Morgunblaðið - 29.08.2020, Blaðsíða 33

MINNINGAR 33Messur á morgun
MORGUNBLAÐIÐ LAUGARDAGUR 29. ÁGÚST 2020
Oft er talað um
systkinakærleika og
víst er að sérstakur
kærleikur var á milli
systkinanna frá
Sléttu. Þau létu sér annt hverju
um annað og afkomendur hvert
annars.
Elsta barn Jónu (Sigurjónu)
var Guðrún Sigríður sem við
kveðjum nú, en foreldrarnir eign-
uðust 9 börn og komust átta til
fullorðinsára. Má segja að tíunda
barnið hafi bæst við þegar Hulda
og Hákon eignuðust Ernu Sig-
rúnu sem lést 5. ágúst sl. en þau
voru um sinn til heimilis hjá fjöl-
skyldunni. Nokkru síðar tóku þau
kornung að sér heimilið er Jóna
lést fyrir aldur fram.
Börn Jónu og Guðmundar báru
svipmót foreldra sinna, voru ann-
aðhvort dökk á brún og brá eða
ljós og björt yfirlitum. Gunna fékk
í vöggugjöf gullinn húðlit, dökkt
hár, eilítið skásett augu og þótti
einstaklega fallegt barn og síðar
falleg kona. Hún var vel gefin til
munns og handa, vel menntuð að
heiman en hafði ekki mikla mögu-
leika á skólanámi sem hún bætti
úr á fullorðinsárum. Gunna var
glaðlynd, róleg og yfirveguð í fasi
og hafði einkar hlýja nærveru.
Hún var ættrækin og ræktarsöm.
Ung að árum hleypti hún heim-
draganum og í Reykjavík kynntist
hún mannsefninu Pétri Sæmund-
sen frá Blönduósi. Bjuggu þau sér
heimili í Reykjavík og átti stór-
fjölskyldan ævinlega þar griða-
stað. Þegar tækifæri gafst var
skroppið á æskuslóðir Péturs og
fjölskylda hans heimsótt en hann
var ekki síður ættrækinn en
Guðrún Sigríður
Guðmundsdóttir
Sæmundsen
✝ Guðrún fædd-ist 1. ágúst
1926. Hún lést 12.
ágúst 2020.
Útför Guðrúnar
fór fram 27. ágúst
2020.
Gunna og sagði
frænka mín stund-
um „hann Pétur
minn er svo mikill
Húnvetningur“.
En það var líka
farið vestur og þá
var hátíð í bæ hjá
skyldmennunum
þar og minnist ég
þess hve foreldrum
mínum þótti
ánægjulegt að fá
Gunnu og Pétur í heimsókn og
eiga gefandi spjall um menn og
málefni líðandi stundar.
Eftir lát Péturs hélt Gunna við
hinum góðu tengslum í Húna-
vatnssýsluna og líka bernskuslóð-
irnar fyrir vestan. Fannst henni
skipta máli að synir hennar og
fjölskyldur kynntust upprunan-
um fyrir vestan og rifjaði hún oft
upp þegar systkini hennar og fjöl-
skyldur sameinuðust í ferð að
Sléttu.
Þegar Gunna lagði leið sína
norður í land nutum við góðs af
heimsóknum hennar. Oft gleymd-
um við okkur í spjalli og meðfram
fréttum af fjölskyldum okkar var
komið víða við í þjóðfélagsumræð-
unni. Fannst okkur við geta leyst
ýmsan pólitískan vandræðagang í
það og það skiptið.
Um árabil bjuggu foreldrar
mínir hér á Torfalæk og þótti gott
að eiga stundir með Gunnu sinni.
Sérstakur þráður var alla tíð á
milli móður minnar og Gunnu
enda hún viðstödd fæðingu henn-
ar og alla tíð mikill samgangur hjá
fjölskyldum foreldranna. Á milli
heimsóknanna var síminn notað-
ur og oft erfitt að slíta samtali.
