Morgunblaðið - 12.12.2001, Page 11

FRÉTTIR
MORGUNBLAÐIÐ MIÐVIKUDAGUR 12. DESEMBER 2001 11
UMBOÐSMAÐUR Alþingis telur að
dóms- og kirkjumálaráðuneytið hafi
ekki leyst úr máli Péturs Þórs Gunn-
arssonar, fyrrverandi framkvæmda-
stjóra Gallerís Borgar, í samræmi
við lög er ráðuneytið staðfesti synjun
Fangelsismálastofnunar á umsókn
hans um reynslulausn. Beinir um-
boðsmaður þeim tilmælum til ráðu-
neytisins að það taki mál hans til
endurskoðunar komi fram ósk frá
honum og leiti leiða til að rétta hlut
hans. Pétur Þór kvaðst í samtali við
Morgunblaðið ekki hafa ákveðið
hver yrðu viðbrögð sín en sér fyndist
þetta áfellisdómur yfir kerfinu.
Pétur Þór Gunnarsson afplánaði
sex mánaða refsidóm að Kvía-
bryggju fyrir brot er talin voru varða
hegningarlög og bókhaldslög. Hóf
hann afplánun 5. apríl 2000. Hann
sótti um reynslulausn eftir að hafa
afplánað hálfan refsitímann. Fang-
elsismálastofnun synjaði honum um
reynslulausn og tilgreinir þau rök í
bréfi 5. júlí að hann eigi ólokið mál-
um í refsivörslukerfinu. Kærði Pétur
Þór synjunina til dóms- og kirkju-
málaráðuneytisins sem staðfesti
synjunina 17. ágúst 2000. Áður hafði
Pétur Þór leitað til umboðsmanns
Alþingis vegna tafa ráðuneytisins á
afgreiðslu máls hans og fóru nokkur
bréf milli hans og ráðuneytisins
varðandi málsmeðferðina.
Telur lagaheimild vanta
Í niðurstöðu umboðsmanns segir
að synjun á beiðni Péturs Þórs um
reynslulausn sé byggð á því að hann
hafi átt ólokið málum í refsivörslu-
kerfinu þegar ákvörðun Fangelsis-
málastofnunar, náðunarnefndar og
ráðuneytisins um synjun var tekin.
Segir umboðsmaður að skilyrðum 1.
málsgreinar í 5. gr. reglugerðar nr.
29 frá 1993 um fullnustu refsidóma
verði ekki beitt svo fortakslaust
nema með sérstakri lagaheimild sem
ekki sé að finna í lögum. „Vegna
þessa var beiðni Péturs Þórs ekki
tekin til umfjöllunar á grundvelli
heildarmats á aðstæðum hans með
tilliti til þeirra sjónarmiða sem
ákvæði laga um reynslulausn byggja
á,“ segir í niðurstöðu umboðsmanns.
Telur ekki
leyst úr mál-
inu í sam-
ræmi við lög
Umboðsmaður
Alþingis vegna synj-
unar á reynslulausn
INGIBJÖRG Sólrún Gísladóttir borgarstjóri segir
að það sé mjög til fyrirmyndar hjá Bláfjallanefnd að
hafa sett af stað þá stefnumótunarvinnu, sem hefði
verið kynnt í fyrra, og fengið norska sérfræðinga til
liðs við sig til að gera tillögur um uppbyggingu
skíðasvæðanna í nágrenni Reykjavíkur. Hins vegar
séu þetta aðeins tillögur og forgangsröðun sé nauð-
synleg, en ekkert sé því til fyrirstöðu að hefja fram-
kvæmdir á næsta ári.
Norðmennirnir Edgar Berentsen, arkitekt, og
Alfred Andersen, verkfræðingur, hafa endurhann-
að skíðasvæði víða um heim og á mánudag kynntu
þeir tillögur sínar um uppbyggingu skíðasvæðanna
í nágrenni Reykjavíkur.
