Morgunblaðið - 09.02.2002, Blaðsíða 16

SUÐURNES
16 LAUGARDAGUR 9. FEBRÚAR 2002 MORGUNBLAÐIÐ
LANDIÐ
FIMMTÁN leikskólastjórar og að-
stoðarleikskólastjórar úr Reykja-
nesbæ og Grindavík eru að ljúka
miklu námskeiði í Tölvuskóla Suð-
urnesja í Keflavík. Leikskólastjór-
arnir sjálfir höfðu frumkvæðið að
því að efna til námskeiðsins og
segjast hafa lært heilmikið.
Námskeiðið er 70 tímar. Farið er
yfir helstu grunnforrit, svo sem
ritvinnslu- og reikniforrit, en fyrst
og fremst farið í notkun tækninnar
við starf leikskólastjóra, sam-
kvæmt óskum sem þeir lögðu fram.
Þannig hafa leikskólastjórarnir,
sem allir eru konur, verið að læra
á forrit til að brjóta um fréttabréf,
notkun stafrænnar ljósmynda-
tækni og myndvinnslu, læra á Net-
ið og rekstur heimasíðna og að
nota forritið PowerPoint til að
setja fram upplýsingar, svo dæmi
séu tekin. Þegar blaðamaður kom
við á námskeiðinu í vikunni var
Sigurður Friðriksson, skólastjóri
Tölvuskólans, að leiðbeina nem-
endum sínum við að setja upp
fréttabréf.
Sigurður segir að ýmis tæki séu
til í leikskólunum, meðal annars
tölvur og stafrænar myndavélar,
en starfsfólkið kunni almennt ekki
að nota þessa tækni til fulls. Aðal-
tilgangur námskeiðsins sé að að-
stoða leikskólastjórana við að nýta
sér þessa tækni betur í starfi.
Tölvuskóli Suðurnesja er með
breitt úrval tölvunámskeiða, allt
frá byrjendanámskeiðum upp í sér-
hæfð námskeið, svo sem í kerf-
isfræði og netumsjón. Hann er vel
tækjum búinn, meðal annars snert-
iskjá á stórri töflu í kennslustofu
þar sem kennarinn getur fram-
kallað allar skipanir tölvunnar
með fingrunum. Auk þess rekur
fyrirtækið ljósritunarþjónustu og
teikningaprentun. Sigurður segir
nauðsynlegt að hafa breitt úrval
námskeiða til að geta verið með
tölvuskóla á þessum þrönga mark-
aði. Þannig sé nauðsynlegt að hafa
aðgang að góðum kennurum sem
aðeins séu kallaðir til nokkra tíma
í viku en vel hafi tekist til með það.
Auk almennra opinna námskeiða
heldur Tölvuskóli Suðurnesja nám-
skeið fyrir hópa af einstökum
vinnustöðum. Þannig hafa fjöl-
margir varnarliðsmenn komið
þangað á námskeið, starfsfólk
Flugleiða og fleiri slíkir hópar.
Morgunblaðið/Helgi Bjarnason
Sigurður Friðriksson leiðbeinir leikskólastjórum og aðstoðarleikskóla-
stjórum við að setja upp fréttabréf.
Læra að nýta
tæknina á leik-
skólunum
Keflavík
GERT er ráð fyrir því í tillögum að
þriggja ára fjárhagsáætlun Gerða-
hrepps að á árinu 2005 hefjist
framkvæmdir við frekari stækkun
Gerðaskóla, stækkun leikskóla og
framkvæmdir í fráveitumálum.
Þriggja ár áætlunin sem nær yf-
ir árin 2003 til 2005, var lögð fram
á fundi hreppsnefndar Gerða-
hrepps á dögunum þar sem ákveðið
var að vísa henni til síðari umræðu.
Í greinargerð Sigurðar Jónsson-
ar sveitarstjóra kom fram að gert
er ráð fyrir aukinni fjárfestingu í
Gerðaskóla. Hugmyndir séu uppi
um að gera átak í tölvumálum skól-
ans. Á næsta ári er gert ráð fyrir
að lokið verði við þeirri viðbygg-
ingu sem nú er unnið að. Kennslu-
stofur verða teknar í notkun í
haust og samkomusalur á næsta
ári. Áætlaður kostnaður á næsta
ári er 23 milljónir. Á árinu 2004 er
stefnt að undirbúningi að frekari
stækkun skólans og að fram-
kvæmdir við nýja viðbyggingu
hefjist 2005.
Fram kom hjá sveitarstjóra að
vegna biðlista á leikskólanum þurfi
að fara að huga að stækkun. Gert
er ráð fyrir að undirbúningur og
byrjunarframkvæmdir verði á
árinu 2005. Ákveðið hefur verið að
gera verulegt átak í malbikun
gatna og lagningu gangstétta og
verða 20 milljónir lagðar í það
verkefni á hverju ári.
Komið að fráveitumálum
Loks er gert ráð fyrir að fram-
kvæmdir vegna fráveitumála geti
hafist á árinu 2005. Í greinargerð
sveitarstjórans kom fram að lögð
verði áhersla á sérstöðu sveitarfé-
lagsins og viðræður teknar upp við
umhverfisráðuneytið um þann þátt
til að freista þess að draga úr
kostnaði. Ef ekki verði komist hjá
því að verja verulegum fjárhæðum
til þess að leysa málið og sveit-
arfélög fái ekki frekari frest verði
að taka sérstaklega á þessum þætti
við endurskoðun á þriggja ára
áætluninni.
