Breiðfirðingur - 01.04.1990, Blaðsíða 171

THEÓDÓRA GUÐLAUGSDÓTTIR
169
3. gr. Inngangseyrir hverrar fjelagskonu sje kr. 3,00, en
árstillag kr. 2,00, er greiðist á aðalfundi.
4. gr. Fundir skulu haldnir fjórir á ári, en fleíri ef þörf
gerist.
5. gr. Tilgangur fjelagsins sje aðallega líknarstörf.
6. gr. Hver kona er skild að taka á móti kosningu í stjórn
fjelagsins.
Þremur árum seinna var bætt við grein í lögin um að félags-
konur skyldu þúa hver aðra og árið 1948 koma inn ákvæði
um þriggja ára kjörtímabil stjórnar og að ein kona skyldi
ganga úr stjórn við hverja kosningu. Það fyrirkomulag náði
þó aldrei til Theódóru, sem var formaður félagsins alla sína
búskapartíð á Hóli, eða fram í maí 1955.
Það sem hér verður sagt af starfsemi kvenfélagsins Guð-
rúnar Ósvífursdóttur og seinna Sambands breiðfirskra
kvenna miðast fyrst og fremst við þátt Theódóru Guðlaugs-
dóttur í starfi þessara félaga, enda fjallar þessi grein um
hana. Með þessu er á engan hátt gert lítið úr starfi allra
þeirra mætu kvenna sem með henni og í kringum hana störf-
uðu. Það liggur hins vegar í eðli persónusögu í greinarformi
að umfjöllunin hverfist um viðfangsefnið.
í samræmi við yfirlýstan tilgang sinn lagði Kvenfélagið
Guðrún Ósvífursdóttir einkum áherslu á líknarstörf og ýmsa
starfsemi í þágu Hvammskirkju. Félagið festi kaup á spuna-
vél og fóru tvær kvenfélagskonur með hana milli bæja og
spunnu lopa. Þessi spunavél er nú á Byggðasafni Dalamanna
á Laugum. Þá stóð kvenfélagið fyrir skemmtisamkomum,
ferðalögum og kvöldvökum. Slíkar samkomur voru haldnar
á bæjunum eftir hentugleikum og voru vel sóttar og þóttu
hin besta skemmtun. Sunnudaginn 24. ágúst 1930 var t.d.
haldin skemmtisamkoma í Hvammi. Þar var til skemmtunar
bögglauppboð, fyrirlestur og dans. Inngangseyrir var 1
króna fyrir fullorðna og 50 aurar fyrir börn. Kaffibollinn var
seldur á 60 aura. Fleiri slíkar samkomur voru haldnar og sáu
konurnar um hin ólíklegustu skemmtiatriði eins og keppni í