Morgunblaðið - 01.10.2008, Qupperneq 34

34 MIÐVIKUDAGUR 1. OKTÓBER 2008 MORGUNBLAÐIÐ
MENNING
„SAGAN er dæmisaga, fyndin og
ljóðræn, um eðli hlutanna,“ segir
hinn virti rithöfundur A.S. Byatt um
verðlaunasögu Sjóns, Skugga-
Baldur, sem er komin út í enskri
þýðingu Victoriu Cribb. Grein Byatt
birtist í dagblaðinu The Times um
helgina.
Byatt hefur grein sína á að lýsa
því yfir að Ísland sé stórkostlegur
staður – með „ofbeldisfullu en óvið-
jafnanlegu roki“ – og að þar gerist
sagan, á níunda áratug 19. aldar.
Söguheiminum er lýst „á snilld-
arlegan og nákvæman hátt, með
meitluðum smáatriðum“, en jafn-
framt séu hlutir og persónur dul-
arfullar og erfitt að negla þær niður.
Í greininni hrósar Byatt ekki bara
skáldinu Sjón, heldur einnig þýðand-
anum, Victoriu Cribb. Segir hún
Sjón vera heppinn að hafa svo góðan
þýðanda að verkinu.
„Sagan þýtur áfram og babl Öbbu
og kómísk ljóðin sem presturinn þyl-
ur meðan hann er grafinn í fönn eru
sterk og áhrifarík,“ skrifar Byatt.
Hún bætir við að flestir lesendur
hrífist af merkingu sem þeir skynja
en geta ekki fangað.
Þýðing Skugga-Baldurs, sem
nefnist Blue Fox upp á ensku, kom
út í sumar hjá forlaginu Telegram á
Englandi. Sjón hlaut bókmennta-
verðlaun Norðurlandaráðs árið 2005
fyrir bókina, sem hefur komið út í
tæplega tuttugu löndum. Í haust er
von á nýrri skáldsögu eftir hann,
Rökkurbýsnir. efi@mbl.is
„Sterk og
áhrifarík“
skáldsaga
AS Byatt hrósar
Skugga-Baldri
Morgunblaðið/Valdís Thor
Sjón Ný skáldsaga á leiðinni.
DJASSKLÚBBURINN Múl-
inn er að hefja sitt tólfta starfs-
ár og verða fyrstu tónleikarnir
á nýjum stað annað kvöld,
fimmtudagskvöld, klukkan 21.
Caffe Rosenberg á Klapparstíg
verður aðsetur Múlans í vetur.
Á haustönn verður boðið upp
á sjö tónleika og koma tvær
hljómsveitir fram á hverju
kvöldi. Á morgun ríða á vaðið
Kvartettinn Skver og Kvartett
Jóels Pálssonar. Skver skipa Helgi Heiðarsson,
Steinar Guðjónsson, Leifur Gunnarsson og Hösk-
uldur Eiríksson. Með Jóel leika þeir Eyþór Gunn-
arsson, Jóhann Ásmundsson og Scott McLemore.
Djass
Múlinn af stað
á nýjum stað
Jóel Pálsson
Í TILEFNI af sýningu mynd-
arinnar Bombaðu það: Al-
þjóðlega graffití heim-
ildamyndin, á Alþjóðlegu
kvikmyndahátíðinni í Reykja-
vík, verða pallborðsumræður í
Ráðhúsi Reykjavíkur klukkan
16 á morgun, 2. október.
Spurt verður að því hvort
veggjakrot sé list eða sjón-
mengun og hvort það eigi að
leyfa það eða banna.
Þátttakendur í pallborðinu verða Jakob Frí-
mann Magnússon, Þórdís Claessen, Ómar Ómar,
Bryndís Björgvinsdóttir og Jon Reiss, leikstjóri
kvikmyndarinnar.
Kvikmyndahátíð
Er veggjakrot list
eða sjónmegnun?
Þórdís Claessen
ÓLÍKIR tónlistarmenn munu
leiða saman hesta sína í Viðeyj-
arstofu annað kvöld, fimmtu-
dagskvöld 2. október.
Þá troða þau upp saman
Kristjana Stefánsdóttir djass-
söngkona og Svavar Knútur
trúbador. Þau hafa bæði notið
hylli, hvort á sínu sviði tónlist-
arinnar, á liðnum misserum. Í
fréttatilkynningu segir að
þetta sé viðburður sem enginn unnandi góðrar
tónlistar megi missa af.
Siglt verður frá Skarfabakka kl. 19.45 og öllum
skilað í land kl. 22. Þá verður hægt að njóta veit-
inga í Viðey.
Tónlist
Kristjana og Svav-
ar Knútur í Viðey
Svavar Knútur
Eftir Einar Fal Ingólfsson
efi@mbl.is
„ÉG lagði til að vaxtakippurinn sem
sýningarrýmið tekur nú, eftir að
hafa verið starfrækt á farsælan hátt
í fjögur ár, fælist meðal annars í því
að sýna aðallega verk erlendra lista-
manna,“ segir Birta Guðjónsdóttir,
sýningarstjóri og myndlistarmaður,
sem er orðinn listrænn stjórnandi
sýningarýmisins 101 Projects að
Hverfisgötu 18 B. 101 Projects verð-
ur rekið í sama rými og 101 Gallery
hefur verið í þessi ár.
