresk, af gerðinni Jet-
stream 32, 19 farþega skrúfuþota
með jafnþrýstibúnaði. Tveir eru í
áhöfn. Flughraði vélarinnar er svip-
aður og hjá Fokker Friendship-flug-
vélum Flugfélags Íslands.
Kostaði um 100 milljónir
Vélin er smíðuð árið 1991 en að
sögn Harðar Guðmundssonar, eig-
anda, forstjóra og yfirflugstjóra
Ernis, er aldur flugvéla mjög af-
stæður. Þessi tiltekna vél sé afar vel
með farin. Ný hafi hún verið seld til
Japan Airlines og þar hafi hún verið
til 2001 þegar hún var seld til dansks
fyrirtækis sem flaug fyrir British
Airways.
Að sögn Harðar kostaði flugvélin
um 100 milljónir og töluverður
kostnaður, líklega um 15 milljónir,
bætist við vegna þjálfunar flug-
manna en þegar þjálfun lýkur munu
sex áhafnir geta skipst á að fljúga
vélinni. Hörður gerir ráð fyrir að vél-
inni verði flogið um 1.200 klukku-
stundir á ári vegna áætlunarflugs en
300–400 tímar bætist við vegna
leiguflugs.
Tíð innanlandsflug
Flogið verður fimm sinnum í viku
til Sauðárkróks yfir vetrartímann og
sjö sinnum til Hornafjarðar en verða
sennilega 8–9 í sumar. Vikulegar
flugferðir til Bíldudals verða sex og
tvisvar í viku verður flogið til Gjög-
urs. Aðrar flugvélar verða notaðar til
flugs á þessa áfangastaði þar sem
flugbrautirnar á þessum stöðum eru
ekki nógu langar fyrir skrúfuþotuna
nýju.
Flugfélagið Ernir dregur nafn sitt
af tveimur fjöllum sem bera þetta
nafn, annað er yfir Bolungarvík og
hitt við Ísafjörð, en þetta eru uppeld-
isstöðvar Harðar og eiginkonu hans.
Endurvakið 2003
Hörður stofnaði flugfélagið Erni
árið 1970. Félagið varð brátt mik-
ilvægt í samgöngumálum Vestfirð-
inga, enda vegasamgöngur mun
verri á þessum árum en í dag, og
stundaði m.a. póstáætlunarflug og
sjúkraflug í fjórðungnum. Leiguflug
innanlands og milli landa varð síðar
stór þáttur í starfsemi félagins. Árið
1995 var ákveðið að hætta rekstri fé-
lagsins og voru flugvélarnar seldar
en ýmsum eignum haldið við, m.a.
flugafgreiðslu á Reykjavíkurflug-
velli.
Félagið hóf á ný flugrekstur árið
2003 og í október á síðasta ári samdi
Ernir við Vegagerðina um áætlunar-
flug til Bíldudals, Gjögurs, Sauðár-
króks og Hafnar í Hornafirði. Áætl-
unarflug félagsins á þessa áfanga-
staði hófst nú um áramótin.
Morgunblaðið/Árni Sæberg
Rennileg Nýja vél Ernis tekur 19 farþega. Hún hefur lengst af verið í eigu Japan Airlines.
Ernir tekur nýja
skrúfuþotu í notkun
Í HNOTSKURN
»Flugfélagið Ernir á Ísa-firði hefur tekið í notkun
breska skrúfuþotu sem tekur
19 farþega.
»Flugvélin kostaði um 100milljónir og að líkindum
bætast við um 15 milljónir
vegna þjálfunar flugmanna.
»Ernir samdi við Vegagerð-ina í október síðastliðnum
um áætlunarflug til Bíldudals,
Gjögurs, Sauðárkróks og
Hafnar í Hornafirði.
Eftir Ómar Friðriksson
omfr@mbl.is
LANDSSAMTÖKIN Heimili og skóli
vilja fá skýrari upplýsingar og um-
ræðu um þá þjónustu kirkjunnar í
grunnskólum sem nefnist Vinaleið.
Verkefnið gengur út á stuðning við
börn í samstarfi nokkurra skóla og
kirkju.