Í fyrravetur kom út stefnumótunarskýrsla Blá-
fjallanefndar, þar sem settar voru fram hugmyndir
um stóraukna uppbyggingu á þessum skíðasvæðum
og skýrt mótuð markmið sem stefnt skyldi að á
næstu átta árum. Í kjölfarið voru norsku sérfræð-
ingarnir ráðnir til að gera faglega úttekt á svæð-
unum.
Nýjar lyftur
og öryggismál
Í tillögum Norðmannanna er m.a. lagt til að sett-
ar verði upp fimm nýjar lyftur, þ.a. ein fjögurra
sæta stólalyfta í Kóngsgili í Bláfjöllum og önnur
eins í Skálafelli, á skíðasvæðunum í nágrenni
Reykjavíkur, þ.e. í Bláfjöllum, Skálafelli og á Heng-
ilssvæðinu, og níu lyftur verði færðar til. Í Skálafelli
verði sett upp lyfta frá efri enda nýrrar stólalyftu
og upp á topp og í Bláfjöllum og Skálafelli verði
settar upp lyftur sem þjóni sérstaklega snjóbretta-
svæðunum.
Fram kemur að með endurskipulagningu lyftu-
kerfanna gjörbreytist aðstaða til skíðaiðkunar á
svæðunum, bæði fyrir keppnisfólk og þó sérstak-
lega almenning. Fjölbreytni aukist með nýjum
skíðaleiðum og með nýju skipulagi verði lyfturnar
tengdar betur saman þannig að auðvelt verði að
flytja sig til á skíðasvæðinu. Gert er ráð fyrir því að
flutningsgeta skíðalyftna í Bláfjöllum aukist um
30%, úr 8.000 í 10.500 manns á klukkustund og um
50% í Skálafelli, frá 3.000 í 6.000 manns á klukku-
stund.
Ennfremur er lagt til að byggt verði upp öflugt
gönguskíðasvæði í Bláfjöllum með nýjum og spenn-
andi gönguleiðum, keppnisvangi og skála fyrir
göngufólk.
Lögð er áhersla á að koma upp snjósöfnunargirð-
ingum til þess að nýta sem best þann snjó sem til
fellur og flýta þannig fyrir opnun skíðasvæðanna. Í
sama augnamiði verði skíðabrekkur endurmótaðar
þannig að minna snjómagn þurfi til að þekja þær.
Tillaga er um að auka og endurbæta lýsingu í
brekkunum til að auðvelda skíðaiðkun í skammdeg-
inu. Aðkoma að skíðasvæðunum verði stórbætt með
malbikun og breikkun vega og stækkun bílastæða
og í sumum tilvikum tilfærslu þeirra nær skíðaskál-
um og lyftum. Komið verði á rafrænu miðakerfi á
skíðasvæðunum þremur, sem eykur skilvirkni í af-
greiðslu og kemur til með að auka tekjur skíða-
svæðanna. Lyftumannvirki verði endurnýjuð í sam-
ræmi við úttekt Det norske Veritas, rekstrar-
fyrirkomulag skíðasvæðanna verði einfaldað og
gert skilvirkara t.d. með stofnun hlutafélags um
rekstur skíðasvæðanna þriggja og þjónustusamn-
ingur verði gerður við sveitarfélögin.
Þá segja Norðmennirnir að útbúa þurfi öryggis-
áætlanir fyrir hvert einasta skíðasvæði sem ætlað
sé fyrir alpagreinar, kaupa viðeigandi búnað og
setja hann upp, því hvert slys sé einu slysi of mikið.