Seinni árin sótti hugur frænku
minnar æ meira til æskuáranna á
Ísafirði, foreldranna, systkinanna
og afa okkar og ömmu, Þórunnar
og Jónasar á Sléttu. Oft rifjuð upp
seigla genginna kynslóða í okkar
ranni og það þakklæti að njóta
þess auðs sem fylgir því að gefast
ekki upp þótt stundum blási í mót.
Nú er komið að kveðjustund
elskulegrar frænku minnar sem
verið hefur fyrirmynd svo margra
sem henni kynntust.
Hlýjar kveðjur frá okkur Jó-
hannesi til fjölskyldunnar, blessuð
veri minning hennar.
Elín Sigurlaug
Sigurðardóttir.
Nú er elsku Gunna dáin. Minn-
ingarnar streyma fram og mér er
efst í huga þakklæti. Ég var svo
heppin að fá að vera hjá þeim
Pétri, móðurbróður mínum, og
henni Gunnu á mínum mennta-
skólaárum. Þau tóku mér opnum
örmum og létu mér líða eins og ég
væri heima hjá mér. Þá grunaði
mig ekki hve Gunna yrði stór hluti
af lífi mínu, bæði í blíðu og stríðu.
Ég gat talað við hana um allt milli
himins og jarðar og hún kunni að
hlusta. Hún siðaði mig og sýndi
mér umhyggju og blíðu. Eftir að
menntaskólaárunum lauk var ég
alltaf velkomin á Háteigsveginn
og seinna meir á Fjölnisveg, það
notaði ég óspart, bæði vegna
læknisheimsókna okkar mæðgna
og innkaupaferða í borgina. Hún
fræddi mig og sagði mér sögur frá
því í gamla daga þegar hún var á
Blönduósi, sögur af mömmu og
pabba, Mæsu og Þormóði og síð-
ast en ekki síst tengdamóður
sinni, Þuríði Sæmundsen, sem
hún kenndi mér að virða enn bet-
ur.
Gunna var alltaf tilbúin að út-
rétta fyrir fjölskylduna norður á
Blönduósi, panta í búðina fyrir
ömmu og fyrir Mæsu þegar hún
var með Blönduskálann. Þá
hringdu þær mæðgur í hana, hún
skrifaði niður og hringdi svo í hin
ýmsu fyrirtæki og pantaði, þá var
svo dýrt að hringja til Reykjavík-
ur. Hún hélt alltaf tryggð við fjöl-
skylduna og kom norður á meðan
hún gat. Voru þá fagnaðarfundir
og ýmsar sögur rifjaðar upp.
Guðrún Sæmundsen var glæsi-
leg kona, rökföst og hafði ríka
réttlætiskennd en umfram allt svo
hlý og góð. Við Einar sendum fjöl-
skyldu hennar innilegar samúðar-
kveðjur.
Guð blessi minningu hennar.
Sigríður Hermannsdóttir.
AKUREYRARKIRKJA | Laugardagur
29. ágúst. Fermingarmessa kl. 10.30
og 13.30. Prestar eru Svavar Alfreð
Jónsson og Jón Ragnarsson. Félagar
úr Kór Akureyrarkirkju syngja. Org-
anisti er Sigrún Magna Þórsteins-
dóttir.
Sunnudagur 30. ágúst. Fermingar-
messa kl. 10.30 og 13.30. Prestar
eru Svavar Alfreð Jónsson og Jón
Ragnarsson. Félagar úr Kór Akureyr-
arkirkju syngja. Organisti er Sigrún
Magna Þórsteinsdóttir.
ÁRBÆJARKIRKJA | Fermingarguðs-
þjónustur kl. 10 og 11 árdegis. Ferm-
ingarguðsþjónustur kl. 13 og 14.
Prestar eru Þór Hauksson og Petrína
Mjöll Jóhannesdóttir. Organisti er
Krisztina Kalló Szklenár. Félagar úr
kirkjukór Árbæjarkirkju leiða almenn-
an söng.