Stjórn Heimilis og skóla sendi ný-
lega fyrirspurn um þessa þjónustu til
skólanefnda þriggja sveitarfélaga
sem hana bjóða, þ.e. í Mosfellsbæ,
Garðabæ og á Álftanesi. Hafa svör
ekki enn borist.
Skiptar skoðanir eru á þessari
þjónustu ef marka má niðurstöður
vefkönnunar sem Heimili og skóli
settu upp á heimasíðu samtakanna
um miðjan nóvember sl. Þar var spurt
um þessa þjónustu kirkjunnar. Nið-
urstöðurnar hafa nú verið birtar en
samtökin taka þó fram að ekki sé
hægt að alhæfa út frá þeim. Ekki sé
um vísindalega könnun að ræða þar
sem ekki sé vitað hverjir svari. Hins
vegar kom á daginn að mjög margir
svöruðu spurningunni eða alls 5.038.
Nánast jafnmargir
með og á móti
Skiptust svarendur í tvo nánast
jafnstóra hópa. 49,7% voru samþykk
því að Vinaleið væri jákvæð viðbót við
skólastarfið en 50,3% töldu að þessi
þjónusta ætti ekki heima innan
grunnskólans.
María Kristín Gylfadóttir, formað-
ur Heimilis og skóla, segir tölvukerfið
þannig upp byggt að ekki sé hægt að
senda svör oftar en einu sinni úr
hverri tölvu. Hins vegar sé ljóst að
einhver herferð hafi farið af stað, því
svörum við spurningunum hafi fjölg-
að mjög skyndilega á örfáum dögum.
Hún er þeirrar skoðunar að niður-
stöðurnar gefi engu að síður ákveðnar
vísbendingar, m.a. um að fræðsla til
fólks um þessa þjónustu sé ekki nægi-
leg. „Ég tel að það eigi við um öll þró-
unarverkefni í skólum að það verði að
liggja skýrt fyrir hver tilgangur
þeirra er,“ segir hún.
María segir samtökin ekki hafa vilj-
að blanda sér í deilu einstaklinga um
Vinaleiðina en þegar skólar bjóði upp
á þjónustu af þessu tagi sé mikilvægt
að allar upplýsingar liggi fyrir um út á
hvað hún gengur, hvernig árangur
hennar er mældur o.s.frv.
„Við sendum út spurningar í átta
liðum til þeirra skólanefnda, sem hafa
boðið upp á þessa þjónustu, í kjölfar
bréfa og fyrirspurna sem við fengum
inn á borð til okkar. Við höfum ekki
fengið svör en höfum verið að reka á
eftir því.“
María segir að tilefni þess að skóla-
nefndum voru sendar spurningar hafi
m.a. verið að samtökin vilji fá upplýst
hvernig staðið sé að þessari þjónustu í
skólunum og hvort samfélag foreldra
og skólastjórnenda sé þátttakandi í
því. Þessi þjónusta hafi verið kynnt
sem þróunarverkefni m.a. í Garðabæ.
„Það sem okkur finnst mest um
vert er að menn hafa kynnt þetta sem
þróunarverkefni, en það var ekki í
upphafi greint frá því hver styddi það,
það var ekki á hreinu hver tilgang-
urinn væri eða hver ætti að vísa hverj-
um [á þessa þjónustu] og hvort for-
eldri fengi að vita af því ef barni væri
vísað af kennara, o.fl.,“ segir hún.
Skiptar skoðan-
ir á Vinaleiðinni
STJÓRN Heimilis og skóla sendi í
nóvember sl. skólanefndum nokk-
urra sveitarfélaga bréf þar sem
spurt var um þjónustuna Vinaleið í
grunnskólum. Svör hafa ekki enn
borist. Var meðal annars spurt
hvort skólanefnd eða skólar bæj-
arfélagsins hefðu mótað starfs-
reglur um það hvaða utanaðkom-
andi aðilar fengju að bjóða upp á
þjónustu í skólanum á skólatíma.
