Kjarninn - 22.08.2013, Page 114

Þar hófst verkefnið sem þeir kalla „Nasjonal
turistveger“ árið 1994. Upphaflegt markmið verkefnisins
var að heilla ennþá fleiri ferðamenn til landsins til að
skoða stórbrotna náttúruna og bæta til muna aðstöðuna
og aðgengið að völdum stöðum. Markmiðið er einnig
að dreifa ferðamannastraumnum og opna augu
ferðamanna fyrir nýjum áfangastöðum. Vegirnir eru
það sem kemur ferðamönnunum á staðina og þá þurfti
að endurbæta, en það var ekki aðeins lögð áhersla á
þá. Verkefnin eru ólík og spanna allt frá göngustígum,
salernisaðstöðu og útsýnispöllum til stærri bygginga
sem hýsa þjónustumiðstöðvar. Verkefnið er á ábyrgð
norsku Vegagerðarinnar, sem notið hefur faglegrar
ráðgjafar frá nefnd sem bæði er skipuð arkitektum og
listamönnum.
Hátt í 50 arkitektar hafa unnið að ólíkum verkefnum
síðastliðin nítján ár. Nýjar kynslóðir arkitekta hafa
fengið að spreyta sig og ólíkir arkitektar og listamenn
vinna á mismunandi stöðum. Útkoman er fjölbreytt
og oft hafa djarfar lausnir og tilraunakenndur
arkitektúr mótað sig að landslaginu þannig að nú draga
mannvirkin og einstakar lausnir á hverjum stað einnig
til sín áhugafólk um arkitektúr og hönnun.
Samhliða verkefninu Nasjonal turistveger er
heimasíða þar sem hægt er að velja umræddar leiðir,
fræðast um staðarhætti og skoða myndir af bæði
mikilfenglegri náttúru en ekki síður af framúrskarandi
arkitektúr.
Náttúran er stolt okkar Íslendinga, við stærum okkur
af henni utan landsteinanna og flest okkar bera virðingu
fyrir henni. Náttúran á skilið faglegar lausnir og
mannvirki sem hafa það hlutverk að bæði vernda hana
og auðvelda aðgengi að henni. Vinsælustu áfangastaðir
ferðamanna á Íslandi verða fyrir miklum átroðningi og
því er einnig mikilvægt að beina sjónum okkar að nýjum
áfangastöðum til að dreifa ferðamannastraumnum
betur.
2/03 kjarninn ExIT