Morgunblaðið - Sunnudagur - 04.08.2013, Blaðsíða 54

54 MORGUNBLAÐIÐ SUNNUDAGUR 4.8. 2013
Menning
Ó
lafur er búinn að vera að taka upp í 9 daga
og á 25 daga eftir. Hann fer næst í tökur á
þriðjudag og verður að fram í lok ágúst.
Þessi spennumynd er með sömu persónum
og leikendum og sú fyrri. Fyrri myndin
fjallar um serbneska bifvélavirkjann Sergej sem dregst inn í
glæpaheiminn við það að glæpamaðurinn Gunnar Gunn-
arsson sendir óþokka í heimsókn til hans sem verður til þess
að ófætt barn hans deyr. Átökin verða með þeim hætti að
Sergej, með aðstoð serbneskra vina sinna, brýtur veldi
Gunnars á bak aftur og nær völdum í glæpaheiminum.
Seinni myndin fjallar síðan um hvernig Gunnar ákveður að
reyna að koma lífi sínu í lag og leita hefnda við Sergej.
Undirtitill myndarinnar Borgríki 2 er Blóð hraustra
manna. Hvað merkir þetta hjá þér?
„Ég var á klósettinu á einhverjum skemmtistað, þá var
ljóð skrifað á vegginn og þar sá ég þetta og hugsaði með
mér að þetta virkaði flott,“ segir Ólafur de Fleur. „Við vilj-
um vera hraust, andlega og líkamlega en erum það ekki. Við
verðum fyrir blóðtöku í lífinu og missum hreysti okkar vegna
eigin bulls. Ég veit það ekki, mér finnst þetta virka.
Annars pæli ég ekkert voða mikið í því hvað þetta þýðir,
hugsa bara: já, þetta virkar vel.“
Hvaðan er hugmyndin að Borgríkis-myndunum komin?
„Hugmyndin kemur upp úr lífspirringi, mann langar til að
gera litla mynd fyrir lítinn pening, hóa fólki saman og gera
eitthvað. Myndin er skrifuð fyrir þann hóp sem langaði til að
gera eitthvað en ekki öfugt. Sagan kom ekki fyrst heldur
fólkið. Það vildi gera spennumynd og þá fórum við og gerð-
um spennumynd. Þetta er sjálfstætt framhald af fyrri mynd-
inni, hún gekk prýðilega.
Í nýju myndinni eru þetta í meginatriðum sömu karakter-
arnir og í fyrri myndinni og svo bætist einn nýr karakter
við. Okkur fannst ekki nógu flókið að hafa fjóra aðal-
karaktera í fyrri myndinni og bættum því þeim fimmta við.
Eins og í fyrri myndinni leikur Ingvar E. Sigurðsson
Gunnar Gunnarsson sem er glæpamaðurinn sem vill hefna
sín á Sergej. Sergej er kominn með aðeins stærra glæpaveldi
í þessari mynd, en Zlatko Krikic leikur hann sem fyrr.
Nýi karakterinn í myndinni er Darri Ingólfsson sem leikur
ungan lögreglumann sem fær fyrir fjölskyldutengsl að vera
yfirmaður innra eftirlits. Hann er fullur af metnaði og vill
sanna sig fyrir föður sínum sem er lögreglumaður á eft-
irlaunum og goðsögn hjá löggunni.
Þessu fólki sullar öllu saman í þessari mynd með skelfileg-
um afleiðingum. Maður yrkir sjaldan með neitt annað í huga
en skelfilegar afleiðingar. Handritið er eftir mig og Hrafnkel
Stefánsson.
Áður en kom að Borgríki hafði ég aldrei verið í spennu-
myndum. Þegar maður lítur til baka yfir ferilinn þá finnst
manni alltaf vera einhver önnur manneskja sem gerir hverja
mynd. Það er enginn þráður á milli þeirra. Ég er ójarðbund-
inn bullari að eðlisfari og maður fer bara þá leið sem maður
slumpast inn á og ég hef komist upp með það.“
Fór oft til Hollywood í ár
Serbarnir eru aðalglæpamennirnir í undirheimunum, ættu
þeir ekki að vera litháískir til að þetta sé raunverulegt?
„Ég kæri mig ekki um að vita mikið um þennan heim.
