Morgunblaðið - 30.07.2007, Qupperneq 16
16 MÁNUDAGUR 30. JÚLÍ 2007 MORGUNBLAÐIÐ
VESTURLAND
ÚR VESTURHEIMI
Eftir Steinþór Guðbjartsson
steinthor@mbl.is
„VIÐ eigum ættir okkar að rekja til
Íslands og heimili forfeðra okkar,
sameiginleg saga þeirra og líf,
draga okkur hingað,“ segir Lil
Shepherd frá Spanish Fork í Utah í
Bandaríkjunum. Hún er í sinni
sjöttu heimsókn á Íslandi síðan
1996 og fer að þessu sinni fyrir 29
manna hópi frá Utah.
Elsta samfélagið
Íslenska samfélagið í Spanish
Fork er hið elsta sinnar tegundar í
Norður-Ameríku. Íslendingar
kynntust fyrst mormónatrú 1851 og
ekki leið á löngu þar til ferðir hóf-
ust vestur til Utah. Fyrsta fólkið til
að fara fór frá Íslandi 1854 og kom
til Spanish Fork 1855 en frá þeim
tíma til 1914 fluttu 410 Íslendingar
til Utah.
Samskiptin við Ísland voru ekki
mikil lengst af og fyrsta hópferðin
frá Utah til Íslands var ekki fyrr en
1996, en þá kom Lil Shepherd til
landsins með 40 manna hóp. „Þetta
var í fyrsta sinn sem fólk af íslensk-
um uppruna í Utah fór í hópferð til
Íslands,“ rifjar hún upp. Hún segir
að allir hafi heyrt sögur frá Íslandi
en ekkert jafnist á við að upplifa
landið og þá strauma sem því fylgja
á landinu sjálfu. Eins hafi í mörgum
tilfellum verið síðustu forvöð að
hitta nána ættingja vegna aldurs.
„Við vissum í raun ekkert um Ís-
land og til að bæta úr því var ekki
um annað að gera en heimsækja
landið.“
Lil Shepherd hefur komið með
meira en 200 manns frá Utah. Í
hópnum núna eru 25 „nýliðar“ en
Tyler, sonur Lil, hefur verið lengst
hinna fjögurra á Íslandi. Hann var
trúboði hér á landi 1996 til 1998,
kom aftur 1998 í brúðkaupsveislu
og enn einu sinni sumarið 2000. „Ég
hef ekki talað mikið á íslensku síð-
an en málið kemur og það er gaman
að koma hingað enn einu sinni.“
Vilja ná sambandi
Hópurinn gistir á Radisson SAS
Hótel Sögu í Reykjavík til 1. ágúst
en stefnt er að dagsferð til Vest-
mannaeyja í dag. Síðan verður gist
í eina nótt á Geirlandi við Kirkju-
bæjarklaustur og síðustu tvær næt-
urnar á Hótel Örk í Hveragerði.
Lil segir að markmiðið með þess-
um ferðum sé fyrst og fremst að
reyna að koma á tengslum við fjar-
skylda ættingja og styrkja fyrri
sambönd. Íslenski leiðsögumað-
urinn Guðbjörg Bragadóttir hafi
tekið saman hvar sumir forfeðrar
ferðalanganna bjuggu og verði
reynt að koma við á sem flestum
bæjum á leið um landið.
Í hópnum eru meðal annars Lil
(lshepherd@youngliving.com),
Chris Neidig (chris@neidigon-
line.org), Janette Callister Hales
Beckham (beckhamrj@ivera-
city.com), Randy Thorn
(bthorn50@earthlink.net) og Linda
K. Pfaff (pfaff 6@hotmail.com).
Lil biður fólk, sem á ættingja í
Utah, endilega um að hafa samband
með því að nálgast fólkið á gisti-
stöðunum, senda póst á fyrrnefnd
netföng, hringja í fararstjórann
(8991295, 8451425) eða senda henni
póst (kgb@kgbtours.is).
Heimili forfeðranna á Íslandi helsta
aðdráttarafl ættingjanna í Utah
Morgunblaðið/Steinþór Guðbjartsson
Hópur Lil Shepherd er með 29 manna hóp á ferð um Ísland og fyrsta verkefnið var að fá sér morgunmat í Fjörukránni í Hafnarfirði.
Fararstjórarnir Mæðginin Tyler og Lil Shepherd með leiðsögumönnunum
og hjónunum Guðbjörgu Bragadóttur og Kristjáni Guðmundssyni.
Grundarfjörður | Í Sögumiðstöðinni
í Grundarfirði hefur Ingi Hans
Jónsson unnið ötullega að því und-
anfarin ár að byggja upp sýningu
undir nafninu „Hvernig nútíminn
varð til“.