50 milljónir frá
Reykjavík á ári
Ingibjörg Sólrún Gísladóttir borgarstjóri, segir
margt skynsamlegt í hugmyndunum en ekki sé þar
með sagt að allt verði gert sem lagt sé til. Forgangs-
röðun sé nauðsynleg en Bláfjallanefnd hafi 50 millj-
ónir frá Reykjavíkurborg á ári til uppbyggingar og
framkvæmda á svæðinu og hlutfallslega sambæri-
legt fé frá öðrum viðkomandi sveitarfélögum. Því sé
ekkert því til fyrirstöðu að hefja framkvæmdir á
næsta ári. Að sögn borgarstjóra þarf Bláfjallanefnd
að taka tillit til framkominna tillagna, forgangsraða
þeim og senda síðan mótaða áætlun til viðkomandi
sveitarfélaga til umfjöllunar.
Borgarstjóri um tillögur um uppbyggingu skíðasvæða í nágrenni Reykjavíkur
Forgangsröðun nauðsynleg
Morgunblaðið/Golli
Norsku sérfræðingarnir leggja til miklar
breytingar á skíðaaðstöðunni í Bláfjöllum.
AUÐUNN Atlason, sendiráðsritari
á alþjóðaskrifstofu utanríkisráðu-
neytisins, segir 45 milljóna króna
niðurskurð á framlögum til Ís-
lensku friðargæslunnar eiga óum-
flýjanlega eftir að hafa nokkur
áhrif á áætlanir næsta árs en við
afgreiðslu fjárlaga var fyrirhuguð
fjárveiting næsta árs lækkuð úr
180 milljónum króna í 135 millj-
ónir.
„Það verður í raun óbreytt
framlag til friðargæslu þar sem
það er aukning framlagsins sem er
skorin niður. Fjárveiting næsta
árs verður þar af leiðandi sú sama
og í ár,“ segir Auðunn. Þrátt fyrir
niðurskurðinn verður að sögn Auð-
uns engu að síður reynt að fram-
fylgja því markmiði ríkisstjórnar-
innar að efla þátttöku Íslendinga í
friðargæslu. „Þetta er auðvitað
rask á okkar metnaðarfyllstu áætl-
unum en við reynum að halda okk-
ar striki. Það verður farið hægar í
sakirnar en ráðgert var í upphafi
og við munum sjá til hvernig málin
þróast á næsta ári og reyna að
fjölga mönnum eftir því sem líður
á árið og ná þá takmarkinu um 20
íslenska friðargæsluliða að störf-
um erlendis í lok næsta árs,“ segir
Auðunn.
100 einstaklingar valdir
Íslensku friðargæsluna skipa
þeir starfsmenn sem starfa að frið-
argæslu á vegum utanríkisráðu-
neytisins á hverjum tíma. Utanrík-
isráðuneytið auglýsti í haust eftir
umsóknum frá einstaklingum sem
gefa vilja kost á sér til friðar-
gæslustarfa. Rúmlega 250 manns
gáfu kost á sér og um 100 ein-
staklingar hafa verið valdir á við-
bragðslista Íslensku friðargæsl-
unnar. Gert er ráð fyrir að úr
þeim hópi verði valdir einstakling-
ar til að fjölga íslenskum friðar-
gæsluliðum við störf erlendis, í 20
í árslok 2002 og 25 starfsmenn ár-
ið 2003, í samræmi við ákvörðun
ríkisstjórnar Íslands. Að því loknu
verður metið hvort byggja eigi upp
getu til að senda allt að 50 starfs-
menn til friðargæslustarfa erlend-
is.
Framlag til friðargæslu óbreytt
ÞRETTÁN voru heiðraðir í 90 ára
afmælisfagnaði Lögmannafélags
Íslands í gær. Félagið var stofnað
11. desember 1911 og á þeim
tímamótum var slegið gullmerki
félagsins sömu gerðar og merki
félagsins sem er tákn um réttlæti
og óhlutdrægni.
Ásgeir Thoroddsen, formaður
félagsins, sagði að gullmerkinu
mætti sæma félagsmenn og aðra
sem forráðamenn félagsins teldu
að hefðu unnið dyggilega að mál-
efnum félagsins og lögmanna-
stéttarinnar. Fyrsta gullmerkið
veitti hann Jóni Thors, skrif-
stofustjóra í dómsmálaráðuneyt-
inu, sem Ásgeir sagði að hefði
ásamt samstarfsmönnum setið
ófáa samráðsfundi með fulltrúum
Lögmannafélagsins. Sagði hann
störf hans vitni um yfirgripsmikla
þekkingu hans, áhuga og skilning.
