Fréttablaðið - 20.08.2010, Blaðsíða 16

16 20. ágúst 2010 FÖSTUDAGUR
FRÉTTASKÝRING: Hvað er að gerast í Helgafellslandi?
Gert var ráð fyrir stórri
íbúðabyggð í frjósömu
landbúnaðarlandi ofan við
Álafosskvosina fyrir fjór-
um árum. Nú er þar búið í
þremur nýjum húsum og
einni blokk. Köngulóarvefir
hanga í nokkrum auðum
húsum. Slysahætta fyrir
börn, segja íbúar sem aka
fram hjá grunnum húsa á
hverjum degi. Fyrirtæk-
ið sem sá um skipulag og
sölu lóða á svæðinu á nú í
viðræðum við lánardrottin.
Jón Aðalsteinn Bergsveins-
son fór með Gunnari V.
Andréssyni ljósmyndara
um hverfið.
Það er kyrrð og ró yfir Helgafells-
landinu í Mosfellsbæ enda umferð
nær engin. Maríuerlur fljúga
óáreittar hjá mannlausum húsum
í sólinni við götur nefndar eftir
bókum og sögupersónum úr skáld-
verkum Halldórs Laxness.
Fyrir tæpum fimm árum und-
irrituðu bæjaryfirvöld í Mosfells-
bæ og hópur landeigenda viljayfir-
lýsingu um að ganga til samninga
um uppbyggingu hverfisins. Þar
eru lóðir fyrir 1.020 íbúðaeining-
ar: 560 í sérbýli og 460 í fjölbýli
auk raðhúsa og annars konar húsa
í skjóli vinda undir suðurhlíðum
Helgafells. Þar var gert ráð fyrir
tveimur leikskólum, grunnskóla
og þjónustubyggingum. Í dag eru
risin nokkur hús. Íbúar telja búið
í þremur húsum auk blokkarinn-
ar í efri byggð. Þar eru 24 íbúð-
ir með fimmtán auðum íbúðum.
Nær Álafosskvosinni, við malbik-
aðar götur, standa nokkur fokheld
hús einmana við hlið geysistórra
opinna grunna. Köngulóarvefir
í ryðguðum krönum benda til að
langt er síðan þeir lyftu síðustu
kílóunum.
Rúður eru brotnar í nokkrum
húsanna og dyragættir tómar svo
ganga má óhindrað inn í þau. Þetta
er spennnandi vettvangur fyrir
börn. En hættur eru á hverju strái;
glerbrot, naglar og spýtnabrak á
víð og dreif og opið milli hæða.
Eina sjáanlega þjónustan er leik-
skóli. Hann virðist fullbúinn með
leiktækjum á lóðinni. Á milli leik-
tækja leynast brotin rör og raf-
magnsvírar. Leikskólinn hefur
verið mannlaus um skeið og er
unnið að niðurrifi hans. Fyrirhug-
að var að reisa grunnskólann á lóð-
inni. Óvíst er hvort sú bygging rís
á næstu árum.
Jóhanna Björg Hansen, fram-
kvæmdastjóri umhverfissviðs
Mosfellsbæjar, sagði í samtali við
Fréttablaðið á dögunum bæjaryfir-
völd hafa þrýst á Helgafellsbygg-
ingar, sem skipulögðu svæðið og
seldu lóðirnar, að ljúka verkunum.
Fyrirtækið hafi lofað að ljúka frá-
gangi í sumar.
„Samningar við fyrirtækið eru
í uppnámi og það er í raun ekkert
hægt að gera af hálfu bæjarins í
þessu máli annað en að þrýsta á
þá,“ segir Jóhanna.
Jón Guðni Sandholt, stjórnarfor-
maður Helgafellsbygginga, segir
lítið hægt að gera. Viðræður hafi
staðið yfir á milli bæjaryfirvalda
og Helgafellsbygginga. Sömuleiðis
hafi því verið beint til eigenda lóð-
anna að loka grunnum og byrgja
fyrir hættur. „Það er á valdi þeirra
sem eiga lóðirnar að gera þetta,“
segir hann en bendir á að nokkr-
ir lóðaeigendur hafi komið illa út
úr hruninu og séu ófærir um nokk-
urn hlut.
Nokkrir, svo sem verktakafyr-
irtækið Pálmatré sem reisti einu
blokkina á svæðinu, hafa skilað
góðum frágangi, að sögn íbúa.
Sala á lóðum í landi Helgafells
hófst árið 2006 og var gert ráð
fyrir að framkvæmdum lyki á
áratug.
Jón segir að miðað við ástandið
megi reikna með að verklok frest-
ist. „Það gekk vel að selja lóðirn-
ar, sérstaklega fjölbýlishúsalóðir.
En þegar allt hrundi hættu lóðir að
seljast og síðan þá hefur allt verið
í kyrrstöðu. Við munum væntan-
lega sjá fyrir endann á þessu í
fyrsta lagi árið 2020,“ segir hann
en reiknar með að breyta þurfi
skipulagi á svæðinu. „Árið 2007
byggði enginn neitt undir hundr-
að fermetra íbúðum. Ég held að því
þurfi að breyta, minnka íbúðirnar
og húsin líka. Þannig séð var hrun-
ið af hinu góða. Það fékk menn til
að slaka á og hætta að reyna að
gleypa heiminn.“
Helgafellsbyggingar skulduðu
tæpa ellefu milljarða króna í lok
árs 2008 samkvæmt ársreikningi.
