Morgunblaðið - 26.06.2007, Blaðsíða 15

MORGUNBLAÐIÐ ÞRIÐJUDAGUR 26. JÚNÍ 2007 15
ERLENT
Gaza-borg. AFP. | Mennirnir sem hafa
breska blaðamanninn Alan Johnston
í haldi birtu í gær myndband af
Johnston sem sýnir hann með
sprengjubelti um sig miðjan. Í
myndbandinu segir Johnston, sem
hefur verið 105 daga í haldi mann-
ræningjanna, að gíslatökumennirnir
hyggist sprengja sprengjuna ef ein-
hver reyni að bjarga honum úr klóm
þeirra með valdi.
Johnston var rænt í Gaza-borg 12.
mars sl. er hann var á leið heim frá
vinnu sinni en Johnston hefur starf-
að undanfarin ár á Gaza-svæðinu á
vegum breska útvarpsins, BBC.
Mannræningjarnir hafa einu sinni
áður birt myndband með Johnston.
Það var Ismail Haniya, forystu-
maður Hamas-samtakanna í Palest-
ínu, sem fyrst greindi frá tilvist
þessa nýjasta myndbands en hann
sagði í fyrrakvöld að þessari gísla-
töku yrði að ljúka. Hamas-samtökin
hafa áður sagt að þau vinni hörðum
höndum að lausn Johnstons.
Viðræður út um þúfur
„Mannræningjarnir segjast til-
búnir til að breyta staðnum, þar sem
þeir hafa mig í haldi, í það sem þeir
kalla dauðasvæði ef tilraun er gerð
til að frelsa mig,“ segir Johnston í
myndbandinu. „Þeir hafa sagt mér
að samningaviðræður um lausn mína
sem lofuðu góðu hafi farið út um þúf-
ur þegar Hamas-samtökin og bresk
stjórnvöld ákváðu að beita hernaðar-
aðferðum til að ljúka þessari gísla-
töku og staðan er því mjög tvísýn
núna,“ segir hann ennfremur.
Reuters
Gísl Alan Johnston hefur sprengju-
belti um sig miðjan í myndbandinu.
Með byssu-
belti um
sig miðjan
Eftir Ásgeir Sverrisson
asv@mbl.is
ÍHALDSMAÐURINN Mauricio Macri, for-
seti knattspyrnuliðsins ofurvinsæla Boca Jun-
iors, var á sunnudag kjörinn borgarstjóri
Buenos Aires, höfuðborgar Argentínu. Sigur
Macris má hafa til merkis um fallandi gengi
Nestors Kirchners forseta og eiginkonu hans í
argentínskum stjórnmálum.
Macri, sem er 48 ára, gjörsigraði andstæð-
ing sinn, Daniel Filmus, í síðari umferð kosn-
inganna. Hann hlaut 61% greiddra atkvæða en
hafði hlotið 45% þeirra í fyrri umferðinni, sem
fram fór 3. júní.
Ákafur stuðningur Nestors Kirchners við
Filmus reyndist duga skammt og telst nið-
urstaðan verulegt áfall fyrir forsetann og
stjórnarflokk peronista. Macri, sem jafnframt
situr á þingi Argentínu, var frambjóðandi
PRO-flokkabandalags (sp. Propuesta Republ-
icana) miðju- og hægrimanna. Sjálfur fer hann
fyrir Breytingaflokknum (sp. Compromiso
para el Cambio), sem hann stofnaði árið 2003
er hann bauð sig í fyrsta skipti fram til emb-
ættis borgarstjóra Buenos Aires.
Macri tók sæti á þingi fyrir PRO-bandalagið
í fyrra. Honum er iðulega líkt við „kavalérinn“,
sjálfan Silvio Berlusconi, fyrrverandi forsætis-
ráðherra Ítalíu. Líkt og hann er Macri vellauð-
ugur kaupsýslumaður, hægrisinnaður og ná-
tengdur fótbolta. Macri varð forseti Boca
Juniors, eins öflugasta knattspyrnuliðs Arg-
entínu, árið 1995 og hefur tvívegis náð endur-
kjöri enda hefur liðið notið velgengni. Hann er
verkfræðingur að mennt, kominn af auðugu
fólki, sem byggt hefur upp mikið við-
skiptaveldi í Argentínu.
