Tímarit lögfræðinga - 01.10.1991, Page 37

5.4.4 Erlend samskipti
Samskipti félagsins við erlenda starfsbræður á þessu tímabili voru fremur lítil,
a.m.k. miðað við það sem síðar átti eftir að verða. Á aðalfundi 1968 skýrði
þáverandi formaður félagsins, Hákon Guðmundsson, frá því að hann hefði sótt
ráðstefnu norskra dómara sem haldin væri þriðja hvert ár. Vék hann jafnframt
að því að skapa þyrfti íslenskum dómurum betri aðstöðu til að eiga samskipti við
erlenda stéttarbræður sína. Lítið varð þó úr því að unnið væri að þessum málum
á því tímabili sem hér um ræðir. Þó má nefna ýmis atriði.
Á aðalfundi 1968 var samþykkt að nota peningagjöf frá dómsmálaráðherra í
tilefni af 25 ára afmæli félagsins til þess að stofna sérstakan utanfarasjóð.57 í
sérstökum samþykktum sagði að tilgangur sjóðsins væri að styrkja félagsmenn
Dómarafélags íslands til að sækja dómaraþing og lögfræðingamót erlendis. í
fundargerðum er ekki að sjá að veitt hafi verið fé úr sjóðnum í þessu skyni á
næstu árum eftir stofnun hans.
Á árinu 1974 fékk félagið boð frá Evrópuráðinu í Strassborg um að senda
fulltrúa á ráðstefnu sem halda átti á vegum ráðsins. Sótti Unnsteinn Beck,
þáverandi formaður félagsins, ráðstefnuna. Stærsta verkefni félagsins á þessu
sviði á tímabilinu var dómaraferð til Noregs í júní 1977. Það mun hafa verið á
aðalfundi félagsins 1976 að skipuð var sérstök nefnd til að kanna möguleika á því
að dómarar færu í hópferð til Norðurlanda til að kynnast réttarfari og starfsemi
dómstóla. í nefndinni voru Þór Vilhjálmsson hæstaréttardómari, Hrafn Braga-
son þáverandi borgardómari og Haraldur Henrýsson þáverandi sakadómari.
Störfuðu þeir að málinu af kappi og festu fljótlega sjónir á Noregi. Var
hugmyndinni vel tekið af norskum stéttarbræðrum og dómsmálayfirvöldum.
Hinn 5. júní 1977 hélt svo 25 manna hópur íslenskra dómara til Noregs í náms- og
kynnisferð. Með í för voru auk þeirra makar nokkurra dómaranna og skrifstofu-
stjóri dómsmálaráðuneytisins.58 Var almenn ánægja með þetta framtak og töldu
menn sig hafa haft gagn og gaman af. Ferð þessi var upphafið að víðtækari
samskiptum íslenskra dómara við erlenda stéttarbræður.
5.5 Dómarafélag íslands frá 1977
Nokkur þáttaskil verða í sögu Dómarafélags íslands frá og með aðalfundi þess
árið 1977. Ef lýsa á tímabilinu á undan verður því best lýst með því að nokkur
deyfð hafi verið yfir félagsstarfinu. Það er engu líkara en að félagið eigi í nokkurs
konar tilvistarkreppu og grundvöllur undir starfsemi þess sé ótraustur. Rétt eins
og mönnum hafi gengi illa að finna því tilgang eftir því sem bein hagsmuna- og
kjarabarátta varð minni þáttur í starfi þess. Þáttaskilin sem verða, felast í
57 Útskrift aðalfundargerðar 1968, s. 6.
58 Sjá ítarlega frásögn af ferð Dómarafélags íslands til Noregs í grein eftir Ólaf St. Sigurðsson í
Tímariti lögfræðinga 1977 (27), s. 147 - 150.
195