Morgunblaðið - 23.12.2017, Side 18

18 FRÉTTIRInnlent
MORGUNBLAÐIÐ LAUGARDAGUR 23. DESEMBER 2017
Söfnum í neyðarmatar-
sjóð fyrir jólin til matarka
hjá Fjölskylduhjálp Íslands
fyrir þá fjölmörgu sem lægstu
framfærsluna hafa.
Þeim sem geta lagt okkur lið
er bent á bankareikning
0546-26-6609,
kt. 660903-2590.
Fjölskylduhjálp slands, Iðufelli 14 Breiðholti
og Baldursgötu 14 í Reykjanesbæ.
Neyðarsöfnun í
fyrir jólin
Guð blessi ykkur öll
Sigurður Bogi Sævarsson
sbs@mbl.is
Jólin eru annatími hjá séra Maríu
Rut Baldursdóttur, presti á Horna-
firði, rétt eins og öðrum kirkjunnar
þjónum. Þau sr. Gunnar Stígur
Reynisson sóknarprestur, sem þjóna
á akrinum undir Vatnajökli, skipta
með sér verkum og er skipan sú að á
aðfangadagskvöld annast séra María
miðnæturhelgistund í Hafnarkirkju
og verður svo um jóladagana með
messur á Hofi í Öræfum, Kálfafells-
stað í Suðursveit og á Brunnhóli á
Mýrum. Sr. Stígur sinnir athöfnum í
öðrum kirkjum Bjarnarnespresta-
kalls, en þær verða ellefu alls.
„Ég þekki ekkert annað en að jólin
snúist um helgihald og vinnu enda
þótt samvera með fjölskyldunni og
ættingjum skipti mig miklu máli.
Faðir minn, séra Baldur Rafn Sig-
urðarson, er sóknarprestur í Njarð-
vík og á mínu æskuheimili bjuggum
við okkur gleðileg jól milli athafna og
skylduverka hans. Þar áttum við
góðar stundir saman og tókum með-
al annars í spil eins og margir lands-
menn gera um hátíðarnar. Pabbi er
enn í fullu fjöri þannig að jólahaldið
verður svipað hjá foreldrum mínum
og mér og minni fjölskyldu,“ segir
sr. María sem vígðist til þjónustu á
Hornafirði í byrjun þessa árs.
Jólastress er val
hvers og eins
Síðustu daga hefur María verið að
skrifa predikanirnar sem hún flytur
um jólin. Og ekki vantar efniviðinn
því frásögn Lúkasarguðspjalls af
barnsfæðingu á Betlehemsvöllum er
ævintýri sem alltaf nær í gegn.
„Agnarsmá manneskja sem er barn
fátækra hjóna, fögnuður, friður,
kærleikur, væntumþykja og sam-
vera. Þetta er boðskapur sem stend-
ur allt af sér, enda þótt tímarnir
breytist og mennirnir með. Prédik-
unin er því alltaf að nokkru endur-
ómur umræðu og aðstæðna líðandi
stundar, þótt gleði og hátíðleiki ein-
kenni athafnir,“ segir María Rut,
sem kann vel við lífið austur á Höfn.
„Takturinn í mannlífinu hér er allt
öðruvísi en fyrir sunnan, þar sem við
fjölskyldan vorum fyrr í vikunni. Þar
var erill, margir í verslunum og mikil
umferð. Annars er jólastress að
nokkru leyti val hvers og eins – því
þegar búið er að kaupa allt sem þarf,
þrífa, baka, skreyta og svo framveg-
is, þá ættu flestir að hafa tíma til að
njóta samverunnar með ástvinum
sínum, en við gerum eins mikið og
tími gefst til. Jólin koma þrátt fyrir
að við séum ekki búin að öllu sem við
hefðum viljað. Annars finnst mér
mun rólegra yfir öllu nú í aðdrag-
anda jólanna hér austur á Höfn. Í
sveitunum hér í kring er eins og til-
veran sé í allt öðrum takti. Að koma
þangað er talsverð upplifun fyrir
þéttbýlisbarn eins og mig.“
Séra María Rut er í hálfu starfi
sem prestur á Hornafirði og sinnir
því ýmsum fleiri störfum, svo sem
kennslu í söng, tónfræði og á flautu
og fiðlu í tónskólanum á Höfn.
Menntuð söngkonan hefur einnig
sungið einsöng með kórunum á Höfn
og er þannig leiðandi í menningar-
starfi byggðarlagsins.
Syngur fyrir söfnuðinn
„Við miðnæturhelgistundina á að-
fangadagskvöld ætlum við að taka
Betlehemstjörnuna eftir Áskel Jóns-
son. Það er óskaplega fallegt finnst
mér. Það er svo yndislegt að fá tæki-
færi til að syngja fyrir söfnuðinn.