Geri ekki mikla rannsóknarvinnu. Ég er bara með góða ráð-
gjafa og treysti á þá. Svo er þetta bara bíó. Uppspunninn
heimur sem passar inn í sögu á bíótjaldinu. Svo er að sjá
hvort þetta virkar.
Í glæpasögum eru þetta alltaf einhverjar frumþarfir sem
fólk er að reyna að seðja. Spurningin er hvort maður hafi
eitthvað meira að segja en bara bang, bang. Menn að píra
augun og sigla í gegnum einhverja sögu. Þetta veltur á sam-
bandi leikstjórans við allar deildir kvikmyndateymisins og þá
sérstaklega leikarana. Það er alltaf munurinn á þessum
myndum. Hefurðu eitthvað að segja, er eitthvað í textanum
sem er eitthvað meira, eitthvað í myndframsetningunni? Svo
eru töfrar mögulegir sem eru ekki undir þér komnir. Ein-
hver svona X-faktor sem lyftir henni upp eða dregur hana
niður. Eitthvað sem maður hefur ekki stjórn á.
Það er ekkert þyngdarlögmál sem virkar í þessum heimi.
Það eina sem maður getur gert er að toga fram það sem býr
manni í brjósti og fólk getur annaðhvort hrósað manni eða
híað á mann. Það er kannski híað helling á mann en svo fílar
þetta einhver úti og þá hættir fólk að hía. Maður verður
bara að halda áfram.
Svo fer mikil orka í að þykjast vita hvað þú ert að gera.
Þetta er svolítil ágiskunarkeppni.“
Eftir að upp kom áhugi á endurgerð fyrri myndarinnar
hefur þú ferðast mikið til Los Angeles, hvernig er að kynn-
ast heiminum þar?
„Já, ég seldi réttinn á endurgerð Borgríkis til Hollywood
og svo sendi ég handrit að geimvísindasögu í eitthvað stúdíó
þarna úti sem hefur áhuga á að gera mynd eftir handritinu.
Ég er ekki að fá neinn pening, en þeir eru komnir í samstarf
við mig og ég hef ferðast oft til þeirra og þeir koma til móts
við mig varðandi ferðakostnað. Það er líka búið að setja mig
á tvö verkefni þarna sem leikstjóra en það á eftir að fjár-
magna það. Þetta hljómar stórfenglega, en stórfenglegt er
það ekki, frekar svona áhugavert. Því það eru afskaplega litl-
ar líkur á að af þessum bíómyndum verði. Þannig er þessi
heimur. Ég myndi giska á 3-5% líkur án þess að geta sagt
nákvæmlega til um það. En maður er svona að kynnast þess-
um heimi í Hollywood og það er áhugavert og gæti verið
gagnlegt ef eitthvað gæfulegt myndi henda í framtíðinni.“
Umboðsmaðurinn þinn úti í Bandaríkjunum virðist vera að
vinna sína vinnu, hvernig valdirðu hann?
„Maður hvorki velur né fær sér umboðsmann, þeir velja
þig. Þeir þurfa að þefa mann uppi. Þessi þefaði mig uppi í
gegnum sameiginlegan vin. Hann seldi endurgerðina á Borg-
ríki. Myndin var sýnd í nokkrum kvikmyndahúsum í Banda-
ríkjunum og síðan sett á DVD. Ekkert stórt í neinu þessu,
en það er gaman að þessu.
En á endanum er það eitthvað mun einfaldara sem full-
nægir þér heldur en að komast í að leikstýra bandarískri
bíómynd, hvort sem það er að skora mark í fótbolta eða bara
faðma ástvini sína.“
Morgunblaðið/Kristinn
NÝ ÍSLENSK SPENNUMYND EFTIR ÓLAF DE FLEUR ER Í TÖKUM
Blóð hraustra
manna út um allt
KVIKMYNDALEIKSTJÓRINN ÓLAFUR DE FLEUR HEFUR LEIKSTÝRT FJÓRUM MYNDUM OG ER NÚ Í TÖKUM
Á SINNI FIMMTU MYND. HÚN NEFNIST BORGRÍKI 2 – BLÓÐ HRAUSTRA MANNA OG ER SJÁLFSTÆTT FRAM-
HALD Á BÍÓMYNDINNI BORGRÍKI SEM FRUMSÝND VAR FYRIR TVEIMUR ÁRUM OG FÉKK FÍNAR VIÐTÖKUR.
Börkur Gunnarsson borkur@mbl.is