Morgunblaðið - 22.01.2009, Page 22

22 Daglegt líf
MORGUNBLAÐIÐ FIMMTUDAGUR 22. JANÚAR 2009
Arnaldur Bárðarson, prestur í Glerárkirkju,
íhugaði að sækja um Laufásprestakall en
hætti við. Þetta staðfesti hann í samtali við
Morgunblaðið. Arnaldur þjónaði á sínum tíma
á Hálsi í Fnjóskadal, þekkir því vel til á svæð-
inu og segist hafa sterkar taugar til sóknar-
barnanna austur í sveit.
  
Séra Arnald langaði að verða sveitaprestur
aftur og var reyndar búinn að ganga frá um-
sókn. En hann segist líka orðinn nokkuð rót-
fastur í heimabænum, Akureyri, og segist hafa
fundið fyrir miklum velvilja í sinn garð í Gler-
árskókn þegar áhugi hans á Laufási spurðist
út. Hvatningin hafi verið ólíkt meiri að vera en
fara og niðurstaðan því verið sú, að vel athug-
uðu máli, að vera kyrr.
  
Málefni Sjúkrahússins á Akureyri (FSA) voru
rædd á fundi bæjarstjórnar í fyrradag að
beiðni bæjarfulltrúa Vinstra grænna. Kristín
Sigfúsdóttir, bæjarfulltrúi VG, var með tilbúna
harðorða bókun, en síðan var samin önnur
mildari sem samþykkt var samhljóða.
  
Bæjarstjórn lýsti yfir áhyggjum, í bókuninni,
af afleiðingum skertrar þjónustu á sviði end-
urhæfingar og öldrunarlækninga og á dag-
deild geðdeildar og „áréttar mikilvægi þess að
stofnanir ríkis og bæjar á sviði heilbrigðismála
eigi með sér reglulegt og gott samráð“.
  
Jafnramt tók bæjarstjórn undir sjónarmið
sem fram koma í bókunum félagsmálaráðs og
samfélags- og mannréttindaráðs á dögunum
en þar var lýst áhyggjum „af því langa rofi í
geðheilbrigðisþjónustu sem verður með lokun
dagdeildar geðdeildar Sjúkrahússins á Akur-
eyri. Æskilegt hefði verið að samráð hefði ver-
ið haft við Akureyrarbæ þar sem allstór hluti
þjónustuþega nýtir einnig þjónustu bæjarins.
Mikilvægt er að allt sé gert til að tryggja lág-
marksþjónustu við umræddan hóp.“
  
Hópur fólks kom saman á Ráðhústorginu í
fyrrakvöld, til að sýna mótmælendum á Aust-
urvelli samstöðu. Trommur og pottlok voru
barin, blásið í flautur og fólk tók lagið. Fundur
var svo haldinn síðdegis í gær þar sem um 200
manns mættu.
  
Mjög góðar aðstæður eru nú til skíðaiðkunar í
Hlíðarfjalli og ákveðið hefur verið að hafa
ókeypis í allar skíðalyftur á svæðinu um næstu
helgi, bæði á laugardag og sunnudag. Opið er
frá klukkan tíu til fjögur, báða dagana.
  
Guðmundur Karl Jónsson, forstöðumaður
skíðasvæðisins í Hlíðarfjalli, segir að aðstæður
hafi gjörbreyst eftir að snjóframleiðsla hófst á
svæðinu fyrir nokkrum árum. Sífellt fjölgar
þeim dögum sem svæðið er opið; nú þegar hef-
ur verið opið 61 dag frá því 1. nóvember.
  
Óvíst er um framtíð sjónvarpsstöðvarinnar N4
og raunveruleg hætta virðist á að stöðin hætti
jafnvel útsendingum. Uppsagnir starfsmanna
taka gildi um næstu mánaðamót.
  
Handboltinn byrjar að skoppa á ný í N1-deild
karla í kvöld, eftir langt jólafrí. Akureyri tekur
á móti liði Víkings í Íþróttahöllinni kl. 19.30 og
það vekur athygli að ókeypis er á leikinn. KEA
hefur ákveðið að bjóða öllum sem vilja að koma
og horfa á.
  
Boðið verður upp á tónlistaratriði fyrir hand-
boltaleikinn, eins og alltaf þegar Akureyri lék
á heimavelli fyrir jól – og reyndar einnig í hálf-
leik núna. Það er stórsveit Tónlistarskólans á
Akureyri sem treður upp, en hún þótti fara á
kostum á jólatónleikum sem skólinn hélt
ásamt Leikfélagi Akureyrar um daginn.
  