ÁSKIRKJA | Guðsþjónusta og ferm-
ing kl. 11. Séra Sigurður Jónsson
prédikar og þjónar fyrir altari ásamt
Jóhönnu Maríu Eyjólfsdóttur, djákna
Ássafnaðar. Kór Áskirkju syngur, org-
anisti er Bjartur Logi Guðnason. 100
manns mega koma saman, en fólk er
hvatt til að virða 2ja metra fjarlægð-
armörk og hafa tiltæka grímu til að
bregða fyrir vit sér.
BESSASTAÐAKIRKJA | Ferming kl.
10.30, Margrét Gunnarsdóttir djákni
og sr. Hans Guðberg Alfreðsson. Fé-
lagar úr Álftaneskórnum leiða söng
undir stjórn Ástvaldar Traustasonar
organista.
DÓMKIRKJA Krists konungs,
Landakoti | Messa á sunnud. kl.
8.30 á pólsku, kl. 10.30 á íslensku,
kl. 13 á pólsku og kl. 18 á ensku.
Messa virka daga kl. 18, og má., mi.
og fö. er messa kl. 8. Lau. kl. 18 er
vigilmessa.
DÓMKIRKJAN | Fermingarmessa
klukkan 11. Prestur er Sveinn Val-
geirsson, Dómkórinn og Kári Þormar
er dómorganisti.
FELLA- og Hólakirkja | Sunnudag-
inn 30. ágúst er ferming kl. 11 og kl.
14. Sr. Jón Ómar Gunnarsson þjónar
og prédikar.
Kvöldguðsþjónusta kl. 20. Sr. Pétur
Ragnhildarson þjónar og prédikar. Fé-
lagar úr kór kirkjunnar ásamt Arnhildi
organista sjá um tónlistina. Með-
hjálpari er Kristín Ingólfsdóttir.
FRÍKIRKJAN Reykjavík | Ferming-
armessa 30. ágúst kl. 14. Sr. Hjörtur
Magni Jóhannsson þjónar fyrir altari.
Hljómsveitin Mantra og Sönghópurinn
við Tjörnina leiða sönginn ásamt
Gunnari Gunnarssyni.
GARÐAKIRKJA | Minningarguðs-
þjónusta kl. 11. 300 ár eru frá and-
láti Jóns Vídalíns biskups en hann
fæddist á Görðum. Af því tilefni verð-
ur minningarguðsþjónusta í Garða-
kirkju. Sr. Kjartan Jónsson þjónar fyrir
altari. Jóhann Sigurðarson leikari flyt-
ur lestra þar sem farið er yfir ævi
Jóns sem Matthildur Bjarnadóttir
æskulýðsfulltrúi Garðasóknar setti
saman. Sigurður Flosason og Gunnar
Gunnarsson flytja sálmaspuna á milli
lestra. Guðsþjónustunni er streymt á
fésbókarsíðu Vídalínskirkju.
GRENSÁSKIRKJA | Fermingarguðs-
þjónusta kl. 11. Sr. María G. Ágústs-
dóttir og Daníel Ágúst Gautason
djákni þjóna ásamt Ástu Haralds-
dóttur organista og Kirkjukór Grens-
áskirkju. Kyrrðarstund á þriðjudag kl.
12.
GUÐRÍÐARKIRKJA í Grafarholti |
Guðsþjónusta 30. ágúst kl. 11.
Prestur er Leifur Ragnar Jónsson.
Organisti er Hrönn Helgadóttir og kór
Guðríðarkirkju syngur. Fermingarbörn
næsta árs, 2021, úr Dalskóla og for-
eldrar þeirra eru boðin velkomin í
messuna.
HAFNARFJARÐARKIRKJA | Ferm-
ingarmessur kl. 11 og kl. 13. Vegna
samkomureglna geta einungis ætt-
ingjar fermingarbarnanna verið við
messurnar. Almenn messa og sunnu-
dagaskóli 6. september kl. 11.
HALLGRÍMSKIRKJA | Fermingar-
guðsþjónustur kl. 11 og kl. 13. Sr.
Sigurður Árni Þórðarson flytur hug-
vekju og þjónar fyrir altari ásamt sr.
