Goðasteinn - 01.09.2022, Síða 218

216
Goðasteinn 2022
Sigurður Bergsteinsson
f. 4.6. 1941 – d. 28.12. 2020
Útför frá Oddakirkju 9.1. 2021
Sigurður Bergsteinsson fæddist í sumarbyrjun árið 1941,
hinn 4. júní, og hann lést hinn 28. desember 2020.
Sigurður var annað barn foreldra sinna, þeirra Sess-
elju Sigurðardóttur frá Deild á Eyrarbakka og Bergsteins Ármanns Bergsteins-
sonar frá Tjörnum í Vestur-Eyjafjallahreppi. Fyrir áttu þau hana Hafþóru og
síðar bættust í hópinn þeir Sigurberg Bragi og Albert Ebenezer.
Sigurður ólst upp við leik og störf í Reykjavík, tók landspróf frá Skógaskóla
og hóf námi í Menntskólanum í Reykjavík. Hann fann sig aldrei alveg þar og
hugurinn stefndi annað og lífið tók einfaldlega aðra stefnu þegar hann og hún
Svanhildur Magnúsdóttir, sem hann kynntist í Skógum, eignuðust sitt fyrsta
barn, hana Ragnheiði Þyrí, þegar þau voru rétt 17 ára. Þau Svanhildur og Sig-
urður gengu í hjónaband og eignuðust tvö önnur börn, hann Bergstein og hana
Tínu. Barnabörnin eru 4 og barnabarnabörnin 2.
Sigurður söðlaði um og fór í Iðnskólann og lærði húsgagnasmíði og var á
samningi hjá G. Skúlasyni og Hlíðberg en smíðaverkstæðið var til húsa í hinu
sögufræga húsi Þóroddstöðum við Skógarhlíð í Reykjavík.
Sigurður átti langan og farsælan feril sem smiður, meðal verka hans er eld-
húsinnréttingin í húsi sem foreldrar hans byggðu við Sunnuveginn í Reykjavík
og enn er í notkun. Hann smíðaði þó ekki eingöngu húsgögn og innréttingar
heldur var hann liðtækur við hvaða smíðar sem var.
Þau Sigurður og Svanhildur bjuggu í Reykjavík en hugurinn leitaði austur í
Rangárþing þar sem rætur Sigurðar lágu. Þau fluttu að Kirkjubæ og unnu þar
um tíma, m.a. við hrossin sem þar voru haldin. Og þau höfðu hug á að setjast að
í sveitinni og bjuggu um tíma á Reyðarvatni. En það átti ekki eftir liggja fyrir
þeim að gerast bændur. Hjónabandið endaði með skilnaði og þau fluttu aftur til
Reykjavíkur.
Seinni kona Sigurðar var Steinþóra Fjóla Jónsdóttir og eignuðust þau hann
Steinþór. Sigurður og Steinþóra bjuggu á Eyrarbakka og um tíma bjuggu þau í
húsi afa hans og ömmu en byggðu sér svo glæsilegt hús við Túngötu þar í bæ.
Leiðir þeirra skildu og hélt Sigurður aftur til Reykjavíkur þar sem hann vann við
smíðar hjá hinum ýmsu fyrirtækjum, m.a. hjá Gunnari og Gylfa, sem m.a. byggðu
hús við Grandaveg og þar keypti hann sér íbúð og innréttaði hana alla sjálfur.