Á föstudaginn var formlega opnuð
ný viðbót við sýninguna og kallast
hún Þórðarbúð. Eins og annað sem
berja má augum í Sögumiðstöðinni
er Þórðarbúð runnin undan rifjum
Inga Hans, sem er hugmynda-
smiður og hönnuður af guðs náð, en
auk þess mikill hagleiksmaður svo
hugmyndir hans spretta iðulega
fram fullskapaðar um leið og hann
kemur höndum yfir hamar, pensil og
sög.
Fyrirmynd hinnar nýju sýningar
er verslun Þórðar Pálssonar bif-
reiðastjóra sem var í Grundarfirði á
sjöunda áratugnum og er í fersku
minni allra innfæddra Grundfirð-
inga sem fæddir eru um miðja síð-
ustu öld. Þórðarbúð var í raun
sjoppa með hefðbundnu sniði mest-
an hluta ársins, en sérstaða hennar
var sú að fyrir hver jól umbreyttist
hún í leikfangabúð. Í upphafi jóla-
föstu voru allar hillur fullar af leik-
föngum sem yfirleitt seldust upp
fyrir Þorláksmessukvöld.
Draumur allra barna
Þórðarbúð stóð nokkurnveginn
gegnt gamla Kaupfélaginu og
stöldruðu börnin í bænum gjarnan
við og létu sig dreyma um jólagjafir
úr gluggunum, þar sem lágu leik-
fangastaflar. Þessa framhlið hefur
Ingi Hans sett upp í Sögumiðstöð-
inni og blasa búðarborðið og hill-
urnar við innandyra. Ingi segist
lengi hafa hafa gengið með þessa
hugmynd í maganum og verið fyrir
löngu farinn að viða að sér munum
frá þeim árum sem Þórður Pálsson
höndlaði með leikföng í Grund-
arfirði.
Hugmyndin er sú að Þórðarbúð
verði rammi utan um leikfangasafn
og studdist Ingi við myndir, auk
þess sem hann geymir í minning-
unni, við að gera eftirmyndina sem
nákvæmasta. Hann segist leitast við
að fanga augnablikið og stemn-
inguna sem ríkti á staðnum fyrir
hver jól um margra ára skeið.
Oftast hefur nýr áfangi í sýningu
Sögumiðstöðvarinnar verið tekinn í
notkun í tengslum við bæjarhátíð
Grundfirðinga, sem hófst einmitt á
föstudaginn. Ingi Hans segir því
gamansamur að í sínu tilfelli ætti
bæjarhátíðin með réttu að kallast „Á
síðustu stund“ en alla jafna er hún
nefnd Á góðri stund í Grundarfirði.
Rúmar ekki fleiri hugmyndir
Þórðarbúð verður kærkomin við-
bót við aðrar sýningar sem Sögu-
miðstöðin hefur að geyma, en þar
má nefna Bæringsstofu þar sem
geymdir eru munir úr eigu áhuga-
og fréttaljósmyndarans Bærings
heitins Cecilssonar. Jafnframt er
þar lítill sýningarsalur þar sem líta
má myndir úr safni Bærings. Einnig
má sjá sýningu um upphaf vél-
bátaútgerðar í Grundarfirði, auk
sýningar sem tengist lífsháttum
fólks um síðustu aldamót að
ógleymdum gamla bænum sem er
sýnishorn af þeim bæjum sem al-
gengir voru á þessum tímum.
Ingi Hans segist nú búinn að fylla
það húsrými sem Sögumiðstöðin
hafi yfir að ráða þannig að nú megi
hann helst ekki fá fleiri hugmyndir,
án þess að þurfa þá að byggja við
eða ofan á húsnæðið.
Ný Þórðarbúð opnuð í Grundarfirði
Sígilt Þær voru hugfangnar af gömlu leikfangalest-
inni sem ók hring eftir hring innan við glerið.
Klippt Ingi Hans og Hreiðar Þórðarson opnuðu sýninguna formlega.
Sjoppan fræga rís
á ný í Sögusafninu
Í HNOTSKURN
»Hátíðin „Á góðri stund íGrundarfirði“ er haldin
ár hvert, síðustu helgina í
júlí.
»Sögumiðstöðin var form-lega opnuð í júlí árið 2003
og er henni ætlað að vera
miðstöð sagnamenningar á
Snæfellsnesi, en auk þess
upplýsingamiðstöð fyrir
ferðamenn.
Gamaldags Gluggar Þórðarbúðar voru útstæðir og köll-
uðu útstillingarnar því enn frekar á athygli barnanna.