Dýrleif Bjarnadóttir píanókennari lauk störf-
um við Tónlistarskólann á Akureyri á dög-
unum og hafði þá starfað við skólann í 44 ár.
„Tónlistarskólinn á Akureyri hefur notið góðs
af frábæru frumkvæði Dýrleifar í gegn um tíð-
ina og kann starfsfólk skólans henni mikla
þökk fyrir frábært samstarf síðustu áratug-
ina,“ segir á heimasíðunni.
  
Ég trúi bara ekki að þetta sé satt, segir
menntaskólakennarinn Sverrir Páll Erlends-
son á bloggsíðu sinni um það að bæjarfélagið
ætli að spara með því að hætta að hita upp og
lýsa sparkvellina við grunnskóla bæjarins.
  
Sverrir Páll segir að í ljósi slæms ástands í
þjóðfélaginu sé talað um nauðsyn þess að gefa
fólki kost á heilbrigðum viðfangsefnum eins og
námi og líkamsrækt en nú sé komið í veg fyrir
að fólk geti nýtt sér íþróttaaðstöðuna við
skólana. Það finnst honum skrýtið.
  
Sundlaugin á Þelamörk hefur verið opnuð á ný
eftir miklar endurbætur með nýju gufubaði,
pottum og tilheyrandi. Best að dusta rykið af
heitapottsskýlunni …
  