„Ég hef lengi haft hug á að vinna
með ákveðnum erlendum listamönn-
um, fólki sem ég hef séð sýningar
eftir og hafa haft áhrif á mig. Ég vil
gjarnan miðla því áfram.“
Birta segir að þær Ingibjörg S.
Pálmadóttir, eigandi rýmisins, og
Kolbrún Víðisdóttir, fram-
kvæmdastjóri 101 Hótels og 101
Projects, hafi velt á milli sín hug-
myndum um stefnuna.
Í alþjóðlegri samræðu
„Við veltum fyrir okkur hvaða sér-
stöðu rýmið ætti að hafa. Síðustu ár
starfaði ég í Samtímalistasafninu
Safni og var svo heppin að vinna þar
með ýmsum stórlöxum í erlendu
myndlistinni, og vera í talsverðum
tengslum við alþjóðlegu senuna. Í
starfi mínu sem sjálfstæður sýning-
arstjóri byggi ég á þeim tengslum og
hef lagt mig markvisst eftir því að
taka þátt í samstarfi og samræðu við
alþjóðlega sýningarstjóra og lista-
menn og byggi á því.“
„Projects“ í nafninu vísar til þess
að sýningarrýmið muni standa fyrir
ýmiss konar starfsemi, oftast hefð-
bundnum sýningum en inn á milli
óhefðbundnari verkefnum.
„Sýningarrýmið er við Hverf-
isgötuna, þar sem er að finna miklar
andstæður; við götuna má sjá eins
konar þverskurð íslensks samfélags
í dag, á margvíslegan hátt. Í rýminu
hef ég áhuga á að sýningar fjalli og
kommenteri á þessa breidd – sjálfs-
mynd þjóðar. Ekki bara íslensku
þjóðarinnar heldur þjóðarsjálfs-
mynd almennt. Ég fókusera því
nokkuð á samstarf við listamenn
sem hafa unnið út frá því efni,“ segir
Birta.
Birta Guðjónsdóttir hefur verið ráðin listrænn stjórnandi rýmisins 101 Projects
Sjálfsmynd þjóð-
anna í myndlist
Morgunblaðið/Valdís
Sýningastjórinn „Ég hef markvisst lagt mig eftir því að vera í samræðu við
ýmsa sýningarstjóra og listamenn og leita til þeirra,“ segir Birta.
Í HNOTSKURN
» Fyrsta sýningin í 101 Proj-ects opnar 16. október. Er
það sýning hinnar ísraelsk/
bandarísku Tamy Ben-Tor.
» Boðið verður upp á fram-sækna, alþjóðlega sam-
tímalist í 101 Projects.
» Síðustu fjögur ár hafa um 30valdir listamenn haldið sýn-
ingar í forveranum, 101 Gallery.
HVAÐ gera Parísarbúar þegar
risastórt líkhús borgarinnar er af-
lagt? Breyta því í listamiðstöð.
Síðar í mánuðinum opnar í París
miðstöðin Centquatre í 19. hverfi
borgarinnar. Þarna er 40.000 fer-
metra rými í byggingum sem
reistar voru á síðari hluta 19. ald-
ar. Síðustu árin hefur verið unnið
að endurbótum á byggingunum og
þau löguð að framtíðarhlutverk-
inu, sem marghliða listamiðstöð og
vinnustofur skapandi listafólks.
Gert er ráð fyrir því að að jafn-
aði vinni um 200 listamenn í stofn-
uninni, í þrjá til tíu mánuði hver, í
vinnustofum sem henta listsköpun
þeirra. Centquatre er sagður vera
staður til að skapa og hver lista-
maður á að hafa aðgang að þeirri
tæknilegu aðstoð sem hann þarfn-
ast, innan skapandi samfélags sem
styður við hann.
Listamennirnir munu ekki búa
innan stofnunarinnar heldur í
íbúðum í nánasta umhverfi.
Listamennirnir eru skyldugir til
að opna vinnustofur sínar reglu-
lega fyrir almenningi og útskýra
við hvað þeir eru að fást.
Starfsmenn Centquatre verða
60. Í stofnuninni eru tveir marg-
nota salir með sviði og fjöldi ann-
arra sýningarrýma. Gert er ráð
fyrir að allt að 5.000 gestir geti
sótt Centquatre heim á sama tíma
en gert er ráð fyrir því að um
75.000 komi árlega.
Ekki á einungis að sýna listina,
heldur eru einnig leigð út versl-
unarrými.
Grunnhugmyndin er samruni og
samþætting rýma þar sem sköpun
fer fram og gestir koma inn af
götunni. Markmiðið er að auka
samskipti almennings og skapandi
samtímalistamanna og auka skiln-
ing um leið. Stofnunin verður því
opin listamönnum úr öllum grein-
um: myndlistarmönnum, sviðs-
listafólki, hverskyns hönnuðum,
rithöfundum og fólki í stafrænni
sköpun. Allir geta sótt um, fransk-
ir ríkisborgarar sem fólk frá öðr-
um löndum.
Listaháskólar hafa sýnt áhuga á
að hluti af náminu fari fram innan
veggja gamla líkhússins.
efi@mbl.is
Líkhús verður menningarmiðstöð
Ljósmynd/Edouard Caupeil
Stórhýsi Listamiðstöðin Centquatre er í byggingum frá 19. öld, í 19. hverfi Parísarborgar.
Centquatre í París mun hýsa um 200
listamenn og hverskyns uppákomur
Auðvitað kemur þetta
aldrei fyrir afburða
soðgreifa eins og mæður
okkar …38
»