Tímarit Máls og menningar - 01.03.1961, Side 90

MÁL OG MENNING
Tvær fyrstu bækurnar í myndlistarflokki Máls og menningar, sem prentaðar eru er-
lendis, eru nú á leið til landsins og ættu að geta komið út ekki miklu síðar en þetta
hefti Tímaritsins. Onnur bókin, Cézanne, telst til félagsbóka fyrra árs, en hin, Velazquez,
er fyrsta bók ársins 1961. Ef þessi nýbreytni í útgáfustarfi félagsins mælist vel fyrir verður
haldið áfram á sömu braut og má vænta þess að ein myndlistarbók geti komið út á ári
hverju.
Onnur félagsbók þessa árs mun svo koma út í marz, en það er Fjallaþorpið, kínversk
skáldsaga eftir höfund að nafni Jeh Tsjún-tsjen. Hannes Sigfússon hefur þýtt bókina en
Halldór Kiljan Laxness ritar inngangsorð. Halldór kemst meðal annars þannig að orði um
bókina í innganginum:
„Eg segi fyrir mig, fátt sem ég hafði áður lesið eftir kínverja hefur birt mér á grann-
skygnari hátt eðli kínversku byltíngarinnar, en hún var bændabyltíng í frumstæðu landi
þvert ofaní alt sem Marx hafði spáð, enda nefndi Stalín hana leingstum með orði sem á
ensku hefur verið þýtt peasant banditry. Ekki síst sakir þess að Kína sjálft er í bókinni
dregið saman í ofurlítið afskekt f jallaþorp sér lesandinn fyrir sér í hnotskurn þessa þátta-
skiftaöld einsog hún gerðist með sveitafólki í hinu stórfeingilegasta höfuðlandi heimsins."
Tvær bækur sem Heimskringla gefur út eru nú í prentsmiðjunni. Onnur þeirra er ljóða-
bók eftir Hannes Sigfússon, Sprek á eldinn. Þetta er fjórða bók Hannesar, en tíu ár eru
nú liðin síðan hann gaf síðast út ljóðabók. Áður hefur Heimskringla gefið út eftir hann
skáldsöguna Strandið, 1955, og vakti sú bók mikla athygli. Bók Hannesar kemur út í marz.
Þá er verið að setja bók eftir Skúla Guðjónsson bónda á Ljótunnarstöðum. Nefnist hún
Bréf úr myrkri. Ekki er ótrúlegt að mörgum muni leika forvitni á að lesa þessa skemmti-
lega skrifuðu bók um reynslu höfundar eftir að hann missti sjónina, „reikningsskil manns,
sem orðið hefur fyrir því óhappi að missa sjón sína á miðjum aldri, frásögn af því, hvemig
hann hefur reynt að læra á lífið að nýju og að finna veg, þar sem enginn vegur virtist
vera“, eins og höfundur segir sjálfur í formála fyrir bók sinni.
80