Skessuhorn - 27.11.2013, Síða 36

36 ÞRIÐJUDAGUR 26. NÓVEMBER 2013
S
K
E
S
S
U
H
O
R
N
2
01
3
Dásamlegir inniskór
Það hefur myndast hálfgert æði fyrir
þessum inniskóm um heiminn og nú eru
þeir fáanlegir á Íslandi. Snilldar jólagjöf.

Sölustaðir:
Model Akranesi
Framköllunarþjónustan Borgarnesi
Skipavík Stykkishólmi

Skórnir eru framleiddir á mjög vistvænan hátt
úr 100% ull með mjúkum kálfskinnsóla.
Rétt ofan við höfnina í Stykkis-
hólmi stendur gamalt brúnt tré-
hús með hvítmáluðum gluggum.
Það hefur vinalegt yfirbragð, eitt
fjölmargra eldri húsa sem hafa ver-
ið gerð upp í Hólminum og setja
nú mjög skemmtilegan svip á bæ-
inn. Framan við húsið er búið að
smíða stóran trépall. Lítið skilti
segir okkur að hér sé veitingahús.
„Sjávarpakkhúsið“ stendur þar. Um
leið og hurðin er opnuð rétt fyrir
hádegi einn föstudag í nóvember
mætir manni freistandi matarlykt
sem kitlar bragðlaukana. Hér er
greinilega verið að elda. Þegar inn
er komið er strax gengið inn í lítinn
og notalegan veitingasal. Í öðrum
endanum við hliðina á afgreiðslu-
borði er píanó og svartur gítar sem
greinilega er mikið notaður.
Hérna hafa Sara Hjörleifsdótt-
ir og Anna Björk Norðdahl rekið
veitingastað síðan í vor.
Hófu rekstur í vor
„Staðurinn opnaði í apríl í fyrra.
Húsið er byggt 1906 og gert upp
fyrir um áratug síðan. Þá var það
orðið illa farið. Eftir uppgerðina
var veitingarekstur hér í ein tvö
ár. Síðan var húsið notað sem eins
konar sumarhús þar til við tókum
við. Við leigjum það undir rekst-
urinn af ferðaþjónustufyrirtækinu
Ocean Safari. Það stundar sigling-
ar með ferðamenn um Breiðafjörð-
inn héðan úr Hólminum. Upp-
haflega keypti það fyrirtæki húsið.
Hugmyndin var að vera með miða-
söluna hér og annað sem tengd-
ist rekstrinum. Við vorum fengnar
til að sjá um húsið og miðasöluna.
Þetta þróaðist fljótt þannig að við
tókum við húsinu og hófum sjálfar
veitingarekstur hér samhliða því að
selja miða fyrir Ocean Safari,“ seg-
ir Sara.
Veitingastaðurinn fékk heitið
Sjávarpakkhúsið. Eins og nafnið
bendir til þá er aðallega boðið upp
á rétti sem gerðir eru úr hráefni
sem fæst úr hafinu. „Við eldum allt
sjálfar og notum þá hráefni héðan
úr Breiðafirði, bæði fisk, krækling
og annað. Við seljum ekki ham-
borgara, segir Sara og hlær við.
Sáu tækifæri og slógu til
Þó að Sjávarpakkhúsið sé ekki stórt
þá rúmar það fjölbreyttar upp-
ákomur í bland við matreiðsluna.
„Gítarinn hjá okkur er vel lifað-
ur eins og sjá má. Við erum með
opið á kvöldin og til klukkan þrjú
um nætur á helgum. Hér skap-
ast oft góð stemming bæði ferða-
manna og heimafólks. Það er bæði
spilað og sungið. Við erum dugleg-
ar að halda ýmsar uppákomur, svo
sem bingó, pub quiz spurninga-
keppni, fáum trúbadora til að
koma og spila, höldum kótelettu-
kvöld, sviðamessu, konukvöld,
karlakvöld og svo framvegis. Þetta
er ekki síst mikilvægt yfir vetur-
inn þegar ferðamannatíminn er í
lægð. Á sumrin þarf eiginlega ekk-
ert að hafa fyrir því að fá fólk til að
koma. Þá er alltaf fullt hús.“
En hvernig stóð á því að þess-
ar tvær ungu konur sem báðar eru
með lítil börn fóru út í að reka eig-
in veitingastað? Sara verður fyrir
svörum. „Anna Björk var að koma
úr fæðingarorlofi og ég starfaði á
veitingastaðnum Narfeyrarstofu
hér í Stykkishólmi. Við kynntumst
í gegnum dætur okkar sem voru
saman á leikskóla og miklar vin-
konur. Þá datt þetta tækifæri upp
í hendurnar á okkur. Stundum er
það þannig að maður verður líka
bara að sýna frumkvæði og finna
sér eitthvað að gera. Við höfðum
báðar starfsreynslu úr veitinga-
geiranum.“
Sumarið var kalt en
gekk vel
Gekk vel á fyrstu ferðamannaver-
tíðinni í sumar? „Já. Stórslysa-
laust allavega,“ segir Anna Björk
og hlær. „Það var samt töluvert
minna af fólki en búast mátti við.
Slæmt veður setti strik í reikning-
inn. Það munar svo mikið um að
hafa gott veður því þá getum við
notað pallinn úti líka. Við erum á
góðum stað hér við höfnina. Hér
er fallegt útsýni og sólríkt þegar
veðrið er gott. Það er stór pallur
fyrir framan húsið og hann veit að
höfninni. Fólk getur setið þar og
notið útsýnisins sem er oft ægifag-
urt, ekki síst á sumarkvöldum þeg-
ar sólin er að setjast. Sjálfur veit-
ingasalurinn hér inni tekur ekki
nema um 30 manns í sæti. Sumrin
hér í Stykkishólmi eru frábær.“
Þær stöllur hafa margt á prjón-
unum á aðventunni. „Nú í des-
ember ætlum við að vera með jóla
pub quiz-spurningakeppni og jóla-
ball. Hér verður upplestur úr bók-
um, til dæmis Bragi Páll Sigurðar-
son sem er ungskáld hér í Stykkis-
hólmi og var að senda frá sér nýja
ljóðabók. Svo var Marta Dröfn
Björnsdóttir að senda frá sér nýja
barnabók.“ Þær stefna ótrauð-
ar á móts við spennandi framtíð.
„Auðvitað eru oft langir dagar en
þetta er vinnan okkar og fyrirtæk-
ið á sinn hátt okkar eigin afurð.
Við erum bjartsýnar.“
mþh
Ungar mæður í veitingarekstri við Stykkishólmshöfn
Vinkonurnar Sara Hjörleifsdóttir og Anna Björk Norðdahl eiga og reka saman veitingastaðinn Sjávarpakkhúsið í
Stykkishólmi. Hér eru þær með húsið í baksýn.