Morgunblaðið - 30.05.2002, Blaðsíða 12
FRÉTTIR
12 FIMMTUDAGUR 30. MAÍ 2002 MORGUNBLAÐIÐ
ÚTTEKTARNEFND á vegum
OECD er nú stödd hér á landi til að
kanna hvort Ísland fullnægi skyldum
sínum samkvæmt samningi um bar-
áttu gegn mútugreiðslum til erlendra
opinberra starfsmanna í alþjóðlegum
viðskiptum sem undirritaður var í
París 17. desember 1997.
Nefndin mun hitta fjölda aðila, en
auk stjórnvalda eru m.a. kallaðir á
fund nefndarinnar fulltrúar samtaka
atvinnulífsins, Verslunarráðs Ís-
lands, ASÍ, Lögmannafélags Íslands
og Blaðamannafélags Íslands ásamt
fulltrúum nokkurra fyrirtækja.
Athugun úttektarnefndarinnar
beinist í hnotskurn að aðgerðum ís-
lenskra stjórnvalda gegn spillingu.
Kannað verður m.a. hlutverk lög-
reglu, ákæruvalds og dómstóla í
meðferð mútumála og annarra
tengdra mála og þátt einstakra stofn-
ana í þessu sambandi. Einnig verða
könnuð viðhorf atvinnulífsins til spill-
ingar og aðgerðir þess til að sporna
við henni. Úttekt OECD nefndarinn-
ar er áþekk þeirri sem gerð var á
vegum GRECO, ríkjahóps Evrópu-
ráðsins, fyrir rúmu ári, sbr. skýrslu
GRECO frá 14. september sl.
Heimsókn úttektarnefndarinnar
er dagana 27.–30. maí. Niðurstöður
hennar verða birtar í skýrslu sem er
væntanleg síðar á þessu ári, segir í
frétt frá dóms- og kirkjumálaráðu-
neytinu.
OECD kannar
aðgerðir
stjórnvalda
gegn spillingu
ENGAR reglur er til hér á landi um hvernig sveit-
arfélög eigi að koma að fjárstyrkjum til framboða
fyrir sveitarstjórnarkosningar, en slíkt tíðkast víða
erlendis að sögn Steingríms J. Sigfússonar alþing-
ismanns og formanns Vinstrihreyfingarinnar –
græns framboðs.
Hann telur að setja þurfi rammalöggjöf um
hvernig fjárveitingum sveitarstjórna til framboða
er háttað fyrir kosningar til að tryggja jafnfræði
allra framboða. Sveitarstjórnir gætu svo útfært
reglur þar um hver fyrir sig.
Eðlilegt að mæla fyrir um
tiltekinn stuðning við framboð
„Í heimsóknum til framboða víða um land hef ég
rekið mig á að það er mjög mismunandi hvort og þá
hvernig sveitarstjórnir standa að því að styðja við
bakið á framboðum,“ segir Steingrímur. „Það
vantar hér á landi löggjöf um fjármál og stjórn-
málastarfsemi. Það væri eðlilegt að mæla fyrir um
tiltekinn stuðning við framboð, og þá jafnt til sveit-
arstjórna sem alþingis. Víðast hvar annars staðar
en á Íslandi hafa verið sett lög og reglur um að ein-
hver grunnstuðningur sé veittur öllum framboð-
um. Svo er stundum haft til viðbótar ákveðinn
stuðningur við stjórnmálaflokka sem hafa náð
mönnum kjörnum innan kjörtímabilsins til að
standa straum af kostnaði vegna sinnar þátttöku í
sinni sveitarstjórn eða á Alþingi.“
Steingrímur segir þörf á að ákveðið jafnræði ríki
svo að nýir aðilar hafi möguleika á að kynna sína
starfsemi. „Sum sveitarfélög hafa ákveðið að veita
fasta upphæð til allra framboða, líkt og er á Ak-
ureyri. En í öðrum tilvikum er stuðningur enginn.
Ég veit ekki til þess að Reykjavíkurborg styrki
framboð sem er mikið umhugsunarefni því ef það
er einhvers staðar ástæða til að menn fengju
stuðning til að kynna sín stefnumál þá væri það í
jafnstóru sveitarfélagi og Reykjavík þar sem er
gríðarlegur aðstöðumunur sitjandi borgarstjórn-
arflokka og nýrra framboða.“
Sveitarstjórnum í sjálfsvald sett
hvernig þau styrkja framboð
Vilhjálmur Þ. Vilhjálmsson, formaður Sam-
bands íslenskra sveitarfélaga, segir að almennt
tíðkist ekki að sveitarstjórnir styðji við framboð
með fjármunum fyrir kosningar. Hann segist þó
vita til þess að slíkt hafi verði gert hjá einstaka
sveitafélögum að undangenginni samþykkt við-
komandi bæjarstjórna. Segir hann að með því hafi
öllum framboðum verið tryggð sama upphæð. „Ef
sveitarstjórnir kjósa að veita fé til framboða þá er
þeim heimilt að gera það þó að slíkt tíðkist ekki al-
mennt. Ef það er hins vegar gert er það staðbundin
ákvörðun einstakra sveitarstjórna.“ Segir hann að
þetta sé gert í stað þess að sveitarsjóðir og stofn-
anir sveitarfélagsins séu að kaupa styrktarlínur og
auglýsingar í blöðum framboðanna.
