Bændablaðið - 12.02.2015, Blaðsíða 43

43Bændablaðið | Fimmtudagur 12. febrúar 2015
Lesendabás
Um síðustu áramót voru 20 ár
liðin frá því að Búnaðarfélag
Íslands og Stéttarsamband
bænda sameinuðust. Á
Búnaðarþingi sem haldið var
í mars 1995 var nýja félaginu
valið nafnið Bændasamtök
Íslands. Meginmarkmiðin með
sameiningunni voru að gera
félagskerfi bænda einfaldara og
skilvirkara og efla samtakamátt
bænda.
Starfsemi samtakanna var
fjölþætt og lengst af hefur stjórn
þeirra unnið að þeim markmiðum
sem sett voru í upphafi en á síðustu
árum hefur hún fjarlægst þau. Í
staðinn hafa ráðið þar sjónarmið
sem ekki eru til þess fallin að efla
Bændasamtök Íslands.
Hinn 1. janúar 2013 var
leiðbeiningaþjónusta BÍ og
búnaðarsambandanna sameinuð
í einkahlutafélag sem heitir
Ráðgjafarmiðstöð landbúnaðarins.
Sú sameining varð kostnaðarsöm
en vonandi leiðir hún til
öflugrar leiðbeiningaþjónustu.
Leiðbeiningaþjónustan var í
réttum farvegi og óþarfi að
gera svo róttækar breytingar á
henni. Breytingin hefur neikvæð
áhrif á félagskerfið því bæði
búnaðarsamböndin og BÍ hafa
færri verkefni og minni starfsemi
en þau höfðu.
Á Búnaðarþingi 2014 var
samþykkt ályktun sem heimilar
stjórn BÍ að stofna einkahlutafélag
um rekstur og eignir Nautastöðvar
BÍ. Einnig heimilaði þingið stjórn
BÍ að selja eignarhlut í félaginu
til aðildarfélaga samtakanna.
Um framgang ályktunarinnar
má lesa í fundargerðum stjórnar
BÍ og fundargerðum stjórnar
LK. Samkvæmt því sem þar
kemur fram þá hefur stjórn BÍ
ekki stofnað einkahlutafélag
eins og ályktunin gerir ráð fyrir.
Þrátt fyrir það ætlar hún að selja
meirihlutann af eignum og rekstri
Nautastöðvarinnar til félags
sem Landssamband kúabænda
hefur stofnað, ef Búnaðarþing
samþykkir það.
Meðferð þessa máls er
vandræðaleg fyrir stjórnir BÍ og
LK meðal annars vegna þess að
Guðný Helga Björnsdóttir á sæti
bæði í stjórn BÍ og stjórn LK og
er þess vegna vanhæf til að fjalla
um málið.
Það má síðan öllum sem til
þekkja vera ljóst að stjórn LK
vill að leiðbeiningaþjónusta og
kynbótastarf í nautgriparækt
flytjist til Landssambands
kúabænda. Í málflutningi þeirra
kemur einnig fram að stefnt sé
á innflutning erlends kúakyns.
Það er fátt sem mælir með því
að BÍ selji eignir og rekstur
Nautastöðvar BÍ til Landsambands
kúabænda enda jafngildir það
stuðningi við framangreind atriði.
Félagskerfi landbúnaðarins var
til umfjöllunar á Búnaðarþingi
2014 og um það var ályktað.
Markmið ályktunarinnar var
að finna leiðir til að fjármagna
samtök bænda og koma með
tillögur að fulltrúafjölda einstakra
aðildarfélaga á Búnaðarþingi. Til
að vinna að framgangi málsins var
skipaður vinnuhópur. Í ályktun
Búnaðarþings segir að tillögur
vinnuhópsins skuli kynntar
bændum og aðildarfélögum BÍ
fyrir lok október 2014 og lagðar
fyrir Búnaðarþing 2015.
Tillögur vinnuhópsins voru
kynntar á fundi formanna
aðildarfélaga BÍ þann 25.
nóvember sl. Um þær þarf ekki
að hafa mörg orð því þær eru
ónothæfar og til þess eins fallnar
að valda togstreitu og deilum.
Verði þær samþykktar gæti það
orðið banabiti Bændasamtaka
Íslands.
Ég fer fram á að tillögur
vinnuhópsins verði birtar sem fyrst
í Bændablaðinu svo bændur geti
kynnt sér efni þeirra.
Bjarni Ásgeirsson
bóndi, Ásgarði Dalasýslu
Framtíð
Bændasamtaka Íslands
Árnesingar ferðist og fundi
Félag sauðfjárbænda í Árnessýslu
hefur haldið úti hóflegri starfsemi
undanfarin ár, þó svo að stórhugur
hafi einstaka sinnum gripið um
sig meðal stjórnarmanna.
Í vetur stendur einmitt þannig
á fyrir okkur í stjórninni og nú
stendur til að fara í ferðalag. Að
þessu sinni hyggjum við á dagsferð,
laugardaginn 28. febrúar, til að
heimsækja bændur og búalið í
Rangárvallasýslu. Ferðinni er
heitið að Skarði í Landsveit, en
þar er nýbyggt fjárhús og margt fé.
