Bændablaðið - 09.08.2012, Blaðsíða 2

Bændablaðið | Fimmtudagur 9. ágúst 20122
Fréttir
„Það er ljóst að veiðin í sumar er
langt undir væntingum og á það
sérstaklega við um þær laxveiðiár
sem við köllum sjálfbærar veiðiár.
Á hinn bóginn er veiðin í Rangánum
og hliðarám í góðu meðallagi,“
segir Óðinn Sigþórsson, formaður
Landssambands veiðifélaga.
„Smálaxinn mætti óvenju snemma
og að öllu jöfnu er
það vísbending
um sterkar göngur
en sú varð ekki
raunin. Sá smálax
sem við sáum í júlí
var bæði smár og
illa haldinn – og
það var mjög lítið
af honum. Við
höfum séð þetta
gerast áður t.d. árið
1980 en þá var var stórlaxastofninn
sterkari og bætti upp veiðina. Nú hefur
verið lítið af 2ja ára laxi í ánum mörg
undanfarin ár og því ljóst að veiðin
byggir aðallega á smálaxi. Það var
alltaf vitað að lítið af smálaxi myndi
verða ávísun á lélegt veiðisumar. Ég
held að vatnsleysi verði ekki alfarið
kennt um þetta ástand nú þar sem
nokkuð er liðið á veiðitímann.“
Óðinn segir að erfitt sé að taka
úr ár í þessu sambandi en þó megi
segja að Borgarfjarðarárnar hafi
verið mjög slakar og svo margar ár
í Húnavatnssýslum. „Á hinn bóg-
inn standa ár á Norðausturlandi sig
nokkuð vel s.s. Hofsá og sérstaklega
Selá sem hefur verið á mikilli uppleið
undanfarin ár.“
Á ekki von á lækkun
Óðinn á ekkert sérstaklega von á að
veiðin í sumar hafi nein bein áhrif á
leiguverðið fyrir árnar strax. „Víðast
hvar eru samningar í gildi og mjög fá
svæði sem losna nú í haust. Hvernig
veiðist eitt sumar spilar ekki stóra rullu
í því sambandi. Þegar veiðin veldur
vonbrigðum fara að sjálfsögðu að
heyrast raddir um lækkun veiðileyfa
en aldrei heyrum við nú að það þurfi
að hækka veiðileyfin þegar veiðin fer
fram úr öllum vonum.
Ef við erum hinsvegar að sigla inn
í lægð hvað veiðina varðar næstu árin
þá er ljóst að slíkt mun að sjálfsögðu
hafa áhrif á eftirspurn eftir stangveiði
þar sem við erum jú í samkeppni við
aðrar þjóðir um stangveiðimenn.“
Hann segir sölu veiðileyfa hafa
verið mjög góða undanfarin ár og
því sé ekki að neita að það byggir að
nokkru á væntingum um góða veiði
í ljósi veiðitalna undanfarin sumur.
/smh
Formaður LV:
Veiðin langt
undir væntingum
Styttist í að sláturtíð hefjist
Þurrkar virðast ekki hafa haft mikil
áhrif á vöxt lamba í sumar
– segir Björn Víkingur Björnsson hjá Fjallalambi
„Við mun slátra hér um 31.000
fjár og ætlum að byrja 12.
september næstkomandi,“
segir Björn Víkingur Björnsson
framkvæmdastjóri hjá Fjallalambi
á Kópaskeri. Starfsmenn verða milli
60 og 70 talsins. „Við erum bara
bjartsýn á haustið. Lömb eru víða
mjög falleg og hefur farið vel fram.
Þurrkar virðast ekki hafa haft mikil
áhrif á vöxt lambanna í sumar,“
segir Björn Víkingur. Hann segir að
enn hafi ekki verið tekin ákvörðun
um forslátrun hjá Fjallalambi en
málið verði skoðað og ákvörðun
tekin um miðjan ágúst.
Sláturfélag Suðurlands, SS,
hefur slátrun miðvikudaginn 22.
ágúst með 800 kindum og 113%
verðhlutfalli fyrir dilka. Slátrað verður
næst miðvikudaginn 29. ágúst 800
kindum og greitt 111% verðhlutfall
fyrir dilka. Samfelld slátrun hefst svo
miðvikudaginn
5. september
með um 800
lömbum á dag og
svo stigvaxandi
í fulla slátrun
í lok 37. viku.
Bætt hefur verið
við sláturviku í
nóvember með
110% verðhlutfalli til að hvetja þá
sem það geta að geyma gimbrar.
Forslátrun hefst hjá Norðlenska á
Húsavík í viku í lok ágúst eða dagana
27. til 31. ágúst, þó með fyrirvara um
að sláturloforð berist. Ekki verður
slátrað með fullum afköstum á
Húsavík fyrr en í fyrstu heilu viku
september.