Vilhjálmur segir að frá Reykjavíkurborg eða
stofnunum hennar komi enginn fjárstuðningur til
einstakra framboða.
„Engin umræða hefur farið fram um að breyta
sveitastjórnarlögum í þá veru að sveitasjóðir eigi
að styrkja framboð með tilteknum hætti og ég á
ekki von á að það verði gert.“
Algengast að veita ákveðna upphæð
Morgunblaðið hafði samband við nokkur sveit-
arfélög á landinu til að kanna hvort og þá með
hvaða hætti þau styrktu framboð fjárhagslega fyr-
ir sveitarstjórnarkosningar. Í ljós koma að algeng-
ast væri að sveitarfélögin úthlutuðu ákveðinni fjár-
hæð til framboða, styrktu þau framboðin á annað
borð. Halldór Halldórsson, bæjarstjóri Ísafjarðar-
bæjar, sagði að fyrir nýliðnar sveitarstjórnarkosn-
ingar hefði bærinn veitt hverju framboði 75 þús-
und kr. Á móti ætlaðist bærinn til þess að
framboðin birtu auglýsingar frá yfirkjörstjórn í
blöðum sínum, t.d. auglýsingar um það hverjir
væru í framboði.
Björn Hafþór Guðmundsson, bæjarstjóri Aust-
ur-Héraðs, sagði hins vegar að sveitarfélagið hefði
ekki styrkt framboðin í sveitarfélaginu fyrir síð-
ustu kosningar. Bæjarstjóri í Árborg, Karl Björns-
son, sagði hins vegar að sveitarfélagið hefði styrkt
hvert framboð um 200 þúsund kr. fyrir kosning-
arnar síðustu, en inni í því væri kostnaður vegna
auglýsinga sveitarfélagsins í blöðum framboðanna.
Og að síðustu sagði Gísli Gíslason, bæjarstjóri á
Akranesi, að sveitarfélagið hefði styrkt hvert
framboð um 100 þúsund kr. fyrir kosningarnar síð-
ustu. Engir skilmálar fylgdu þeim styrkjum.
Steingrímur J. Sigfússon formaður VG um fjárframlög til framboða
Þörf á lögum til að tryggja
jafnræði framboða
ANTONI Helgasyni, formanni yfir-
kjörstjórnar í Bolungarvík, hefur
borist staðfesting á því frá símafyr-
irtækjum að þeir farsímar sem voru í
talningarherbergi á meðan kjör-
fundur stóð yfir í kosningunum síð-
astliðinn laugardag voru ekki í notk-
un milli kl. 21 og 22 þann dag.
Fulltrúar K-lista í Bolungarvík
höfðu farið fram á það með form-
legum hætti við yfirkjörstjórn að það
yrði kannað hvort farsímarnir voru
notaðir á þeim tíma sem talning
hófst í bænum.
Talning hófst klukkan 21 þann
dag, en notkun farsíma var bönnuð á
meðan á kjörfundi stóð. Fulltrúar K-
lista sögðu að kvittur hefði komist á
kreik í bænum að farsímar hafi verið
notaðir í talningarherbergi á meðan
á kjörfundi stóð. K-lista þótt ástæða
til þess að málið yrði kannað.
Jafnframt hefði listinn óskað eftir
því að útskrift yrði fengin frá þessu
tímabili til að hreinsa fulltrúa
listanna tveggja, sem voru staddir í
talningarherbergi, af allri sök. Leitt
var að því getum að farsímarnir hafi
verið notaðir til þess að smala kjós-
endum á kjörstað.
Málinu lokið í sátt
í gærkvöldi
Anton Helgason, formaður yfir-
kjörstjórnar, sagðist búast við því að
málið væri úr sögunni, en halda átti
fund í yfirkjörstjórn í gærkvöldi með
þeim sem staddir voru í talningar-
herberginu á umræddu tímabili.
Fulltrúar framboðanna hittust svo
í gærkvöldi á fundi, ásamt yfirkjör-
stjórn, þar sem farið var yfir málið
og upplýsingarnar frá símafyrir-
tækjunum voru kynntar. Þeim fundi
lyktaði með sáttum og var það sam-
eiginleg niðurstaða fundarmanna að
málinu væri lokið og ekki yrði frekar
aðhafst í því.
Farsímar ekki notaðir
í talningarherberginu
GRÉTAR Hjartarson,
skipstjóri og forstjóri,
er látinn á sextugasta
og áttunda aldursári.
Grétar var fæddur 3.