Hluti þess er í erlendri mynt. Jón
segir gengishrunið gefa skakka
mynd af stöðu mála auk þess sem
greitt hafi verið inn á lánin við
sölu lóða. Hann telur skuldina nær
þremur milljörðum í dag. Viðræð-
ur standa nú yfir á milli Lands-
bankans, sem er eini kröfuhafi
félagsins, um greiðslu lánsins.
Taktu þátt í ljósmyndasamkeppni.
Deildu þínum bestu myndum með
okkur og þú átt möguleika á glæsi-
legum verðlaunum.
Skilafrestur til 21. ágúst 2010.
Allar nánari upplýsingar á visir.is.
Ljósmyndasamkeppni Panasonic og Vísis
SÝNDU ÞÍNAR
BESTU HLIÐAR
Þú færð Fréttablaðið á kostnaðarverði
á 90 stöðum um land allt.
Nánari upplýsingar á
visir.is/dreifing
Engin paradísarheimt undir Helgafelli
„Þetta er fallegasta hverfið í Mosfellsbæ. En við höfum
verið að berjast fyrir ýmsu. Það hefur verið erfitt,“ segir
Auður Björk Þórðardóttir, grunnskólakennari og íbúi í
eina húsinu við Snæfríðargötu. Hún hefur fengið þau
svör hjá bæjaryfirvöldum í Mosfellsbæ að Helgafells-
byggingar eigi að sjá um framkvæmdirnar. Auður og
fjölskylda hennar fluttu inn um síðustu páska.
Þrátt fyrir fallegt og rólegt umhverfi gagnrýnir Auður
að áætlanir um skipulagningu Helgafellslandsins hafi
ekki staðist. Á vetrum eru götur aðeins mokaðar upp
tengibrautina og að Auganu svokallaða, sem liggur fyrir
miðju svæðsins, en ekki að húsum sem við þær standa.
Þá hafi götur ekki verið merktar og þær ekki inni í GPS-
kerfi lögreglunnar. Í ofanálag þurfti Auður að hringja í
Orkuveitu Reykjavíkur til að fá ljósastæði í ljósastaurana.
Þau komu hálfum mánuði síðar. Þá blæs ryk inn í húsið
af námum sem gerðar voru við framkvæmdir á svæðinu.
Verst er ástandið þegar vindar blása úr Skammadal. „Við
höfum beðið um að þeim verði lokað,“ segir hún.
Þá þykir Auði slæmt að Helgafellsskóli muni ekki rísa í
bráð líkt og stefnt var að. Fyrirhugað var að hann opnaði
í fyrrahaust. Þegar Viktori Elí, tíu ára syni hennar, er ekki
ekið í Varmárskóla þarf hann að fara ótroðna slóða og
yfir óbrúaðan læk til að taka skólarútuna við Reykjalund.
Verst þykir henni þó að opnar byggingar og grunnar
eru á svæðinu sem börn leiki sér í. „Það er stórhættu-
legt,“ segir Auður. „Það mætti alveg huga að því að hér
býr fólk.“
Þarf að berjast fyrir tilverunni
Varmársamtökin, Íbúa- og umhverfissamtök í Mosfellsbæ, voru sett á
laggirnar um það leyti sem framkvæmdir hófust í Helgafellslandinu og mót-
mæltu þau harðlega þegar greinargerð um skipulag á svæðinu lá fyrir um
mitt ár 2006. Rökin gegn framkvæmdum voru meðal annars þau að landið
væri frjósamasta landbúnaðarlandið á höfuðborgarsvæðinu. Við fram-
kvæmdirnar voru klappir á svæðinu sprengdar, efnið notað í vegalagningu
og jarðveginum ekið á brott. Þá var aur hleypt í Skammadalslæk sem liggur
neðst í landinu við Álafosskvosina. Við það köfnuðu fiskar og lífríki raskaðist
í læknum. Varmársamtökin mótmæltu jafnframt lagningu tengibrautar inn í
Helgafellslandið úr Álafosskvosinni. Samtökin sögðu áhrif tengibrautarinnar
munu hafa afar neikvæð áhrif á ásýnd, umhverfi og íbúabyggð við Álafoss
auk þess sem gatnamótin yllu íbúum áhyggjum vegna stóraukinnar slysa-
hættu. Tengibrautin gengur nú upp úr kvosinni og inn í Helgafellslandið.
Framkvæmdir í landbúnaðarlandi
VELKOMIN! Gestir eru boðnir velkomnir í Helgafellslandið þegar ekið er upp tengi-
brautina úr Álafosskvosinni. FRÉTTABLAÐIÐ/GVA
HÆTTUFÖR Í SÖLKUGÖTU Langt virðist síðan unnið var við raðhúsin í Sölkugötu.
Húsin standa öllum opin. Stigaopin eru varasöm. Þarna leika börn sér oft.
FRÉTTABLAÐIÐ/GVA
AUÐUR OG VIKTOR Eina húsið sem stendur við Snæfríð-
argötu ber nafn með rentu: Húsið á sléttunni. Fjölskyldan
hefur þurft að berjast fyrir umbótum á svæðinu.
FRÉTTABLAÐIÐ/GVA
Jón Aðalsteinn
Bergsveinsson
jab@frettabladid.is