Skinfaxi - 01.02.2019, Blaðsíða 14

14 SKINFAXI
Danir eiga Evrópumet í áfengisneyslu nemenda í
framhaldsskólum. Danskt sveitarstjórnarfólk hefur
í auknum mæli leitað eftir fræðslu um verkefni
UMFÍ, frístundakort og leiðir til að bæta lífsstíl
ungs fólks.

„Okkur hefur tekist ágætlega að fá ungt fólk til að bíða með að
fá sér fyrsta áfengissopann. En foreldrar í bæjarfélagi okkar eru
ekki samstíga um áfengisneyslu ungmenna. Þegar kemur að
áfengisneyslu framhaldsskólanema eigum við líklega Evrópu-
metið. Við viljum breyta því,“ segir Lone Jakobi Sørensen, for-
maður barna- og æskulýðsnefndar sveitarfélagsins Odder á
Jótlandi í Danmörku.
Lone fór fyrir hópi sveitarstjórnarfólks frá Odder sem var á
Íslandi í nokkra daga í sumar til að fræðast um góðan árangur
Íslendinga í forvarnamálum, skipulagt tómstunda- og æskulýðs-
starf og frístundakort. Auður Inga Þorsteinsdóttir, framkvæmda-
stjóri UMFÍ, tók á móti gestunum og fræddi þá um verkefni og
stefnu UMFÍ í lýðheilsumálum, Unglingalandsmót UMFÍ, Lands-
mótin og samsetningu íþróttastarfsins innan UMFÍ. Fólkið spurði
margs enda er þar á bæ verið að skoða kosti frístundakorta í
íþróttastarfi og ýmislegt fleira sem Danir telja til fyrirmyndar hér
á landi.

Foreldrar verða að ganga í takt
Lone telur stöðu forvarnamála í Danmörku ágæta á heildina
litið. Misbrestur sé hins vegar hjá einstaka sveitarfélögum, þar
á meðal í Odder. „Fíkniefnaneysla hefur ekki aukist. En þótt
okkur hafi tekist að fá ungmenni til að bíða með að fá sér fyrsta
sopann er hlutfall ungra Dana, sem drekka áfengi, enn alltof
hátt. En neyslan er líka breytileg eftir árgöngum. Í einum getur
hún verið mikil, í þeim næsta minni og eykst svo aftur hjá öðrum.
Við þetta bætist að fleiri ungmenni hafa verið greind með kvíða
og þunglyndi en áður. Af þessu höfum við áhyggjur,“ segir
Lone og bætir við að áður en hópurinn fór utan hafi hún rætt
við forvarnafulltrúa sveitarfélagsins um ástandið.
„Hann tjáði mér að mikilvægt sé að fá foreldra barna og
ungmenna í lið með okkur. Foreldrar í Odder séu ekki samstíga
í forvarnamálum og því sé meiri sveifla í neyslu ungs fólks hjá
okkur en víða annars staðar,“ segir hún.
Danir fræðast um
íslenska forvarnamódelið
Lone Jakobi (t.v.) á fundi hjá UMFÍ.