Pólskipti í höfuðstaðnum
Sigur Macris telst sögulegur því íbúar
Buenos Aires hafa aldrei áður kjörið hægri-
mann borgarstjóra. Og um pólitískt mikilvægi
þessara umskipta verður vart deilt, ekki síst í
ljósi þess að forsetakosningar fara fram í Arg-
entínu 25. október.
Nestor Kirchner forseti hefur borið höfuð
og herðar yfir aðra stjórnmálamenn argent-
ínska á undanliðnum árum og víst hefur verið
talið að hann fari með sigur af hólmi í kosning-
unum í haust. Forseti Argentínu má einungis
gegna embættinu tvö kjörtímabil í röð og hafa
innvígðir talið líklegt að eiginkona Kirchners,
Christina Fernandez de Kirchner, bjóði sig
fram nú og hafi embættið með höndum næstu
fjögur árin. Nestor gæti þá snúið aftur 2011.
Með þessu móti gætu Kirchner-hjónin stjórn-
að Argentínu til ársins 2015, jafnvel 2019.
Enn er ekki ljóst hvort þeirra fer fram í for-
setakosningunum í haust. Sýnt er þó að algjör
yfirburðastaða þeirra í argentínskum stjórn-
málum heyrir sögunni til. Kannanir sýna
minnkandi fylgi við Kirchner-hjónin og fram-
bjóðendur, sem notið hafa stuðnings forsetans,
hafa ekki hlotið brautargengi í undangengnum
kosningum. Spillingarmál, sem jafnan eru fyr-
irferðarmikil í argentínsku þjóðlífi, sýnast
einnig munu reynast forsetanum erfiðari en
ætla mátti. Kirchner forseti hefur aukinheldur
tekið upp náið samstarf við Hugo Chavez, for-
seta Venesúela og umdeildasta stjórn-
málaleiðtoga Rómönsku Ameríku nú um
stundir. Í Argentínu telja margir slíkt banda-
lag lítt til framfara fallið.
Sigurlíkur Kirchner-hjónanna í forsetakosn-
ingunum í haust teljast þó enn miklar en gott
gengi Mauricio Macri í borgarstjórnarkosn-
ingunum í Buenos Aires ætti að verða til þess
að hleypa lífi í stjórnarandstöðuna. Macri er
aukinheldur á góðum aldri og kann að áforma
frekari frama í stjórnmálunum, t.a.m. forseta-
framboð árið 2011.
Úr boltanum í borgarstjórn
Forseti knattspyrnuliðsins Boca Juniors hefur verið kjörinn borgarstjóri Buenos Aires og yfirburða-
stöðu Nestors Kirchners og eiginkonu hans í argentínskum stjórnmálum kann að vera ógnað
Retuers
Vinsæll Mauricio Marci, nýkjörinn borgar-
stjóri, stígur tangó á götum Buenos Aires.
Eftir Kristján Jónsson
kjon@mbl.is
SAMÞYKKT var á alþjóðlegri ráð-
stefnu í París í gær að efla aðgerðir
til að stöðva blóðsúthellingarnar í
Darfur-héraði í Súdan en þar hafa
um 200 þúsund manns fallið síðan
2003 og milljónir manna flúið heimili
sín. Condoleezza Rice, utanríkisráð-
herra Bandaríkjanna, sagði stjórn
Súdans hafa margsinnis svikið loforð
um að hafa hemil á dauðasveitum
sínum, janjaweed.
Sagði Rice að þess vegna væri
nauðsynlegt að halda áfram refsiað-
gerðum gegn stjórninni í Kartúm
sem er skipuð aröbum. Nicolas Sar-
kozy Frakklandsforseti hvatti einnig
til þess að tekið yrði hart á Súdan-
stjórn ef hún neitaði að eiga sam-
starf um að binda enda á átökin.
„Þögn drepur,“ sagði Sarkozy.
„Við vitum núna að ekki er hægt að
una því að taka ekki ákvörðun eða
bregðast ekki við ástandinu.“
Kínverjar, sem kaupa megnið af
olíunni sem Súdan selur og sjá
stjórninni fyrir vopnum, vöruðu hins
vegar við þvingunum og sögðu þær
geta haft öfug áhrif.
