Skessuhorn - 16.03.2016, Blaðsíða 40

MIÐVIKUDAGUR 16. MARS 201640
Það var mikil eftirvænting í loft-
inu í Borgarnesi síðastliðinn laugar-
dag. Skallagrímskonur áttu að lyfta
deildarmeistarabikarnum í þessum
síðasta heimaleik sínum í 1. deild
kvenna í körfuknattleik. Andstæð-
ingar þeirra voru Njarðvíkingar,
eina liðið sem hafði lagt þær að velli
í vetur.
Skallagrímskonur höfðu yfir-
höndina í fyrsta leikhluta. Njarð-
víkurliðið var aðeins lengur í gang
en kom sér hægt en örugglega inn
í leikinn eftir því sem leið á fjórð-
unginn. Í öðrum fjórðungi var mik-
ið jafnræði með liðunum, leikur-
inn hraður og mikil spenna í hús-
inu. Eftir að hafa skipst einu sinni á
forskotinu leiddi Skallagrímur með
tveimur stigum í hálfleik, 45-43 og
útlit fyrir spennandi síðari hálfleik.
Þriðji fjórðungur var hins veg-
ar afleitur, hver svo sem skýringin
kann að vera. Njarðvíkingar skelltu
í lás í vörninni og á tímabili var sem
lok hefði verið sett á körfu þeirra.
Skallagrímskonur komust hvorki
lönd né strönd, skoruðu aðeins sjö
stig allan leikhlutann en á meðan
héldu gestirnir uppteknum hætti og
náðu öruggri 15 stiga forystu fyr-
ir lokafjórðunginn. Munurinn jókst
lítillega áður en Skallagrímskonur
tóku mikinn endasprett og hleyptu
smá lífi í leikinn á ný. Það var hins
vegar um seinan, munurinn var ein-
faldlega of mikill og þær urðu að
sætta sig við sex stiga tap, 81-87.
Erikka Banks var atkvæðamest
Skallagrímskvenna með 19 stig og
sjö fráköst og næst kom Kristrún
Sigurjónsdóttir með 18 stig og átta
fráköst. Í liði Njarðvíkur átti Came-
ron Tyson-Thomas sannkallaðan
risaleik með 42 stig, 19 fráköst og
hvorki fleiri né færri en níu stolna
bolta.
„Markmiðið er að
fara beint upp“
Að leik loknum var slegið upp verð-
launaafhendingu þar sem leikmönn-
um og þjálfurum Skallagríms voru
veittir gullpeningarnir fyrir frammi-
stöðuna í vetur. Að því loknu kom
það í hlut Guðrúnar Ámundadóttur
fyrirliða að hefja á loft deildarmeist-
arabikarinn. Hún vakti fyrst máls á
því í samtali við Skessuhorn að lið-
ið hefði ekki leikið nægilega vel að
kvöld laugardagsins. „Það var leið-
inlegt að tapa þessum leik, við eig-
um að gera mikið betur,“ segir Guð-
rún. „Við vorum bara ekki að spila
nógu vel í kvöld og eigum fullt inni,“
bætti hún við en dvaldi þó ekki lengi
við tapið. Hún kvaðst hæstánægð
með að Skallagrímur hefði tryggt
sér deildarmeistaratitilinn. „Það
var auðvitað mjög góð tilfinning að
lyfta bikarnum. Þetta er náttúrulega
það sem við höfum unnið að í all-
an vetur og gaman að fá umbun fyr-
ir erfiðið,“ segir fyrirliðinn.
Það er ótrúlegt til þess að hugsa
að um mitt síðasta sumar var ekkert
sem benti til þess að Skallagrímur
myndi senda lið til keppni í Íslands-
móti kvenna í körfuknattleik. Þá var
ákveðið að endurvekja meistaraflokk
kvenna eftir tveggja ára hlé og senda
lið til keppni í Íslandsmótinu. Stofn-
að var kvennaráð körfuknattleiks-
deildar Skallagríms, með Ámunda
Sigurðsson og Ásmund Einar Daða-
son í broddi fylkingar, og því falið
að halda utan um endurreisn liðsins.
„Pabbi og Ásmundur Einar tóku
þetta bara að sér og þeir eiga stóran
þátt í að byggja upp þetta lið. Þeir
hafa unnið daga og nætur til að láta
þetta ganga upp,“ segir Guðrún.
Snemma hausts var Manuel Ro-
driguez ráðinn þjálfari liðsins og
liðið hefur þegar náð ótrúlegum ár-
angri. Skallagrímur hefur fyrir löngu
tryggt sér efsta sæti deildarinnar og
aðeins tapað tveimur leikjum í all-
an vetur. „Nú er það bara úrslita-
keppnin sem við þurfum að einbeita
okkur að,“ segir Guðrún og þar er
aðeins eitt sem kemur til greina,
sama hver andstæðingurinn verður.
„Markmiðið er að fara beint upp í
úrvalseild.“ kgk
Skallagrímskonur lyftu deildarmeistarabikarnum
Skallagrímur, deildarmeistari 1. deildar kvenna í körfuknattleik 2016.
Fyrirliðinn einbeittur á vítalínunni. Þriggja stiga skot Sólrúnar Sæmundsdóttur ríður af.
Lukkudýrið Skallinn og Manuel
Rodriguez þjálfari fylgjast með gangi
mála.
Erikka Banks gerir atlögu að körfunni í leiknum gegn Njarðvík. Guðrún Ámundadóttir fyrirliði og Kristrún Sigurjónsdóttir í þann mund að hefja bikarinn á loft.