Irmu Sjöfn Óskarsdóttur og Kristnýju
Rós Gústafsdóttur. Messuþjónar að-
stoða. Félagar úr Mótettukór Hall-
grímskirkju syngja. Organisti er Björn
Steinar Sólbergsson. Ensk messa kl.
14 í umsjá sr. Bjarna Þórs Bjarnason-
ar. Bænastundir kl. 12 miðvikudag,
fimmtudag og föstudag.
HÁTEIGSKIRKJA | Ferming kl. 11
og kl. 14. Félagar úr Kordíu, kór Há-
teigskirkju, syngja. Jón Hafsteinn
Guðmundsson leikur á trompet. Org-
anisti er Guðný Einarsdóttir. Prestur
er Helga Soffía Konráðsdóttir.
KEFLAVÍKURKIRKJA | Laugardag-
inn 29. og sunnudaginn 30. ágúst kl.
11, 12, 13 og 14 verða ungmenni
fermd við hátíðarstundir í Keflavík-
urkirkju. Kórfélagar syngja undir
stjórn Arnórs Vilbergssonar org-
anista. Sr. Fritz Már Jörgensson og
sr. Erla Guðmundsdóttir þjóna. Vegna
fjöldatakmarkana er einungis rými fyr-
ir fjölskyldur fermingarbarna í kirkju-
skipinu.
KÓPAVOGSKIRKJA | Helgistund kl.
11 í safnaðarheimilinu Borgum. Hjör-
dís Perla Rafnsdóttir guðfræðinemi
flytur hugleiðingu. Sr. Sigurður Arn-
arson leiðir stundina. Félagar úr Kór
Kópavogskirkju leiða stundina undir
stjórn Peter Maté.
LANGHOLTSKIRKJA | Ferming-
armessur kl. 11 og 13. Prestar Lang-
holtskirkju, Guðbjörg Jóhannesdóttir
og Aldís Rut Gísladóttir, þjóna. Fé-
lagar úr Kór Langholtskirkju syngja
undir stjórn Magnúsar Ragnarssonar.
LINDAKIRKJA í Kópavogi | Sunnu-
dagaskóli kl. 11. Guðsþjónusta kl.
20. Óskar Einarsson sér um tónlist-
ina ásamt söngvurum úr kór Linda-
kirkju. Sr. Guðmundur Karl Brynj-
arsson þjónar.
NESKIRKJA | Guðsþjónusta kl. 11.
Félagar úr Kór Neskirkju syngja. Org-
anisti er Steingrímur Þórhallsson.
Prestur er Skúli S. Ólafsson. Kaffi-
sopi.
SANDGERÐISKIRKJA | Kósí kvöld-
messa kl. 20. Almennur söngur við
gítarundirleik.
SELJAKIRKJA | Fermingarmessur
kl. 10.30, 12 og 13.30. Prestar kirkj-
unnar þjóna, Kór Seljakirkju leiðir
safnaðarsönginn við undirleik org-
anistans Tómasar Guðna Eggerts-
sonar.
SELTJARNARNESKIRKJA | Guðs-
þjónusta kl. 11. Sr. Bjarni Þór Bjarna-
son þjónar. Friðrik Vignir Stefánsson
er organisti. Félagar úr Kammerkór
Seltjarnarneskirkju leiða almennan
safnaðarsöng. Kaffiveitingar og sam-
félag eftir athöfn í safnaðarheimilinu.
SKÁLHOLTSDÓMKIRKJA | Messa
kl. 11, sérstaklega helguð 300. ártíð
Jóns Þorkelssonar Vídalín Skálholts-
biskups, sem andaðist í Biskups-
brekku 30. ágúst 1720. Sr. Egill Hall-
grímsson og sr. Kristján Björnsson
annast þjónustuna. Organisti er Jón
Bjarnason sem leikur orgelverk frá
tíma meistara Jóns. Um kl. 19 verður
bæn við legstein Jóns biskups í kjall-
ara Skálholtskirkju.
ÞINGVALLAKIRKJA | Helgistund kl.