Leikararnir Halli og Gói troða upp á Græna
hattinum á laugardagskvöldið og flytja end-
urbætta útgáfu á dagskránni Lögin úr leikhús-
inu. Með þeim leika sem fyrr Ingvi Rafn
Ingvason, Hallgrímur Ingvason, Stefán Ing-
ólfsson og Arnór Vilbergsson.
Morgunblaðið/Skapti Hallgrímsson
Myndarleg Jónas Viðar myndlistarmaður mætti með flott skilti á fundinn á Ráðhústorgi í gær.
Ingibjörg Sólrún Gísladóttir, Davíð Oddsson og Geir Hilmar Haarde voru með í för.
AKUREYRI
Skapti Hallgrímsson
Eftir Helga Bjarnason
helgi@mbl.is
Þ
að er tilviljun að ég er
hér. Þegar ég sá starfið
hjá Vör auglýst í byrjun
árs 2006 var ég hér
heima á milli starfa í
Bandaríkjunum. Þrátt fyrir það sótti
ég um. Það lýsir mér svolítið að ég
hef áhuga á mörgum rannsókn-
arsviðum innan líffræðinnar og hef
gjarnan gripið gæsina þegar hún
hefur gefist,“ segir Erla Björk Örn-
ólfsdóttir, forstöðumaður Varar
sjávarrannsóknaseturs við Breiða-
fjörð.
Sjávarrannsóknasetrið er með að-
setur í Ólafsvík og hefur verið að
byggjast upp hægt og bítandi. Þar
eru nú fimm starfsmenn, auk Erlu;
sjávarútvegsfræðingur, tveir mast-
ersnemar í líffræði við Háskóla Ís-
lands og tveir rannsóknarmenn.
Erla gerir sér vonir um að sá sjöundi
bætist við á þessu ári. Vör er alger-
lega fjármögnuð með rannsókna-
styrkjum og öðrum styrkjum frá
fyrirtækjum og ríkinu og hefur orðið
ágætlega ágengt í starfi sínu.
„Starf mitt hér er mjög fjölbreytt.
Þegar ég lít í baksýnisspegilinn sé
ég að það hefur verið einstakt tæki-
færi fyrir mig, að fá þetta starf,“
segir hún.
Skilja samhengi hlutanna
Frá upphafi hafa Erla Björk og
samstarfsfólk hennar hjá Vör lagt
alla sína krafta í að rannsaka vist-
kerfi Breiðafjarðar frá grunni, það
er að segja svifþörungana og eðlis-
og efnafræðilegt umhverfi þeirra.
Efnamælingar á sjó eru unnar í
samstarfi við Sólveigu Ólafsdóttur
hjá Hafrannsóknastofnuninni. Síðan
hefur dýrasvif bæst við. „Þetta er
grunnurinn fyrir rannsóknum sem
tengjast nýtingu sjávarfangs á arð-
bæran hátt. Það er lokatakmarkið,“
segir Erla og skýrir þetta nánar:
„Við erum að byrja frá grunni
vegna þess að þekking á svifþör-
ungum og dýrasvifi í Breiðafirði er
takmörkuð. Mér fannst því skyn-
samlegast að byrja á því. Síðan má
prjóna aðra hluti við. Ég tel að
stefna eigi að því að þekkja fæðuvef-
inn í Breiðafirði í heild sinni. Það má
til dæmis gera með því að setja upp
tölvulíkan þar sem allir lykilþættir
lífríkisins eru settir inn, hver étur
hvern og svo framvegis. Þegar lík-
anið er fullgert má svo taka út ein-
staka þætti og skilja samhengi hlut-
anna. Þá má reyna að svara
spurningum um það hvað ræður því
hvaða tegundir eru hér, hversu mik-
ið af þeim og hvernig skynsamlegast
er að nýta þær. Ég verð sátt ef ég
næ þessu,“ segir Erla Björk.
Grunnrannsóknir af þessu tagi
taka langan tíma því að breytileiki
lífríkis og umhverfis er mikill frá ári
til árs, eins og best sést í veðurfari.
Vör er á sínu þriðja rannsóknarári.
„Heimamenn göptu þegar ég sagði
þeim að í mínum huga væru lang-
tímarannsóknir tveggja til þriggja
áratuga vinna,“ segir hún. Á þessu
ári kynna starfsmenn Varar raunar
frumniðurstöður fyrstu rannsókna-
verkefna sinna.
Samhliða grunnrannsóknunum
vinnur Vör að þjónustu við fyrir-
tæki. Helsta verkefnið á því sviði er
rannsókn á beitukóngi í Breiðafirði.
Ýtir undir áhuga á náttúrunni
Vör var stofnuð af sveitarfélögum,
fyrirtækjum og samtökum sjávar-
útvegsins, ekki síst í Snæfellsbæ og
Grundarfirði, og Háskóla Íslands.
„Það skiptir máli að hafa þekking-
arsetur á landsbyggðinni, meðal
annars vegna þess að þar er vís-
indafólkið nær rannsóknarefninu,
við fáum aðra sýn á verkefnið. Það
er líka kostur að við sem vinnum í
litlum þekkingarsetrum á lands-
byggðinni þurfum að leita samstarfs
við aðrar stofnanir um ýmsa hluti og
erum þess vegna meðvituð um smæð
okkar. Staðsetningin skiptir einnig
máli fyrir fólkið á stöðunum.
Ég hef og ætla að vinna þannig að
það sé auðveldara fyrir fólk á Vest-
urlandi að nálgast upplýsingar og
komast í tæri við sjóinn. Ég vil miðla
þeirri þekkingu um náttúruna sem
ég hef aflað mér. Grúsk er skemmti-
legt. Ég vil ýta undir áhuga barna og
unglinga á náttúrunni,“ segir Erla.
Tvíeflist við viðurkenningar
Vör fékk viðurkenningu sem
frumkvöðull ársins á Vesturlandi
2007 og Erla Björk var valin Vest-
lendingur ársins 2008 af héraðs-
fréttablaðinu Skessuhorni. Hún
reynir ekkert að fela það að henni
þykja viðurkenningar úr samfélag-
inu á Vesturlandi góðar. „Þetta er
klapp á öxlina og það er gaman að
vita af því að einhverjir hafa tekið
eftir því sem við erum að gera og
telja það þess vert að vekja á því at-
hygli.
Ég er svo hégómleg að ég tvíeflist
við þetta, biddu fyrir þér. Ég verð að
gera enn betur en áður til að sýna að
ég er þessarar viðurkenningar verð.
Það hafa margir samglaðst mér en
skemmtilegastar eru kveðjur frá
skólasystkinum mínum úr barna-
skóla í Borgarfirði. Ein skólasystir
sagði að gaman væri að sjá að ég
hefði farið í langskólanám og komið
til baka. Ég vil gjarnan láta nota mig
sem slíka grýlu, ef það verður til
þess að fleiri sjái að það er einhvers
virði að fara í nám,“ segir Erla Björk
Örnólfsdóttir.
Reynir að skilja fæðuvefinn
 Vör sjávarrannsóknasetur vinnur að grunnrannsóknum á lífríki Breiðafjarðar  Erla Björk
Örnólfsdóttir forstöðumaður kynnir fyrstu niðurstöður í ár  Aðrir þættir verða prjónaðir við
Morgunblaðið/RAX
Rannsóknir Erla Björk Örnólfsdóttir heldur sínu striki við uppbyggingu rannsókna á lífríki Breiðafjarðar. Mark-
miðið er að kortleggja fæðuvef fjarðarins og byggja skynsamlega nýtingu auðlindarinnar á þeim upplýsingum.
Í HNOTSKURN
»Erla Björk Örnólfsdóttirer 42 ára, fædd og alin upp
í Borgarfirði.
»Hún lauk mastersprófi ílíffræði frá Háskóla Ís-
lands árið 1994 og dokt-
orsprófi í sjárvarlíffræði frá
Texas A&M University í
Bandaríkjunum árið 2002.
»Erla Björk hefur verið for-stöðumaður Varar sjáv-
arrannsóknaseturs frá stofn-
un, 2006. Áður starfaði hún í
Bandaríkjunum við rann-
sóknir á samfélögum svifþör-
unga og veira er þá sýkja. Þá
starfaði hún um tíma á Veiði-
málastofnun.