Bókasafnið - mar. 2020, Blaðsíða 20

20 Bókasafnið
Við erum með fjölbreytt framboð af spilum en aðaláherslan
hefur verið á barna- og fjölskylduspil og við erum með
spil sem henta börnum allt niður í tveggja ára aldur. Fólk
er orðið óhræddara að leggja fram tillögur um kaup á
borðspilum og í kjölfar borðspilamánudaga fyrir fullorðna
hafa aukist óskir um flóknari og meira krefjandi spil, óskir
sem við munum að sjálfsögðum verða við. Markmið okkar
er alltaf fyrst og fremst að að auka framboð af ókeypis
afþreyingu fyrir Akureyringa.
Það hefur heldur betur komið í ljós að hér er markhópur
fyrir borðspil en útlán á spilunum hafa aukist samhliða því
sem úrvalið hefur orðið meira og nær undantekingalaust
eru um 70% allra spila í útláni. Spilahillurnar bera þess líka
greinileg merki þegar það eru skólafrí og hátíðisdagar en
þá eru þær svo gott sem tómar. Fyrir stuttu settum við fram
lista yfir þau spil sem við eigum en það hefur orðið til þess
að fólk er farið að skrá sig á biðlista eftir spilum. Til merkis
um þennan aukna áhuga þá lánuðust 46 spil í janúar 2018
en 131 spil í janúar 2019.
Við erum sífellt að þreifa okkur áfram með nýjar og
skemmtilegar aðferðir til að lokka fólk til okkar og næst á
döfinni er svokallað morðgátukvöld (e. Murder mystery).
Þá gefst notendum færi á að heimsækja bókasafnið utan
hefðbundins opnunartíma og leysa morðgátu.
Þessir óhefðbundnu viðburðir hafa fengið frábærar viðtökur
sem hvetur okkur til að prófa okkur enn fremur áfram. Það
er ljóst að spilin eru komin til að vera en við erum hvergi
nærri hætt í tilraunastarfseminni. Hverju við tökum upp á
næst mun tíminn leiða í ljós.