Skinfaxi - 01.02.2021, Blaðsíða 15

S K I N FA X I 15
Sterk umgjörð
Jóhanna var spurð að því hvaða lykilþættir
hafi orðið til þess að Íslandsmeistaratitillinn
vannst.
„Það eru margir samverkandi þættir sem
skapa gott lið. Auðvitað átti þjálfarateymið
stærstan þátt í að það tókst að stilla saman
strengi hjá leikmönnum liðsins þannig að
allt gekk upp. Leikmennirnir lögðu sig 100%
í verkefnið og höfðu trú á því. Einnig er sterk
umgjörð sjálfboðaliða í körfuknattleiksdeild
Þórs sem eru tilbúnir að leggja á sig ómælda
vinnu. Síðan er alltaf gott að finna sterkan
byr frá stuðningsmönnum, íbúum Ölfuss,
og landsmönnum sem fylgdust með loka-
sprettinum.“

Ég er enn brosandi
Hvernig tilfinning var það þegar Íslands-
bikarinn var afhentur?
„Tilfinningin var frábær og eiginlega
ólýsanleg. Ef ég ætti sterkara lýsingarorð
myndi ég nota það. Það kemur einhver
gleðihrollur sem manni tekst ekki að stjórna
og síðan dælist ómælt af gleðihormóninu,
endorfíni, um allan líkamann sem framkallar
bros og hlátur í langan tíma. Ég er enn bros-
andi.“
Viðurkenning fyrir gott starf
Jóhanna var spurð hvaða áhrif hún teldi það
hafa á samfélagið þegar svona titill vinnst.
„Það má segja að titillinn sé viðurkenning
til okkar allra í Ölfusinu fyrir það góða starf
sem hefur verið unnið í körfuknattleiksdeild
Þórs alveg frá upphafi. Stór hópur sjálfboða-
liða hefur ávallt starfað með deildinni og
hefur hann stækkað síðustu ár. Á stórum
stundum, þegar þarf margar hendur, finnum
við, sem erum í fyrirsvari fyrir deildina,
hvað stuðningurinn er mikill og margir eru
tilbúnir að leggja sitt af mörkum. Bæjarbúar
eiga liðið og gleðjast saman, sem skapar
frábæran bæjarbrag og hamingju, enda
eru Ölfusingar hamingjusamastir í ár.“
Margþætt áhrif
Hvaða áhrif mun þetta afrek hafa á íþrótt-
ina og yngri flokka starf félagsins?
Áhrifin eru margþætt. Í grunninn þurfum
við góða, vel menntaða þjálfara sem vinna
við að móta krakkana þannig að þeim líði
vel á æfingum og í starfinu. Einnig þarf að
vera góð samvinna við foreldra þannig að
þeir átti sig á hvað skiptir mestu máli í
íþróttastarfinu. Þeir foreldrar sem eru tilbún-
ir að taka þátt, sýna fórnfýsi og hafa áhrif á
starfið eru þeir sem verða virkustu sjálf-
boðaliðarnir. Þessi samvinna skapar áhuga-
sama iðkendur og foreldra sem vilja vinna
og gefa af sér í starfið.“

Góður liðsandi og vellíðan
Jóhanna var að lokum spurð hvort þau hafi
notað eða gætu hugsað sér að nota tæki
og tól úr „Sýnum karakter“-verkefninu í
starfi sínu.
„Við í körfuknattleiksdeild Þórs leggjum
mikla áherslu á góðan liðsanda og vellíðan
iðkenda okkar sem er í takt við verkefnið
„Sýnum karakter“. Við vinnum með ákveð-
in gildi og um leið leggjum við áherslu á
fræðslu og samvinnu þeirra sem eru í kring-
um iðkendahópinn og deildina,“ sagði
Jóhanna að lokum.
Bæjarbúar eiga liðið og gleðjast saman
– Jóhanna Margrét Hjartardóttir, formaður körfuknattleiksdeildar Þórs Þorlákshöfn
Jóhanna Margrét Hjartardóttir, formaður körfu-
knattleiksdeildar Þórs Þorlákshöfn.
Körfuknattleikslið Þórs við gosstöðvarnar í Fagradal ásamt þjálfurum og stjórnarfólki sem hefur staðið vaktina í körfuboltastarfinu.