Goðasteinn - 01.09.2022, Page 200

198
Goðasteinn 2022
an um stund en slitu samvistum og nokkrum árum síðar fluttist hún norður á
Akureyri. Á Akureyri bjó hún næstu 15 árin og starfaði m.a. í Kristnesi við að-
hlynningu og hjá KEA. Í fyllingu tímans fluttist Maggý suður til Reykjavíkur
og bjó þá í Hátúni.
Þessi smágerða kona gerði ekki miklar kröfur til lífsins. Að sögn bróður
hennar hafði hún sérlega fallega rithönd og var henni margt til lista lagt, sér í
lagi er kom að handavinnu. Alla tíð hafði hún mikinn áhuga á handavinnu og
lék allt í höndum hennar, hvort heldur var prjón, hekl eða útsaumur og eftir
hana liggja mörg falleg handverk.
Er heilsu tók að hraka fluttist Maggý á Eir og þar naut hún umönnunar ynd-
islegs starfsfólks allt til þess að sól seig til viðar og Maggý kvaddi þetta líf í
bjarma jólanna þann 21. desember 2020. Góður Guð blessi og styrki ástvini
Margrétar Sveinsdóttur um alla framtíð.
Sr. Sigríður Kristín Helgadóttir
María Jónsdóttir
f. 15.4. 1918 – d. 4.12. 2020
María Jónsdóttir fæddist 15. apríl 1918 á Blönduósi. For-
eldrar hennar voru hjónin Halldóra Margrét Guðmunds-
dóttir frá Hnífsdal og Jón Lárusson kvæðamaður frá
Holtastaðakoti í Langadal. María var þriðja barn þeirra
hjóna af sex, systkinin eru öll látin. María átti einn upp-
eldisbróður, Vigni B. Árnason.
Þegar María var tveggja ára gömul fluttist fjölskyldan að Refsteinsstöðum í
Víðidal. Þar bjó hún í 6 ár eða þar til fjölskyldan fékk jörðina Hlíð á Vatnsnesi
til ábúðar. Í Hlíð var ánægjulegt að alast upp, heimilisandinn var góður og fjöl-
skyldan samheldin. Jóna Baldvinsdóttir kaupakona og sonur hennar settu svip
sinn á heimilið, kenndi hún börnunum að saga og skera út muni og þá söng hún
með þeim í röddum. Á heimilinu var endalaust kveðið og sungið. Fjögurra
ára gömul var María farin að klippa út dýr og nýtti til þess allan þann pappír
sem hún komst yfir og með aldrinum óx með henni mikil færni í að handleika
skærin.