Einnig langar okkur að heimsækja
Heklubæina Hóla og Næfurholt.
Verði ófært þangað finnum við
okkur aðra ákvörðunarstaði.
Ferðaáætlun er á þá leið að
langferðabifreið leggur af stað frá
Reykholti í Biskupstungum kl. 8.30
árdegis, verður á Borg í Grímsnesi
um kl. 9.00, við þjóðþrifafyrirtækið
Matvælastofnun á Selfossi kl.
9.30 og við Skeiðavegamót
kl. 9.45. Félagið greiðir fyrir
farið. Gert verður ráð fyrir
hádegisverði einhvers staðar
í Rangárvallasýslunni, sem
ferðalangar greiða úr eigin vasa.
Heimferð síðdegis.
Allir þeir sem áhuga hafa
fyrir sauðfé og félagsskap okkar
sauðfjárbænda eru velkomnir í
ferðina. Skráið ykkur í síma hjá
Ágústi Inga á Brúnastöðum 899-
5494, Trausta í Austurhlíð 865-
9284, Sigríði í Arnarholti 822-8421
eða 486-8621 fyrir þriðjudaginn 24.
febrúar. Það hefur enginn svo mikið
að gera þennan dag að geta ekki
komið með.
Annar viðburður er fram
undan hjá Félagi sauðfjárbænda í
Árnessýslu, en það er aðalfundurinn.
Hann verður haldinn í Þingborg
mánudagskvöldið 9. mars kl.
20.30. Fylgist með vefnum saudfe.
is þegar nær dregur, til að sjá
hvort við höfum fundið einhvern
almennilegan fyrirlesara til að
koma á fundinn. Kaffiveitingar í
boði félagsins. Við eigum í vændum
notalega kvöldstund í Þingborg,
eins og svo oft áður.
Umhleypingunum hér
sunnanlands hlýtur að linna hvað úr
hverju. Sýnum hugrekki og spörum
ekki heyin.
Bestu kveðjur frá Félagi
sauðfjárbænda í Árnessýslu.
Sigríður Jónsdóttir Arnarholti.
Það er víða fallegt í Rangárvallasýslu. Hér er Hekla í baksýn. Mynd / HKr.
Víða á landsbyggðinni var
mikið fjallað um jöfnun
raforkukostnaðar fyrir
síðustu kosningar. Flestir
stjórnmálaflokkar og þar með
talinn Framsóknarflokkurinn
lagði áherslu á að jafna þennan
kostnað.
Til þess að það náist til frambúðar
þá þarf að endurskoða núverandi
löggjöf hvað þetta snertir. Þessi
stefna er mörkuð í stjórnarsáttmála
ríkisstjórnarinnar en þar segir
orðrétt: „Unnið verður að jöfnun
raforku- og húshitunarkostnaðar.“
Til að þrýsta á framgang málsins
þá hefur undirritaður ítrekað tekið
málið upp, nú síðast í umræðum á
Alþingi 2. febrúar sl.
Staða málsins er sú að iðnaðar-
og viðskiptaráðherra hefur lagt
fram frumvarp um jöfnun á
dreifingarkostnaði raforku en það
mál er nú í vinnslu á Alþingi og
klárast nú á vorþingi. Frumvarpið
gerir ráð fyrir að lagt verði sérstakt
jöfnunargjald á þá raforku sem fer
um dreifikerfi dreifiveitna með
það að markmiði að standa undir
fullri jöfnun kostnaðar við dreifingu
raforku til almennra notenda, þ.e.
heimila og fyrirtækja sem fá raforku
sína beint frá dreifiveitunum. Þetta
þýðir að kostnaður við dreifingu
raforku verður sá sami óháð því
hvort viðkomandi er búsettur í
þéttbýli eða dreifbýli.
Það er einnig réttlætismál að jafna
raforkukostnað þeirra sem búa á
köldum svæðum og þar hafa verið til
skoðunar ýmsar leiðir. Ríkisstjórnin
mun á næstu vikum leggja fram
þingmál á Alþingi sem miðar að því
að jafna að fullu húshitunarkostnað
á köldum svæðum. Það er síðan
mikilvægt að Alþingi nái að klára
það mál nú á vorþingi þannig að
þetta komist til framkvæmda sem
fyrst.
Ríkisstjórnin mun jafna
húshitunarkostnað á köldum svæðum
og dreifikostnað raforku í dreifbýli.
Það er mikilvægt að aðgerðirnar séu
til frambúðar og að þær komist til
framkvæmda fyrr en síðar. Með tilliti
til byggðasjónarmiða og jafnræðis
til búsetuvals, er ekki verjandi að
verð á jafn mikilvægum nauðsynjum
og rafmagni og húshitunarkostnaði
skuli vera jafn breytilegur milli
landsvæða og raun ber vitni.

Ásmundur Einar Daðason
alþingismaður
Framsóknarflokksins.
Jöfnun kostnaðar við húshitun
og dreifingu raforku
Ásmundur Einar Daðason.
Bændablaðið
Smáauglýsingar 56-30-300
Hafa áhrif um land allt!