Bændablaðið - 20.09.2018, Síða 7

Bændablaðið | Fimmtudagur 20. september 2018 7
LÍF&STARF
Á þessum árstíma verða gangnavísur allsráðandi. Fyrstu vísurnar varla orðnar blekþurrar, ortar í Hvamms-
heiðar göngum þeirra Gunnarsstaðabræðra
Jóhannesar og Ragnars Sigfússona.
Jóhannes yrkir jafnan á leiðinni fram í kofa,
og þylur svo kveðskapinn um kvöldið:
Fagnandi í fínu standi
og fullur löngunar,
fór ég heiman flugríðandi
í fyrstu göngurnar.
Þá er gott að þylja ljóðin,
þá er gott að vera til,
þegar gamla gangnaslóðin
glymur öll við hófaspil.
Það er venja þeirra bræðra að ríða um hlað
í Höfða. Þar bjó lengi Aðalsteinn bóndi,
jafnan kallaður Teddi í Höfða, en látinn nú á
nýliðnu sumri. Teddi hafði þann sið að færa
þorstlátum gangnamönnum kverkavætu.
Ríðandi þar um hlað á dögunum orti Jói:
Áð hjá Tedda oft ég hef,
afar vel því kunni.
Er sem ljúfan landaþef
leggi af minningunni.
Ragnar Sigfússon bætti við þessari fallegu
vísu í Höfðahlaði:
Hverfa héðan einn og einn,
ýmsar kempur farnar.
Kemur ei oftar Aðalsteinn
út með veitingarnar.
Það er einnig að finna gangnakeim af
næstu vísu. Hana sendi veleðla vinur
Jón Benediktsson, fyrrum bóndi í
Sælingsdalstungu í Dölum vestur. Vísan
er eftir Björn Stefán Guðmundsson frá
Reynikeldu á Skarðsströnd. Björn var lipur
hagyrðingur, en er nýlátinn. Björn var lengi
kennari, bæði á Laugum og í Búðardal:
Gyllta hárið greitt í stút
gæti mörgum unað veitt.
Komin með í klofið hrút;
kind er betri en ekki neitt.
Ólína Jónasdóttir fyllir síðan þáttinn með
sínum einstaka kveðskap um gangnatímann:
Hlíðin mín er hljóð og föl,
hættur fuglasöngur.
Nóttin orðin næsta svöl,
nú eru komnar göngur.
Því er ráð að hyggja að hnakk,
hófum, gjörð og reiða,
leggja á minn brúna blakk,
beina ferð til heiða.
Hnjúkar falda hvítu um sinn,
hélan tjaldar völlinn.
Vegi kalda, vinur minn
við skulum halda á fjöllin.
Makkahár með hugljúft fjör
hrindir sárum móði,
sporafrár og æskuör
ert þú , klárinn góði.
Fram um breiðu fjöllin há
ferðir greiðir mínar.
Þessum heiðum átt þú á
æskuleiðir þínar.
Þylur skeið um skarð og fjall,
skapið heiðin létti.
Hér við breiðan hamrastall
hnakk og reiða spretti.
Hér á slóðum angan er
enn frá rjóðum stráum.
Við úr sjóðum heiðar hér
hressing góða fáum.
Frjálsri gleði fagnað skal,
fjölbreytt skeður gaman.
Hlýnar geð í hamrasal
hlegið og kveðið saman.
Eins skal gætt um auðnarsvið
eftir þætti skeða,
fjallavættir vilja frið
við skulum hætta að kveða.
Umsjón:
Árni Geirhjörtur Jónsson
kotabyggð1@gmail.com
MÆLT AF
MUNNI FRAM
Mynd / Vala Kristín Ófeigsdóttir
Reykjaréttir á Skeiðum
Mikill mannfjöldi var í réttunum og
stemningin góð. Á milli sex þúsund og fimm
hundruð og sjö þúsund fjár voru í réttunum.
Myndir / Magnús Hlynur Hreiðarsson