Saga - 1988, Side 288

286
RITFREGNIR
ingu: Nöfn eru mestan part rituð með eðlilegum rithætti vorra daga nema í
beinum tilvitnunum." (Bls. 9.) Ekki veit ég hvort flokkast undir sérvisku þar
sem ritað er þjenari (bls. 63) og firrtist (bls. 67) en ekki þénari og fyrtist. Égfinn
ekki að neinu af þessu en hins vegar hefði ég kosið myndina Haukdæll fyrir
Haukdæli (nf. et.) enda er ritað Haukdælnum (þgf. et., sjá t.d. bls. 53 og 58). Ég
hef hvorki borið tilvísanir né orðréttar tilvitnanir kerfisbundið saman við
heimildir - enda ekki rekist á neitt grunsamlegt.
1 formála getur Jón Thor þess að ritgerðin hafi verið lögð fram á norsku til
lokaprófs („lektorsprófs") í Oslóarháskóla vormisserið 1982 og ritar: „Af
þessu leiðir, að ritgerðin ber þess víst ærin merki að vera samin fyrir
Norðmenn." (Bls. 6.) Ekki finnst mér hún bera ærin merki þessa en þó má
rekast á dæmi eins og „. . . ungur íslenzkur sagnfræðingur, Helgi Porláks-
son . . ." (bls. 63).
Einn helsti kostur bókarinnar er að hún er mjög læsileg. Jón Thor er laus
við kyrkingslegan fræðimannsstíl og hefur yndi af að bregða fyrir sig hnyttn-
um líkingum og tekur slíkar líkingar upp eftir öðrum þar sem þær er að finna
og við á, samanber á bls. 66 „eins og Einar Ólafur Sveinsson orðar það hnytti-
lega". Stundum jaðrar við að of langt sé gengið, t.d. þegar áreitni Sæmundar
Jónssonar við Sigurð Ormsson austur á Svínafelli er talin geta verið afleiðing
af „Drang nach Osten" eða „austursókn". (Bls. 46.) En annars held ég að lík-
ingamar séu jafnan vel til fundnar og bæti framsetninguna og mér finnst
ýmsir geta lært af Jóni Thor í þessu efni.
Áður en umsögn mín verður lengri en bókin sem ég segi frá, vil ég þakka
Jóni Thor fyrir skemmtilega lesningu og ágæta gagnrýni á eldri skrif um
Oddaverja.
Helgi Þorláksson