Tímarit lögfræðinga - 01.10.1991, Page 5

Hvað varðar framtíðarhlutverk félagsins að öðru leyti verður eflaust haldið
áfram á svipaðri braut og nú með fræðslufundum fyrir félagsmenn og umsögnum
um lagafrumvörp en fullyrða má að þar hafi félagið talsverð áhrif. En auk þessa
hlutverks hlýtur það einnig að vera tilgangur félagsins að vera vakandi um stöðu
dómarastéttarinnar í þjóðfélaginu og vekja athygli dómsmálayfirvalda á því sem
betur má fara.
Það liggur í hlutarins eðli að Dómarafélag íslands getur ekki og á ekki að vera
vettvangur kjarabaráttu eða launadeilna. Hins vegar hlýtur það að vera eitt af
meginmarkmiðunum að stuðla að því að félagsmenn njóti slíkra kjara að hæfir
menn fáist til að sinna dómstörfum svo þýðingarmikil sem þau eru þjóðfélaginu.
Þá er það almennt viðurkennt meðal annarra þjóða að fjárhagslegt sjálfstæði
dómara sé þáttur í sjálfstæði dómstólanna. Þetta hljóta dómsmálayfirvöld að
hafa í huga.
Að lokum læt eg í ljós þá von að Dómarafélag Islands eigi fyrir höndum
gæfuríka framtíð og megi áfram njóta trausts og virðingar.
Valtýr Sigurðsson
163