ágúst 1934 í Reykjavík,
sonur hjónanna Hjartar
Hjartarsonar kaup-
manns og Ástu Lauf-
eyjar Björnsdóttur.
Grétar útskrifaðist
með héraðsskólapróf
frá Laugarvatni árið
1951 og lauk farmanna-
prófi frá Stýrimanna-
skólanum í Reykjavík
árið 1958. Hann var háseti á bátum og
togurum árin 1949–1953, háseti á
skipum Eimskipafélagsins 1954–
1960, stýrimaður frá 1961–1970 og
skipstjóri hjá Eimskipum frá 1971–
1975.
1. september 1975 var hann settur
framkvæmdastjóri Bæjarbíós í Hafn-
arfirði og síðan fram-
kvæmdastjóri Laug-
arásbíós 1. desember
sama ár. Grétar var
ráðinn forstjóri Laug-
arásbíós og Bæjarbíós
1. mars 1976 og gegndi
því starfi til 1994. Árin
1995 til 1999 var hann
kennari við stýrimanna-
skóla í Walvis Bay í
Namibíu á vegum Þró-
unarsamvinnustofnun-
ar Íslands. Árið 1999
gerðist hann starfsmað-
ur Íslandspósts.
Grétar kvæntist 5. maí 1956 Guð-
laugu Pálsdóttur og eignuðust þau
fjögur börn: Pál, Pétur, Hjört og El-
ínu Sigríði. Guðlaug lést árið 1982.
Eftirlifandi kona Grétars er Ólöf
Inga Klemensdóttir. Dætur hennar
eru Þórunn Halldórsdóttir og Hrafn-
hildur Inga Halldórsdóttir.
Andlát
GRÉTAR
HJARTARSON
Björgunarsveitamenn fundu í gær
fimm manns sem saknað var í ná-
grenni Landmannalauga. Fólkið
hafði fest jeppa sinn á sandeyri í á
skammt frá Landmannalaugum.
Ekkert amaði að fólkinu. För fólks-
ins var heitið að Gullfossi á þriðju-
dag, en ferðalangarnir munu hafa
hætt við það og tilkynntu skyldfólki
sínu símleiðis að stefnt væri á Land-
mannalaugar. Síðan heyrðist ekkert
frá fólkinu og var þá farið að óttast
um það. Leit hófst klukkan 7 í gær-
morgun og lauk kl. 11.30.
Óku eftir lokuðum
fjallvegum
Samkvæmt upplýsingum lögregl-
unnar er ljóst að fólkið hefur ekið
eftir fjallvegum sem eru lokaðir á
þessum árstíma vegna aurbleytu.
Alls tóku á annan tug liðsmanna
frá björgunarsveitum Slysavarna-
félagsins Landsbjargar þátt í leit-
inni.
Björgunar-
sveitir fundu
jeppafólk
PJETUR Stefánsson, stjórnarfor-
maður Sambands íslenskra mynd-
listarmanna (SÍM), var endurkjör-
inn á aðalfundi SÍM í Norræna
húsinu í gærkvöldi. Fundarsókn var
óvenju mikil þar sem átök voru í
kringum stjórnarkjörið.
Pjetur hlaut 111 atkvæði en Hann-
es Lárusson 69 og Áslaug Thorlacius
63. Í stjórn voru kosin Ragnhildur
Stefánsdóttir, Þorvaldur Þorsteins-
son og Einar Garibaldi. Í varastjórn
voru kosin Ósk Vilhjálmsdóttir og
Valgarður Gunnarsson. Á fundinum
sögðu sig strax úr stjórn og vara-
stjórn Einar og Ósk vegna óánægju
með niðurstöðu kosninganna. Kosin
var því ný varastjórn sem skipuð er
Pétri Erni Friðrikssyni og Ingu El-
ínu Kristinsdóttur.
Morgunblaðið/Golli
Óvenju mikið fjölmenni var á aðalfundi SÍM í gærkvöldi, enda átök um stjórnarkjör.
Pjetur Stefánsson
endurkjörinn á
átakafundi SÍM
SIGURÞÓR Jakobsson myndlistar-
maður hefur fengið fjögur innrömm-
uð málverk aftur í hendur, en þeim
var stolið hjá innrömmunarfyrirtæki
í Reykjavík í byrjun apríl.
Sigurþór var með tólf vatnslita-
myndir í innrömmun og var fjórum
þeirra stolið í skjóli nætur eins og
greint var frá í Morgunblaðinu 12.
apríl. Skömmu síðar auglýsti lista-
maðurinn eftir verkunum og segir
hann að umfjöllunin hafi borið ár-
angur. Ekki sjái á verkunum en risp-
ur séu á römmum. Aðalatriðið sé að
hann hafi fengið verkin aftur, en
hann segir að lögreglan hafi fundið
þau í húsi þegar hún vann að rann-
sókn annars máls.
Sigurþór fékk málverkin aftur