Um 7.000 manna illa búið friðar-
gæslulið Afríkusambandsins (AU)
hefur reynt að stilla til friðar en hef-
ur ekki haft erindi sem erfiði enda
héraðið á stærð við allt Frakkland.
Var helsta umræðuefnið í gær áætl-
anir um að við taki nýtt 20.000
manna gæslulið frá bæði AU og
Sameinuðu þjóðunum. Afríkusam-
bandið hunsaði þó ráðstefnuna, taldi
að með henni væri verið að trufla að-
gerðir sem sambandið hefur staðið
fyrir til að koma á friði.
Stórveldin heita
aðgerðum í Darfur
Vilja að Súdanstjórn verði þvinguð til að koma á friði
Í HNOTSKURN
»Janjaweed-vígasveitirSúdanstjórnar eiga sök á
mörgum hryðjuverkum gagn-
vart blökkumönnum sem eru í
meirihluta í Darfur.
»Stjórn Súdans segir tölurum mannfallið hafa verið
ýktar í pólitískum tilgangi.
Gaza. AFP. | Það
hefur ekkert
heyrst til ísr-
aelska her-
mannsins Ghilad
Shalit í eitt ár en
hernaðarvængur
Hamas-samtak-
anna í Palestínu
tók hann í gíslingu
og hafði það í för
með sér langvinnar loftárásir Ísr-
aelshers á Gaza. Í gær settu Ezzedine
al-Qassam-herdeildirnar hins vegar á
Netið ávarp frá Shalit þar sem hann
segist þurfa á læknisaðstoð að halda,
heilsu hans hafi hrakað. Þá voru birt-
ar sjónvarpsmyndir af því er Shalit
var handsamaður, en hann særðist
við það tækifæri.
Hermaður í
haldi í eitt ár
Ghilad Shalit
GRÍÐARLEGIR skógareldar ná-
lægt Lake Tahoe í Kaliforníu hafa
eyðilagt a.m.k. 165 byggingar og
neytt 1.000 manns til að flýja heim-
ili sín. Talið er líklegt að eldarnir
hafi kviknað af manna völdum sl.
sunnudag. Um 800 hektarar lands
hafa brunnið en engin slys orðið á
fólki.
Eldar brenna
AP
Slökkvistarf Lake Tahoe í Kali-
forníu er vinsælt sumarleyfissvæði.
AÐ minnsta kosti 45 týndu lífi í
átökum og ódæðisverkum í Írak í
gær, m.a. nokkrir áhrifamenn úr
ættbálkum súnníta í Anbar-hérað-
inu, vestur af Bagdad, þegar
sprengja sprakk á Mansour-hótel-
inu í Bagdad.
Mikið mannfall
FARÞEGAFLUGVÉL með a.m.k.
tuttugu innanborðs fórst skammt
frá Sihanoukville í Kambódíu í gær.
Vitað er að þrettán farþeganna
voru frá Suður-Kóreu, þrír frá
Tékklandi, einn frá Rússlandi og
fimm frá Kambódíu.
Allir fórust
GEYSILEGT vatnsveður í Bretlandi varð a.m.k. tveim-
ur að bana í gær og olli miklum truflunum á sam-
göngum. Hér sést flaumurinn á götum Sheffield, um
270 kílómetra norðan við London. Ungur maður í Hull,
sem var að aðstoða afa sinn við að hreinsa niðurfall, lét
lífið þar sem ekki tókst að bjarga honum í tæka tíð.
Herþyrlur voru notaðar til að bjarga fólki af hús-
þökum, mörg hundruð manns lokuðust inni í verk-
smiðjum og á skrifstofum í Sheffield. „Vatnið er nokk-
ur fet að dýpt,“ sagði starfsmaður á pósthúsi, Greg
Wood, en um 200 manns komust ekki úr húsinu. „Það
er mengað af skolpi og öllum fjáranum.“ Rignt hefur
mikið í Bretlandi síðustu daga og var vatnsborð því
hátt í Sheaf og fleiri ám, einkum var ástandið slæmt í
vesturhluta Englands. Mikil hitabylgja er hins vegar í
Suður-Evrópu, hitinn fór í 46 gráður í Aþenu.
Reuters
Geysimikil flóð í Bretlandi