Einnig er gaman að syngja hátíðar-
tón sr. Bjarna Þorsteinssonar, sem
mun óma í kirkjunum um jólin,“ seg-
ir söngkonan og presturinn og
hlakkar til jólanna sem hún ætlar að
eiga með Eyþóri Grétari Grétars-
syni, eiginmanni sínum, og sonunum
tveimur; Elíasi Bjarma sjö ára og
Patrik Nóa þriggja ára.
„Það er tilbreyting um þessi jól
þegar fimm ára guðfræðinám er að
baki að geta lesið bækur að eigin
vali. Ég er spennt fyrir nýrri bók
Yrsu Sigurðardóttur, Gatið; jafnvel
þótt það séu jól höfða glæpasögur til
mín. Í sama anda er bókin Fugla-
skoðarinn eftir Stefán Sturlu Sigur-
jónsson og hana ætla ég að lesa ein-
hvern næstu daga.“
Ljósmynd/Katrín Birna Þráinsdóttir
Jólin „Þau koma þrátt fyrir að við séum ekki búin að öllu sem við hefðum
viljað,“ segir sr. María Rut Baldursdóttir, prestur á Höfn í Hornafirði.
Gleði og hátíðleiki
einkenni athafnirnar
 Fyrstu jólin sem
presturinn María Rut
Baldursdóttir þjónar
Morgunblaðið/Sigurður Bogi
Hof Hér verður messað um jól.
ÚR BÆJARLÍFINU
Líney Sigurðardóttir
Þórshöfn
Fyrsta skóflustungan að nýjum
leikskóla í Langanesbyggð var tekin
í byrjun desember en byggt verður
við núverandi húsnæði leikskólans.
Skóflustunguna tók einn af fyrstu
starfsmönnum leikskólans Barna-
bóls, Edda Jóhannsdóttir sem á þar
32ja ára starfsaldur og man tímana
tvenna í húsnæðismálum leikskól-
ans, sem var meðal annars um tíma
á neðri hæðinni á heimili hennar.
Þorsteinn Ægir Egilsson, odd-
viti Langanesbyggðar og einn af
leikskólanemendum Eddu frá fyrri
tíð, rakti sögu leikskólans á Þórs-
höfn í stuttu máli og lýsti ánægju
með þennan nýja áfanga í skóla-
málum í bænum.
Núverandi húsnæði leikskólans
þarfnast töluverðra endurbóta og er
auk þess of lítið og stefnt er að því
að byggingarframkvæmdum ljúki
haustið 2018.
  
Skólamál hafa verið í brenni-
depli í sveitarfélaginu og hefur
grunnskólinn verið endurnýjaður að
stórum hluta. Áfram er haldið í upp-
byggingu skólamála en spjald-
tölvuvæðing er nú framundan í
grunnskólanum og hefur sveitar-
stjórn gert ráð fyrir þeim kostnaði í
fjárhagsáætlun næsta árs. Keyptar
verða spjaldtölvur fyrir nemendur 5.
til 10. bekkjar og alla kennara ásamt
því að unnið verði að fræðslu kenn-
ara á möguleikum er varða tölvur,
forrit, fjarvinnu og annað sem
spjaldtölvunotkun tilheyrir. Form-
leg innleiðing skal hefjast hið fyrsta
en ekki síðar en næsta haust.
  
Árið sem er að líða hefur verið
Langanesbyggð nokkuð hagstætt og
fjárhagsstaða sveitarfélagsins hefur
verið að styrkjast undanfarið. Fleiri
framkvæmdir en leikskólabygging
eru á döfinni því ákveðið hefur verið
að hefja undirbúning að stækkun
Hjúkrunar- og dvalarheimilisins
Nausts en einnig verður ráðist í
töluverðar endurbætur og viðgerðir
á íþróttamiðstöðinni Veri ásamt
fleiri verkefnum. Engin kyrrstaða
er því á Þórshöfn á Langanesi og
vinnandi hendur ávallt velkomnar.
Húsnæðisskortur hefur þó verið
vandamál á Þórshöfn, sveitarstjórn
hefur því nýverið samþykkt gerð
húsnæðisáætlunar.
Hlutverk húsnæðisáætlana
sveitarfélaga er að draga fram
greinargóða mynd af stöðu húsnæð-
ismála í sveitarfélaginu, greina
framboð og eftirspurn eftir marg-
víslegum húsnæðisformum og setja
fram hugmynd að áætlun um hvern-
ig sveitarfélagið gæti mögulega
komið að og mætt húsnæðisþörf.
Greiningarskýrsla hefur verið lögð
fram þar sem farið er yfir fýsileika
þess að sveitarfélagið hafi forgöngu
um stofnun leigufélags og þar með
aðkomu sveitarfélagsins að bygg-
ingu húsnæðis á grundvelli laga um
almennar íbúðir, reglugerðar um
stofnframlög ríkis og sveitarfélag
o.fl. Sveitarstjórn mun fara ítarlega
yfir niðurstöður skýrslunnar og
koma þeim síðan á framfæri við
hlutaðeigandi ráðuneyti, að sögn
Elíasar Péturssonar sveitarstjóra.
