Morgunblaðið - 12.12.2015, Qupperneq 64

BÆKUR
Heima í Hnífsdal stóð hjónabandið
aftur á brauðfótum. Eyþór var mikið í
burtu vegna vinnu en Hildí kenndi og
vann í prentstofunni á Ísafirði. Í
páskaleyfinu, um miðjan apríl, fór
hún til Reykjavíkur til að skemmta
sér. Kvöld eitt skellti hún sér á ball á
Hótel Sögu með vinkonu sinni og hitti
þar Skúla Benediktsson, íslensku-
kennara við Gagnfræðaskólann á Ísa-
firði. Þau voru varla málkunnug að
vestan, en Skúli kenndi yngri dætr-
um hennar tveimur. Hildí segir frá
því í endurminningum sínum að Skúli
hafi gerst æði riddaralegur í borginni
og boðið henni í dýrindis kvöldverð á
Grillinu á Hótel Sögu (bls. 118):
Hins vegar kom það á daginn, að
Skúli var heldur óvanur kúltúrvínum
frá kontínentinu. Fyrir bragðið tók
hann nokkra ógleði, þegar líða tók á
kvöldið. Féll það náttúrlega í minn
hlut að hjúkra honum.
Þau urðu samferða í fluginu heim.
Þremur vikum síðar skrifar Hildí
Guðrúnu dóttur sinni til Vínarborgar.
Ísafjörður 12. maí 1979.
Elsku Gunna mín.
Nú loksins skrifa ég þér, enda
miklar fréttir að færa.
Sl. mánudag fékk ég algjöran lög-
skilnað frá Eyþóri og er að fara að
gifta mig aftur um leið og ég fæ papp-
írana. Maðurinn minn tilvonandi heit-
ir Skúli Benediktsson og er íslensku-
kennari. Þú hefur ef til vill
einhverntímann notað kennslubækur
eftir hann. Ég er alsæl þó illa hafi ég
farið úr skiptum við Eyþór en ég gaf
mikið eftir til þess að fá skilnað. Hjör-
dís er mjög ánægð, hún er ekki vön
slíku viðmóti sem Skúli sýnir henni.
Það er svo margt að segja frá að ég
geymi það og tala við þig þegar þú
kemur heim. Bið innilega að heilsa
Svönu. Þín mamma.
p.s
Er það hamingjusöm að mig langar
ekki í brennivín.
Adressan mín nýja er (ég er flutt)
Fjarðarstræti 7 11 hæð t.v. 400 Ísa-
fjörður.
Það tók Hildí aðeins tíu daga að ná
í gegn skilnaði við Eyþór, sem kom
vestur til að kvitta undir pappírana.
Örfáum dögum síðar, 19. maí, voru
Hildí og Skúli gefin saman, röskum
mánuði eftir að þau hittust í Reykja-
vík.
Skúli var fjórði eiginmaður Hildíar,
þremur árum eldri en hún, stór-
greindur, tilfinningaríkur húmoristi
frá Efra-Núpi í Miðfirði. Þau áttu
margt sameiginlegt og gátu notið
menningar saman. Hann var mikill
íslenskumaður og vísnasmiður og líkt
og Hildí hafði hann yndi af bók-
menntum og af því að hlýða á tónlist,
ekki síst óperur. Þá samdi hann
kennslubækur í íslensku fyrir grunn-
og framhaldsskólanema, hélt um tíma
úti vísnaþætti í DV og gaf út Íslend-
ingasögur fyrir nemendur. Bergljót,
dóttir Skúla, segir að hann hafi elskað
Hildí afar heitt, honum hafi þótt hún
stórkostleg.
Dætur Hildíar segja að Skúli hafi
verið móður þeirra óskaplega góður
og sjálf segir hún í bók sinni að hann
hafi veitt henni sálræna næringu með
lærdómi sínum og menntun. Hann
hafi verið andstæðan við fyrri eig-
inmenn hennar þrjá. Þar að auki hafi
Skúli verið bráðskemmtilegur þegar
vel lá á honum. Hildí virtist hafa
höndlað hamingjuna.
Í viðtali sem birtist í Vikunni ári
eftir að þau gengu í hjónaband segir
Hildí:
Eitt af því allra kaldhæðnislegasta
við lífið er einmitt það að fólk er alls
ekki fært um að velja sér réttan maka
fyrr en á miðjum aldri. Áður er það
bara tilviljun og alls kyns auka-
atriðum háð hverjir taka saman. Svo
þroskast fólk líka misjafnlega. Og
uppgötvar svo allt of seint að það á
enga samleið. Fólk verður að vera
andlega skylt til að lifa saman í ham-
ingjuríkri sambúð. Því miður lærist
manni ekki nema með aldrinum að
meta þá staðreynd að fullu.
Glansblöðin gefa ekki alltaf rétta
mynd. Skúli var túramaður á áfengi,
hann drakk ótæpilega langtímum
saman en gat haldið sig frá drykkju í
marga mánuði þess á milli, segir
Bergljót dóttir hans. Hildí drakk aft-
ur á móti nánast á hverju kvöldi, en
gat hætt og rifið sig upp daginn eftir.
Drykkjumynstur hjónanna fór ekki
vel saman. Skúli réð ekki við stans-
laust sullið í henni og Hildí ekki við
ofdrykkju hans. Bergljót segir að
stundum hafi verið skelfilegt að koma
á heimilið. Þegar hún flutti frá Ísa-
firði árið 1980 kom hún í heimsókn til
að kveðja föður sinn. Skúli lá þá
drukkinn og vankaður uppi í rúmi.
Hildí hafði lamið hann í höfuðið með
vínflösku.
Drykkjumynstrið fór illa saman
Ragnhildur Thorlacius
fréttamaður studdist við
fjölmargar heimildir við
ritun ævisögu Brynhildar
Georgíu Björnsson,
barnabarns fyrstu for-
setahjóna Íslands. Lífs-
hlaup hennar spannaði
allt frá Bessastöðum til
Argentínu til Ísafjarðar-
djúps. Hún missti tvö
börn, átti fimm menn og
eyddi sautján síðustu ár-
um ævi sinnar rúmföst í
bílskúr í Reykjavík.
Bjartur gefur út.
Í garði Hildí ásamt öðrum eiginmanni sínum Jóni Magnússyni og Elísabetu, dóttur sinni við Útsali á Seltjarnarnesi.
Á ströndinni Hildí ásamt yngri syst-
ur sinni Hjördísi, Birni Sv. Björns-
syni föður sínum og afa Sveini
Björnssyni, síðar forseta.
Merino ullarnærföt
á alla fjölskylduna
Tveggja laga kerfi (baselayer) sem flytur raka og svita
frá líkamanum og heldur honum þurrum og hlýjum.
Útsölustaðir: Hagkaup • Afreksvörur – Glæsibæ • Bjarg – Akranesi • Fjarðarkaup – Hafnarfirði • Jói Útherji – Reykjavík
JMJ – Akureyri • Hafnarbúðin – Ísafirði • Kaupfélag V-Húnvetninga • Kaupfélag Skagfirðinga • Nesbakki – Neskaupsstað
Skóbúð Húsavíkur – Húsvík • Blossi – Grundarfirði • Efnalaug Dóru – Hornafirði • Efnalaug – Vopnafjarðar
Siglósport – Siglufirði • Heimahornið – Stykkishólmi • Grétar Þórarinsson – Vestmannaeyjum
30
ÁRA
Höfðabakka 9, 110 Reykjavík • Sími 561 9200 • run@run.is • www.run.is