Læknablaðið - 01.02.2016, Blaðsíða 43

LÆKNAblaðið 2016/102 103
M I N N I N G A R O R Ð
Það voru skelfileg tíðindi að frétta af
óvæntu fráfalli góðs vinar og náins sam­
starfsfélaga okkar beggja, Guðmundar
Klemenzsonar, þann 8. desember síðast­
liðinn. Gummi Klem, eins og við kölluðum
hann, mun skilja eftir sig stórt skarð á
svæfinga­ og gjörgæsludeild Landspítala,
og víðar, enda með eindæmum fær læknir
og farsæll. Gummi var náinn samstarfs­
maður okkar til fjölda ára og bar aldrei
skugga á það samstarf. Hann var einnig
góður vinur og mátti ekkert aumt sjá. Allt­
af tilbúinn að rétta fram hjálparhönd og
leggja sitt af mörkum, bæði á spítalanum
og utan hans. Traustari samstarfsmann
er varla hægt að hugsa sér. Einn helsti
styrkur hans var hversu rólegur og og
yfirvegaður hann var við erfiðar aðstæður,
til dæmis þegar mikið gekk á í flóknum
hjartaaðgerðum. Þetta er eitthvað sem
fjölmargir læknar á skurðsviði Landspítala
mátu mikils og var oft leitað til hans eftir
ráðum við erfiðari tilfelli.
Gummi var sérlega þægilegur í sam­
vinnu og vinsæll, bæði meðal lækna og
annars starfsfólks á skurðstofum og gjör­
gæsludeildum spítalans. Hann var frábær
námsmaður og var með best menntuðu
læknum á Íslandi. Eftir stúdentspróf við
Menntaskólann í Reykjavík og læknanám
við læknadeild HÍ lagði hann stund á
krefjandi framhaldsnám í svæfinga­ og
gjörgæslulækningum við Madison­háskóla
í Bandaríkjunum. Hann stundaði síðan
frekara framhaldsnám í hjartasvæfingum
við hina virtu Mayo Clinic í Rochester í
Bandaríkjunum. Árið 2003 fékk hann starf
við svæfinga­ og gjörgæsludeild Land­
spítala við Hringbraut. Þar sinnti hann til
dauðadags störfum á bæði gjörgæsludeild
og skurðstofugangi, þó sérstaklega við
opnar hjarta­ og lungnaaðgerðir, en einnig
lagði hann sig sérstaklega eftir svæfingum
á fæðinga­ og kvennadeild spítalans.
Stuttu fyrir andlát sitt átti Gummi þátt
í stofnun Klíníkkurinnar í Ármúla og
ætlaði hann sér að starfa á þeim vettvangi
í hlutastarfi meðfram störfum á Landspít­
ala. Gummi var skarpgreindur og sérlega
vel lesinn – alltaf með nýjustu greinar
í New England og fleiri vísindaritum á
hreinu, og ekki bara á sínu sérsviði heldur
einnig í öðrum sérgreinum læknisfræði.
En Gummi kom ekki bara við sögu á
spítalanum heldur einnig við önnur störf
sem tengdust sérgreinum okkar, til dæmis
kom hann oft að málþingum á Læknadög­
um og skipulagningu fjölmargra árlegra
vísindaþinga sem Félag svæfinga­ og gjör­
gæslulækna og Skurðlæknafélag Íslands
stóðu að í sameiningu. Þar var framlag
hans mikilvægt og óeigingjarnt starf hans
fyrir þessi félög er ómetanlegt. Gummi
var líka mikill húmoristi og hárbeittra
og oft meinfyndinna athugasemda hans
á morgunfundum verður sárt saknað.
Hann var frábær kennari og unglæknar og
læknanemar munu sakna ötuls leiðbein­
anda. Gummi gat haft sterkar skoðanir á
mönnum og málefnum og ekki vorum við
alltaf sammála í pólitík. En hann bar þó
alltaf virðingu fyrir skoðunum annarra
og gaf sér tíma til að hlusta. Það er ljóst
að íslensk læknastétt og Landspítali hafa
misst einn af sínum bestu félögum. Missir
nánustu ættingja er þó mestur og vottum
við þeim samúð okkar.
Tómas Guðbjartsson og Kári Hreinsson
Minningarorð um
Guðmund Klemenzson
M
yn
d:
Þ
or
ke
ll
Þo
rk
el
ss
on