15.30, helguð 300. ártíð Jóns Þor-
kelssonar Vídalín, Skálholtsbiskups,
sem andaðist í Biskupsbrekku þenn-
an dag árið 1720. Hringt verður
klukku sem meistari Jón gaf til Þing-
valla og lesið úr lagaræðunni sem
hann flutti þar. Sr. Kristján Björnsson
og sr. Elínborg Sturludóttir dóm-
kirkjuprestur annast þjónustuna sem
verður að hluta utandyra. Þennan dag
kl. 17 verður vígður nýr kross og
minnisvarði í Biskupsbrekku um bisk-
up Jón sem Páll á Húsafelli hefur
gert.
ORÐ DAGSINS:
Farísei og toll-
heimtumaður.
(Lúk. 18)
Morgunblaðið/Sigurður Ægisson
Breiðabólstaðarkirkja á Skógarströnd, Snæfellsnesi.
HJARTAVERND
Minningarkort
535 1800
www.hjarta.is
Í hvert sinn er ég
ek um Öxnadalinn
og það er ósjaldan
verður mér litið
heim að Syðri-Bægisá, því fallega
stórbýli sem Hulda frænka mín og
Steinn Snorrason maður hennar
byggðu upp svo stórmannlega að
eftirtekt hefur löngum vakið. Þar
hafa í áranna fjöld margar kýr og
myndarskapur búsins unnið til
verðlauna og framhald hefur verið
á því eftir að Helgi Bjarni sonur
þeirra og Ragnheiður tengdadótt-
ir tóku við búi. Þessi myndarbú-
skapur verður líklega stundaður
áfram því dætur Helga og Ragn-
Hulda Vordís
Aðalsteinsdóttir
✝ Hulda VordísAðalsteins-
dóttir fæddist 23.
apríl 1928. Hún lést
11. ágúst 2020.
Útför Huldu fór
fram 24. ágúst
2020.
heiðar hafa lýst op-
inberlega yfir áhuga
sínum á að taka við
búi síðar. Það er frá-
bært, enda er jörðin
einstaklega góð og
bæjarstæðið fallegt!
Hulda var einstök
kona fram á síðustu
stund. Stundaði hún
mjaltir og önnur
störf við búið fram
yfir nírætt og komst
í fjölmiðla er eitt myndarlegasta
„róbót“-fjós norðan heiða var
reist á Syðri-Bægisá og Hulda
varð elsta fjósakona landsins sem
missti vinnuna samkvæmt frétt-
um í fjölmiðlunum.
Þar að auki var hún listræn
með afbrigðum að því er varðar
hannyrðir ýmiskonar, ekki síst
listarlega málun postulíns. Það
var ekki amalegt að koma í heim-
sókn til hennar, því þó fyrirvari
væri skammur voru veitingar
ætíð bornar fram af þvílíkum
gæðum og magni að maður átti
erfitt með að standa upp frá borð-
um og hafa sig heim. Áhrif hafði
einnig hin óþreytandi frásagnar-
gleði hennar og minni á menn og
málefni alveg fram að því að hún
veiktist af því meini sem varð
henni að fjörtjóni á skömmum
tíma. Raunar komst hún heim aft-
ur af sjúkrahúsinu um tíma og
„lék við hvurn sinn fingur“ er við
hjónin og móðir mín heimsóttum
hana í fallega húsinu hennar
stuttu síðar og bar hún enn fram
veitingar og spjallaði um heima
og geima. Það var eftirminnileg
stund. Ekki verður spornað við
örlögunum, en ef þessi veikindi
hefðu ekki komið upp hefði mað-
ur ekki orðið hissa þó hún hefði
lifað vel fram yfir tírætt og notið
lífsins með afkomendum, vinum
og ættingjum og glætt áfram líf
okkar sem yngri erum.
Ég votta Katrínu dóttur henn-
ar, Helga Bjarna syni hennar,
Ragnheiði konu hans og dætrum
þeirra innilega samúð við fráfall
þessarar heiðurskonu, frænku
minnar.
Haraldur Hauksson.