Ársrit Ræktunarfélags Norðurlands - 01.01.1970, Síða 74

notaður til hliðsjónar þeim efnagreiningum og athugunum,
sem gerðar yrðu á öðrum bæjum.
Ymislegt hefur gefið máli þessu byr undir báða vængi.
Má þar nefna, að okkur hlotnaðist 6000 dollara styrkur frá
NATO. Þótt nauðsynleg tæki til snefilefnarannsókna kosti
að líkindum enn meir en þetta, þá hefði lítið gerzt án styrks
þessa. Þá gefur það ástæðu til bjartsýni hversu vel gengur
með hið nýja húsnæði stofunnar, og síðast en ekki sízt sá
góði skilningur og fyrirgreiðsla, sem við höfum orðið aðnjót-
andi jafnt hjá ráðunautum búnaðarsambandanna og SAB-
bændunum sjálfum.
Enn er ónefnt eitt stærsta atriðið viðvíkjandi þessu verk-
efni, sem eitt sér er ærið áhyggjuefni, en það er úrvinnsla
úr þeim gögnum, sem munu safnast fyrir og verða nánast
að sjálfskaparvíti, ef ekki verður að gert. Þarf því að byggja
upplýsingasöfnunina upp með þetta fyrir augum, en það
hefur í för með sér atvinnu fyrir tölvu. Þótt við höfum
byggt upplýsingasöfnunina að mestu leyti upp með kvóta-
kerfi, þ. e. notað tölur og tákn í staðinn fyrir nöfn eða lýs-
ingar, má ekki dragast að leita aðstoðar sérfræðinga á þessu
sviði.
ÝMISLEGT VARÐANDI FRAMTÍÐINA
Við sem störfum hjá Rannsóknarstofu Norðurlands erum,
eins og allir vita, beint eða óbeint í vinnu hjá bændum
fyrst og fremst — það er okkar sameiginlega fyrirtæki. Það
verður því að líta á hinn raunverulega vinnustað okkar sem
allt félagssvæði Ræktunarfélagsins, en ekki einhverja kompu
í húsasundi eða ris í háhýsi. Það má e. t. v. deila á, að hve
miklu leyti við höfum virt þessa staðreynd í verki, en það er
þó von mín, að bændur geti með sanni litið þannig á málin
í framtíðinni, ef þeir gera það ekki í dag. Ferðalög eru nauð-
synleg og þau hafa verið farin. Fundahöld í sveitunum eru
nauðsynleg og til þeirra hefur verið efnt, en þó að mínu viti
ekki nærri nóg, enda oft erfitt um vik vegna ófærðar eða
anna og auraleysis.
77