Bændablaðið - 13.12.2018, Page 18

Bændablaðið | Fimmtudagur 13. desember 201818
HROSS&HESTAMENNSKA
Nýju lífi hleypt í Fákasel í Ölfusi
Starfsemi er hafin á ný í
Ölfus höllinni, einni stærstu
reiðhöll landsins en í höllinni
er íslenski hesturinn kynntur
í máli og myndum, auk þess
sem veitingastaðurinn Fákasel
er í húsinu og eitt af stærstu
steinasöfnum landsins sem var
áður í Hveragerði. Ölfushöllin er
staðsett mitt á milli Hveragerðis
og Selfoss og er stærsta reiðhöllin
á Suðurlandi og með þeim stærri
á landinu. Nýir eigendur ætla að
blása lífi í höllina og starfsemina
í Fákaseli.
Íslenski hesturinn verður þó
í aðalhlutverki í höllinni því
sýningar eru haldnar þar daglega
fyrir aðallega erlenda ferðamenn.
„Það er ýmislegt í gangi hérna, við
verðum með hestasýningar í vetur og
við erum að fara að byggja þrjátíu
og tvö gestahús fyrir ferðamenn,
við erum að reyna að kveikja aftur
á staðnum,“ segir Andrés Pétur
Rúnarsson, framkvæmdastjóri
Fákasels, og bætir við að starfsemin
sé á besta stað, aðeins 25 mínútum
frá Reykjavík og á hinum fræga
Gullna hring.
Heimilismatur í hádeginu
Sindri Daði Rafnsson, eða Sindri
bakari eins og hann er alltaf kallaður,
sem var bakari á Flúðum og Íris Dröfn
Kristjánsdóttir, eiginkona hans, hafa
flutt sig frá Flúðum á Ingólfshvol
þar sem Ölfushöllin er og sjá þar um
veitingareksturinn í Fákaseli. „Við
erum með hefðbundinn íslenskan
heimilismat í hádeginu alla virka
daga sem hefur algjörlega slegið í
gegn. Þá erum við líka með veislu-
og veitingaþjónustu þar sem við
sérhæfum okkur í að taka á móti
hópum, stórum og smáum. Við erum
alsæl hér í sveitinni, umhverfið er
frábært og viðtökurnar sem við
höfum fengið við veitingastaðnum
hafa farið fram úr okkar björtustu
vonum,“ segir Sindri Daði. /MHH
Myndir / Magnús Hlynur Hreiðarsson