Forslátrun hefst einnig á Höfn í
sömu viku, hafi sláturloforð borist.
Haustslátrun hefst síðan með fullum
afköstum á Höfn þann 18. september.
Boðið verður upp á sumarslátrun
sauðfjár hjá SAH Afurðum á
Blönduósi nú í ágústmánuði.
Hjá Sláturfélagi Vopnfirðinga
á Vopnafirði hefst slátrun í fyrstu
vikunni í september. /MÞÞ
Bændur í Breiðdal hafa kvartað
undan ágangi hreindýra og á
Stöðvarfirði óttast menn um skóg-
rækt.
Hrafn Baldursson, íbúi á
Stöðvarfirði, viðrar áhyggjur sínar af
ágangi hreindýranna í bréfi sem hann
sendi bæjarráði Fjarðabyggðar nú í
byrjun mánaðarins. „Þar sem verið
er að koma upp lítilsháttar skógrækt
á jörðunum innan við þorpið stefnir
í tjón á henni takist ekki að stemma
stigu við ágangi,“ segir hann. Þar
segist hann hafa séð afleiðingar þess
að hreindýr gangi laus í skógrækt og
leitar eftir viðbrögðum bæjaryfirvalda.
Bent er á að stórar hjarðir hreindýra
hafi haldið til í Breiðdal á liðnum
vetri og því hafi ekki komið á óvart
að fyrsta dýr nýhafins veiðitímabils
hafi einmitt verið fellt á þeim slóðum.
Bændur í Breiðdal eru ekki alls
kostar sáttir við komu dýranna sem
skemma tún og girðingar.
„Hreindýrin hafa skemmt fyrir
okkur trjágróður, það hef ég orðið var
við. Sömuleiðis hafa þau brotið girð-
ingarstaura, slitið niður hlið, slitið vír
og rifið af einangrun. Árs og tveggja
ára gamlar nýræktir eru bara eins og
golfvellir, þær eru nagaðar alveg ofan
í rót,“ sagði Arnaldur Sigurðsson,
bóndi á Hlíðarenda í Breiðdal sagði
í samtali við Bændablaðið í vor að
hreindýr hefðu skemmt trjágróður,
brotið girðingarstraura, slitið niður
hlið, sömuleiðis vír og rifið niður
einangrun. „Árs og tveggja ára
gamlar nýræktir eru bara eins og
golfvellir, þær eru nagaðar alveg
ofan í rót,“ sagði Arnaldur
/MÞÞ
Bændur í Breiðdal kvarta undan ágangi hreindýra
Valda tjóni á túnum, girðingum og í skógrækt
Hreindýr eru aðgangshörð í löndum bænda. Mynd /Ragnhildur Aðalsteinsdóttir
Í næsta Bændablaði verður birt árleg
skrá um helstu fjár- og stóðréttir í
landinu. Sveitarstjórar oddvitar,
fjallskilastjórar og aðrir sem geta gefið
öruggar upplýsingar um réttardaga
í haust eru vinsamlegast beðnir að
senda þær til Ólafs R. Dýrmundssonar
ráðunautar (ord@bondi.is) og Freys
Rögnvaldssonar blaðamanns (fr@
bondi.is), sími 563-0300, sem allra
fyrst og eigi síðar en þriðjudag 21.
ágúst nk. Bændasamtökunum berast
stöðugt fyrirspurnir um göngur og
réttir, m.a. frá innlendum og erlendum
aðilum í ferðaþjónustu, auk þess sem
margir þéttbýlisbúar leita eftir þessum
upplýsingum þegar líður að hausti
því að réttarferðir njóta alltaf mikilla
vinsælda.
Réttardagar í haust
Norrænn ráðherrafundur:
Norðurlönd í fararbroddi um öryggi matvæla
Landbúnaðarráðherrar á Norður -
lönd unum komu saman til fundar
í Þrándheimi í Noregi snemma í
júlí sl. Á fundinum var m.a. fjallað
um eftirlit með gæðum matvæla í
milliríkjaviðskiptum og mikilvægi
þess að þar sé öllum opinberum
stöðlum framfylgt. Þá var
fjallað um vistvæna framleiðslu
búvara og ályktanir sem gerðar
voru á Ríó+20ráðstefnunni
um sjálfbæran landbúnað en
hún var haldin í framhaldi
af alþjóðaráðstefnu í
Kaupmannahöfn fyrir 20 árum
um sama efni.