Vinna við umrædda húsnæðisáætlun
er hafin og vonir standa til að hún
verði klár til umræðu í sveitarstjórn
um miðjan febrúar. Eitt hið áhuga-
verða við greininguna sem nú þegar
hefur verið unnin er hve berlega
kemur þar í ljós sá mikli munur sem
er á sveitarfélögum á landsbyggð-
inni í samanburði við höfuðborgar-
svæðið og Akureyri. Samhengi
byggingarkostnaðar og mögulegs
leiguverðs er allt annað úti í hinum
smærri samfélögum en hinum
stærri, við því þarf að bregðast á
einhvern hátt
  
Í haust var hafinn undirbún-
ingur að byggingu nýs söluskála í
stað þess sem brann fyrir ári. Húsið
varð fokhelt í byrjun desember og
reiknað er með að það verði tilbúið
síðari hluta vetrar, að sögn forsvars-
manna hjá N1. Bæði íbúar Langa-
nesbyggðar sem og ferðamenn hafa
sárlega saknað þessarar þjónustu-
einingar sem söluskálar alltaf eru,
auk þess var skálinn eins konar
samkomustaður bæjarbúa sem
þangað litu inn í kaffisopa og til að
spjalla um daginn og veginn. Það
verður því væntanlega hátíð í bæ
þegar nýr skáli verður loksins opn-
aður með hækkandi sól.
Morgunblaðið/Líney Sigurðardóttir
Framkvæmdir Edda Jóhannsdóttir tekur fyrstu skóflustungu að leikskóla.
Skólamál í brenni-
depli á Langanesi
Sigurður Bogi Sævarsson
sbs@mbl.is
Margar áhugaverðar jarðir í sveitum
landsins eru til sölu um þessar mund-
ir. Ýmsar bjóða upp á möguleika í
hefðbundum landbúnaði en margir
sjá þær þó fyrir sér sem stökkpall til
að hefja starfsemi í öðrum greinum,
svo sem ferðaþjónustu. Sem dæmi
um þetta má nefna jörðina Hlíðar-
endakot í Fljótshlíð sem kom á sölu-
skrá nú í haust.
Ásett verð er 205 millj. kr
Hlíðarendakot er innarlega í
Fljótshlíðinni og eru byggingar þar
undir brekkubrún; það er íbúðarhús,
og stór skemma sem er nýtt sem fjár-
hús. Einnig gamalt íbúðarhús í form-
sterkum burstabæjarstíl sem var
byggt árið 1918 en nýtt fram undir
aldamótin síðustu. Ofan við bæinn,
inn af brúnum, eru víðfeðm heiðar-
lönd, skjólgóð og vel gróin en neðan
þjóðvegar fram að Þverá er landið
hálfgróið og skiptist í ræktað land,
mólendi og lúpínu. Jörðin er talin um
700 hektarar, auk óskipts lands.
Ásett verð eru 205 milljónir króna.
„Svona góðar jarðir koma alltaf inn
á markaðinn öðru hvoru. Oft getur
tekið nokkurn tíma að koma sölu í
gegn þrátt fyrir að margir sýni
áhuga. Fjármögnun getur tekið sinn
tíma og eins vinna við að stilla af
skipulag og áætlanir um not sem
kaupandinn hefur,“ segir Sveinbjörn
Sveinbjörnsson hdl. og löggiltur fast-
eignasali hjá Eignaborg í Kópavogi.
Hann býst við að Hlíðarendakot selj-
ist fyrr en síðar.
„Mér finnst sennilegast að Hlíðar-
endakot nýtist fyrir ferðaþjónustu,
enda er stutt á áhugaverða staði og
útsýnið er frábært; Eyjafjallajökull,
Vestmannaeyjar, Dímon og Þórs-
mörk. Svo er þarna í jöklanna skjóli
mjög veðursælt. Þar bætist svo við að
framlegð af búskap er í dag ekki svo
mikil að hún ein og sér standi undir
háu jarðaverði,“ segir Sveinbjörn
Sveinbjörnsson.
Hlíðarendakot er sennilega þekkt-
ast fyrir að vera æskuslóð Þorsteins
Erlingssonar skálds sem orti um bæ-
inn braginn góða sem hefst á línum
Fyrr var oft í koti kátt. Þorsteins-
lundur sem er til minningar um
skáldið er í landi jarðarinnar.
Hlíðarendakot er
komið á söluskrá
 Fyrr var oft í koti kátt, orti skáldið
Morgunblaðið/Sigurður Bogi
Hlíðarendakot Góð jörð sem býður
upp á hina ýmsu möguleika.