Þá sæmdi hann 12 fyrrverandi
formenn félagsins gullmerkinu.
Minnti hann á að skylda fylgdi
störfum þeirra sem lögmanna að
vera í félaginu. Væri það flestum
ljúf skylda og lögmenn boðnir og
búnir til að vinna fyrir félag sitt.
Þessir lögmenn eru:
Guðmundur Ingvi Sigurðsson,
Þorsteinn Júlíusson, Helgi V.
Jónsson, Jóhann H. Níelsson, Jón
Steinar Gunnlaugsson, Sveinn
Snorrason, sem var fjarverandi,
Hákon Árnason, Gestur Jónsson,
Ragnar Aðalsteinsson, Þórunn
Guðmundsdóttir, Sigurmar K. Al-
bertsson og Jakob R. Möller.
Á afmælishátíðinni flutti Sól-
veig Pétursdóttir, dóms- og
kirkjumálaráðherra, einnig
ávarp. Kvað hún starf lögmanna
þýðingarmikið og mikilvægt að
starfsemi dómstóla væri vönduð.
Helgi I. Jónsson, formaður Dóm-
arafélags Íslands, flutti einnig
ávarp, svo og Ragnhildur Arn-
ljótsdóttir, formaður Lögfræð-
ingafélags Íslands.
Morgunblaðið/Árni Sæberg
Þrettán voru sæmdir gullmerki Lögmannafélags Íslands á 90 ára afmæli þess, en tólf þeirra voru viðstaddir.
Þrettán
sæmdir gull-
merki Lög-
mannafélags
Íslands
HERBERGJANÝTING á hót-
elum í Reykjavík og á lands-
byggðinni minnkaði umtals-
vert í nóvember í ár frá sama
tíma í fyrra. Í Reykjavík
minnkaði hún úr 70,28% í
55,74%. Á landsbyggðinni, að
Akureyri og Keflavík undan-
skildum, var nýtingin einungis
10,84%.
Úrtak hótelanna í Reykjavík
var 1.048 herbergi af rúmlega
1.500 hótelherbergjum í
Reykjavík og var meðalverð á
herbergi 5.206 krónur í stað
5.182 króna í fyrra. Segir í
fréttatilkynningu frá Samtök-
um ferðaþjónustunnar að
hækkunin sé sennilega að
mestu leyti tilkomin vegna
gengisáhrifa.
Tekið er fram að í nóvember
árið 2000 hafi herbergjanýt-
ingin í Reykjavík verið óvenju
góð vegna Norðurlandaráðs-
þings sem sýni hversu miklu
munar um hverja stóra ráð-
stefnu yfir vetrartímann.
Meðalnýting á landsbyggð-
inni í nóvmber í ár var 19,91
prósent en 24,26 prósent í
fyrra og eru þá bæði Akureyri
og Keflavík inni í myndinni. Sé
horft fram hjá þessum stöðum
er nýtingin mun verri, eða
10,84 prósent, en var 12 pró-
sent í fyrra. Segir í fréttatil-
kynninguni að um sögulegt
lágmark sé að ræða.
Erna Hauksdóttir, fram-
kvæmdastjóri Samtaka ferða-
þjónustunnar, segir að eftir 11.
september hafi orðið samdrátt-
ur í ferðaþjónustu almennt.
„Það skýrist af því að Banda-
ríkjamenn hafa verið uppistað-
an í þessu yfir veturinn og það
er gríðarlega mikil minnkun
núna í nóvembermánuði. Þetta
er mjög léleg nýting því við
áttum von á mjög góðu hausti
og fram á vetur.“
Nýting á
hótelum
dregst
saman