Fundinn sat einnig Ann Tutwiller,
staðgengill framkvæmdastjóra FAO
(Matvæla- og landbúnaðarstofnunar
Sameinuðu þjóðanna), en hún
flutti fundinum þakkir FAO fyrir
hlut Norðurlandanna í því að halda
uppi öryggi í viðskiptum með
matvæli. Einnig vakti hún athygli
á hlut Norðurlanda í því að auka
samstarf landbúnaðar, fiskveiða og
skógræktar í því skyni að styrkja
matvælaöryggi á alþjóðavísu.
Landbúnaðar ráðher ra rn i r
af greiddu á fundinum svokallaða
„Niðarósyfirlýsingu“, sem hnykkir
á mikilvægi frumframleiðslu-
og úrvinnslugreina fyrir
framgang umhverfisvænnar
matvælaframleiðslu en Niðarós er
eldra nafn á Þrándheimi.
Fullvinnsla landbúnaðarafurða
Ráðherrarnir kölluðu einnig eftir
fleiri vel reknum fyrirtækjum og
störfum til að vinna enn frekar úr
afurðum landbúnaðarins og sinna
þjónustu sem frumframleiðslan
skapar. Þar má nefna bindingu
koltvísýrings, endurvinnslu á
næringarefnum úr landbúnaði
og þjónustu á sviði velferðar og
endurhæfingar. Verðmætasköpunin
á að byggjast á hollustu matvæla og
staðbundnum matarhefðum, m.a.
samstarfsverkefninu Nýr norrænn
matur.
Í tengslum við fundinn
kynntu fundarmenn sér skógrækt
í sveitarfélaginu Levanger í
Þrændalögum þar sem þeir
gróðursettu trjáplöntur til að bæta,
a.m.k. á táknrænan hátt, fyrir þau
gróðurhúsaáhrif sem fundur þeirra
hafði valdið.
Landbúnaðarráðherrar á
Norðurlöndunum koma saman
til fundar ár hvert. Norræna
ráðherranefndin (Nordiska
ministerrådet), sem hefur aðsetur í
Kaupmannahöfn, tekur við.
Norrænir landbúnaðarráðherrar planta
skógi í Levanger í Þrændalögum. Frá
vinstri: Fredrik Karlström frá Álandi,
Trygve Slagsvold Vedum frá Noregi,
Steingrímur J. Sigfússon frá Íslandi,
Magnus Kindbom frá Svíþjóð og
Jacob Vestergaard frá Færeyjum.
Jötunn Vélar
kaupa Jón bónda
Nýverið var gengið frá samningi
um kaup Jötunn Véla á rekstri
fyrirtækisins Jóns bónda sem
sérhæfir sig í innflutningi og sölu
á rekstrarvörum fyrir bændur og
aðra dýraeigendur. Á meðal þess
sem Jón bóndi hefur boðið upp á
er Lister klippur og rúningsvörur
ásamt Durinn rimlagólfunum og
Wagg gæludýrafóðri.
Jón bóndi, sem áður hét Ísbú
búrekstrarvörur, var stofnað af
feðgunum Ásmundi Einari Daðasyni
og Daða Einarssyni á Lambeyrum.
Fyrirtækið var fyrst staðsett á
Lambeyrum en síðustu árin hefur
starfsstöð þess verið í Reykjavík.
Lager Jóns bónda hefur nú verið
fluttur í húsnæði Jötunn Véla á
Selfossi en heimasíða Jóns bónda,
www.jonbondi.is, mun áfram verða
opin.
Gunnar Biering, sem starfað
hefur hjá Jóni Bónda undanfarin
ár, mun starfa hjá Jötunn Vélum
og leitast við að þjóna nýjum og
gömlum viðskiptavinum sem best,
segir í tilkynningu um kaupin. Eftir
breytingarnar verða starfsmenn
Jötunn Véla 25 talsins.
Óðinn
Sigþórsson.
Endurbætur hjá SS á Selfossi
Margskonar endurbótum sem
auðvelda eiga sláturstörfin er nú
að ljúka hjá SS á Selfossi, en þær
munu stuðla að lækkun kostnaðar
að því er fram kemur í fréttabréfi
félagsins.
Helstu breytingarnar eru: rafmagns-
meyrnunarbúnaðar sem tryggir meyrni
kjöts, ný tölvustýrð kæling í fremri kjötsal, ný pökkunarvél og vinnslulínur
til að geta hlutað, pakkað og fryst mikið magn af fersku kjöti í sláturtíð og
einnig breytingar í hraðfrystiklefum þessu tengt, nýtt tölvukerfi sem tryggir
fullkominn rekjanleika afurða, nýr fullkominn lyftari sem eykur öryggi í
frystiklefum, stækkun á frystiklefa fyrir hausa og vambir og síðast en ekki
síst nýr sauðfjárflutningavagn fyrir Vesturland.
Fleiri breytingar eru á teikniborðinu en þær bíða betri tíma, að sögn
stjórnenda hjá SS.
Björn Víkingur.