Einnig var spurt hvort óskað
hefði verið eftir umsögn for-
eldraráða viðkomandi skóla áður
en ákveðið var að bjóða upp á Vina-
leiðina og hvaða reglur giltu um
þessa þjónustu, hvernig þær hefðu
verið kynntar forráðamönnum og
spurt var hver væri yfirmaður þess
aðila sem sinnir Vinaleið.
Spurningar send-
ar skólanefndum
MORGUNBLAÐINU hefur borist
eftirfarandi athugasemd frá Karli
Steinari Guðnasyni, forstjóra
Tryggingastofnunar ríkisins, varð-
andi ný afsláttarkort TR.
„Ný afsláttarkort Trygginga-
stofnunar hafa orðið leiðarahöfundi
Morgunblaðsins og Ástu Ragnheiði
Jóhannesdóttur alþingismanni til-
efni til umfjöllunar á síðum Morg-
unblaðsins undanfarna daga. Vegna
þess vill Tryggingastofnun koma
eftirfarandi atriðum á framfæri.
Það er ánægjulegt að nýju af-
sláttarkortin skuli vekja athygli og
áhuga almennings þannig að um
þau sé fjallað í ræðu og riti. Al-
mennt hafa viðbrögð verið afar já-
kvæð enda um framfaraspor að
ræða. Það má þó taka undir það að
breytingin sem þeim fylgir mætti
vera meiri en raun ber vitni enda
stefnt að því á skipulagðan hátt af
hálfu Tryggingastofnunar.
Það hefur verið keppikefli starfs-
manna Tryggingastofnunar um
árabil að auðvelda almenningi að-
gengi að þeim réttindum sem þar er
haldið utan um. Tryggingastofnun
starfar hins vegar ekki í einöngr-
uðu umhverfi heldur vinnur með og
í tengslum við miklu stærra kerfi.
Framfarir hjá Tryggingastofnun
eru háðar fjárveitingum Alþingis
og samvinnu við margar stofnanir.
Stundum miðar hægar fram á við
en æskilegt væri. Hvert skref í
framfaraátt er þó fagnaðarefni og
það á við um afsláttarkortin.
Í leiðara Morgunblaðsins, 4. jan-
úar 2007, er einnig gagnrýnt að
kortin skuli miðuð við almanaksárið
en ekki undangengna 12 mánuði
hverju sinni. Bent er réttilega á að
sá sem veikist í desember fær eng-
an afslátt þótt hann nálgist há-
marksútgjöldin um áramót. Nauð-
synlegt er hins vegar að bera
þessar leiðir betur saman því svip-
uð staða getur komið upp burtséð
frá því hvorri aðferðinni er beitt.
Alltaf verða einhverjir næstum
búnir að ná hámarkinu þegar 12
mánuðir eru liðnir og öðlast þá ekki
rétt til afsláttarkortsins. Sé miðað
við undangengna 12 mánuði fækkar
þó þeim sem ekki ná hámarkinu.
Breytt fyrirkomulag og útfærsla er
til skoðunar hjá Tryggingastofnun
og heilbrigðis- og tryggingamála-
ráðuneyti hvað þetta varðar.
Starfsmönnum Tryggingastofn-
unar fannst mikilvægt að hrinda af-
sláttarkortunum úr vör þótt ekki
væri siglt af stað undir fullum segl-
um. Samstarf við Landspítalann
(LSH) um næstu skref er á loka-
stigi og viðræður við aðra aðila eru
hafnar. Þótt aðgerðin virðist einföld
kallar hún m.a. á kostnaðarsamar
breytingar á tölvukerfum aðila og
kostnaðartilfærslur á milli stofnana
sem semja þarf um. Áður en langt
um líður væntir Tryggingastofnun
þess þó að henni muni berast allar
nauðsynlegar upplýsingar vegna
afsláttarkortanna. Með þessu
fyrsta skrefi skorar stofnunin á alla
þá aðila sem að verkinu þurfa að
koma að flýta því sem kostur er.
Fögnum fyrsta skrefinu – gangan
er hafin.
Karl Steinar Guðnason,
forstjóri TR.“
Spor í rétta átt
Yfirlýsing frá forstjóra Tryggingastofnunar ríkisins