Bændablaðið - 14.12.2017, Síða 76

76 Bændablaðið | Fimmtudagur 14. desember 2017
JÓLAÞRAUTIR FYRIR UNGA FÓLKIÐ
Hér eru lagðar þrjár þrautir
fyrir unga fólkið.
Þótt notað sé hugtakið „ungt
fólk“ er fólki á öllum aldri heimilt
að túlka það eftir eigin höfði, enda
getur verið afstætt hvernig á það
er litið. Öllum er því heimilt að
spreyta sig á þessum gátum óháð
því hvað kennitalan segir. Í fyrra
gerðu sumir úr þessu keppni
milli yngri og eldri á heimilinu
og spennandi getur verið að sjá
hvorum hópnum gengur betur.
Við á Bændablaðinu höfum
áður sagt og segjum það enn, að
við lítum svo á að enginn sé eldri
en hann hefur sjálfur tilfinningu
fyrir, jafnvel þótt skrokkur og
fallþungi virðist stundum benda
til einhvers annars. Þá getur það
bara kallast að vera ungur í anda.
Lausnir á þessum gátum má
finna á smáauglýsingasíðum
aftast í blaðinu.
Jólabrauðin komin norður, Ylfukonur sjá um að koma þeim heim til kaupenda.
Lionsklúbburinn Ylfa á Akureyri:
Jólabrauðin renna út og ágóðinn
nýttur til góðverka
„Sala á jólabrauðum hefur mælst
einkar vel fyrir og þykir okkur
Ylfukonum mjög skemmtilegt að
vinna við þetta verkefni. Veðrið
hefur af og til strítt okkur eins
og gengur á okkar norðlægu
slóðum, en alltaf hefur okkur
tekist að koma brauðunum norður
og til viðtakenda,“ segir Gerður
Jónsdóttir hjá Lionsklúbbnum
Ylfu á Akureyri.
Aðalfjáröflun Ylfukvenna er
sala á jólabrauði, en brauðin kaupa
þær frá Geirabakaríi í Borgarnesi,
aka þeim norður og dreifa heim
á hlað til viðtakenda á Akureyri.
„Akureyringar kunnu vel að meta
þetta framtak og hafa tekið okkur vel,
í hugum margra er það að fá okkur
Ylfukonur heim á hlað með jólabrauð
í farteskinu liður í jólaundirbúningi
heimilisins og ómissandi þáttur í
aðventuupplifuninni,“ segir Gerður.
Gáfu sjónmælingartæki
Lionsklúbburinn Ylfa var stofnaður
18. apríl 2011 og í honum eru nú um
20 konur. „Við höfum einbeitt okkar
að stuðningi við börn og ungmenni á
Akureyri og núna fyrir stuttu gáfum
við Heilbrigðisstofnun Norðurlands,
í samvinnu við alla Lionsklúbbana
á Eyjarfjarðarsvæðinu og Húsavík,
sjónmælingatæki að andvirði einnar
milljónar króna fyrir ung börn,“
segir Gerður, en gjöfin var gefin
í tilefni af 100 ára afmæli alþjóða
Lionshreyfingarinnar. Hún segir
að næsta ár verði mjög merkilegt
fyrir íslenskt Lionsfólk því þá
verði íslensk kona, Guðrún Björt
Yngvadóttir, fyrst kvenna til að
verða forseti þessarar fjölmennustu
hjálparsamtaka heims.
Góðverk þurfa ekki að kosta
peninga
Lionsklúbburinn Ylfa vinnur nú
við þjónustuverkefni sem felst í
því að aðstoða fólk af erlendum
uppruna við að æfa sig í íslensku.
Fyrir velvilja Amtbókasafnsins á
Akureyri hafa Ylfukonur fengið
þar aðstöðu án endurgjalds til að
taka á móti fólkinu. „Við erum
með fasta tíma einu sinni í viku frá
hausti og fram á vor, eða frá því
í september og fram í maí. Fimm
til sex Ylfur mæta í hvert sinn
og fjöldi þátttakenda er á bilinu
10–20 alla þriðjudaga. „Góðverk
þurfa nefnilega ekki alltaf að kosta
peninga, tími er líka verðmætur.
Það hefur svo sannarlega aukið
víðsýni okkar að kynnast fólki af
ýmsu þjóðerni. /MÞÞ
Fyrir velvilja Amtbókasafnsins á Akureyri hafa Ylfukonur fengið þar aðstöðu án endurgjalds til að taka á móti fólki
sem vill æfa sig í íslensku. Gerður Jónsdóttir er fyrir miðri mynd.
Lionsklúbburinn Ylfa vinnur nú við þjónustuverkefni sem felst í því að aðstoða
fólk af erlendum uppruna við að æfa sig í íslensku.