„Eins og sést á framlagðri
þriggja ára áætlun ber hún vott
um trú manna á uppbyggingu í
sveitarfélaginu og að hægt verði að
veita góða þjónustu. Segja má að
áætlun þessi beri vott um fram-
fara- og framkvæmdavilja, án þess
að setja sveitarfélagið í hættu fjár-
hagslega,“ sagði sveitarstjóri þegar
hann gerði grein fyrir tillögunni.
Undirbúa frekari
stækkun Gerðaskóla
Garður
SPARISJÓÐURINN í Keflavík
undirbýr að opna afgreiðslu í Vog-
um. Vonast er til að það geti orðið
um næstu mánaðamót.
Sparisjóðurinn hefur tekið á leigu
lítið húsnæði í Vogaseli, þar sem
hreppsskrifstofurnar og Hraðbúð
ESSO eru meðal annarra til húsa.
Baldur Guðmundsson, markaðs-
stjóri Sparisjóðsins, segir ekki full-
mótað hvernig starfseminni verði
háttað. Segir hann að einn starfs-
maður verði í afgreiðslunni og hún
væntanlega opin takmarkaðan tíma
á dag, alla virka daga. Auk þess verði
þar hraðbanki.
Langt er síðan bankaþjónusta hef-
ur verið í Vogum, eða frá því Útvegs-
bankinn var þar með afgreiðslu.
Sparisjóðurinn
opnar af-
greiðslu
Vogar
HREPPSNEFND Vatnsleysu-
strandarhrepps hefur ákveðið að
hætta við 10% hækkun á gjaldskrá
íþróttamiðstöðvarinnar í Vogum sem
fyrirhuguð var í næsta mánuði.
Verkalýðs- og sjómannafélag
Keflavíkur og Verslunarmannafélag
Suðurnesja skoruðu á sveitarfélögin
á Suðurnesjum að afturkalla gjald-
skrárhækkanir og leggja með því
sitt af mörkum til að verja stöðug-
leikann. Í afgreiðslu hreppsnefndar
Vatnsleysustrandarhrepps á þessum
erindum er tekið jákvætt í málið og
ákveðið að hætta við fyrirhugaða
hækkun á gjaldskrá íþróttamið-
stöðvarinnar. Jafnframt er tekið
fram að engar gjaldskrárhækkanir
hafi orðið um áramót.
Hætt við hækkun
gjaldskrár
Vogar
UMRÆÐUHÓPUR á vegum Kefla-
víkurkirkju um málefni fjölskyld-
unnar verður öll þriðjudagskvöld í
febrúar kl. 20.30, í Kirkjulundi, og
lýkur þriðjudaginn 5. mars.
Þriðjudaginn 26. febrúar koma
hjónin Halla Jónsdóttir kennari og
Gunnar Finnbogason lektor í heim-
sókn og fjalla um fjölskyldumálefni.
Þessi umræðuhópur er hugsaður
sem framhald af námskeiði sr. Þór-
halls Heimissonar í Kirkjulundi um
jákvæð viðhorf til hjónabands og
sambúðar, segir í fréttatilkynningu
frá prestunum. Stuðst verður við ný-
útkomna bók hans: Hamingjuleitin.
Umræðuhópur í
Kirkjulundi
Keflavík
♦ ♦ ♦
♦ ♦ ♦
BÍÓHÖLLIN á Akranesi á stóraf-
mæli á þessu ári en kvikmyndahúsið
var reist af Haraldi Böðvarssyni út-
gerðarmanni árið 1942 og fagnar því
sextíu ára afmæli síðar á árinu.
Haraldur afhenti Akranesbæ hús-
ið að gjöf ári síðar og hefur rekst-
urinn verið að mestu í höndum bæj-
aryfirvalda allar götur síðan.
Rekstur kvikmyndahússins hefur þó
ekki alltaf verið dans á rósum og í
kjölfar myndbandsvæðingar lands-
manna var engin starfsemi í húsinu
um stundarsakir.
Í nóvember á síðasta ári tóku tveir
ungir Skagamenn að sér rekstur
Bíóhallarinnar og sjá þeir Árni
Gíslason og Ísólfur Haraldsson nú
um allan daglegan rekstur auk þess
sem þeir skipta með sér verkum sem
sýningarstjórar.
Þeir Árni og Ísólfur sögðu í sam-
tali við Morgunblaðið að markmiðið
væri að bjóða Akurnesingum upp á
aukna þjónustu enda væru kröfurn-
ar miklar með aukinni samkeppni við
höfuðborgarsvæðið. „Við erum í
góðu sambandi við þá aðila sem
kaupa inn bíómyndir hér á landi, en
því er ekki að leyna að Akranes er í
mikilli nálægð við Reykjavík og því
oft erfitt að fá stórmyndir hingað
skömmu eftir að þær eru frumsýnd-
ar á höfuðborgarsvæðinu.
Reynsla þeirra sem leigja okkur
myndirnar sýnir að Skagamenn hafa
oft sofið á verðinum eða hreinlega
farið til Reykjavíkur í kvikmynda-
húsin og það er oft erfitt að sannfæra
þá um að við séum að hressast hér á
Skaganum,“ sagði Ísólfur en var
samt vongóður um að með aukinni
markaðssetningu myndu Akurnes-
ingar velja það frekar að fara í bíó á
heimaslóðum, en tæplega 250 manns
rúmast í einu í salnum.
Aðspurður sagði Árni að margt
annað væri á döfinni og í raun byði
húsið upp á marga möguleika sem
þyrfti að koma betur á framfæri.
„Hér hafa verið haldnir tónleikar í
gegnum tíðina og það er ætlunin að
fjölga þeim til muna. Það komust
færri að en vildu þegar hljómsveitin
Mannakorn hélt hér tónleika í lok sl.
árs og það sama var upp á teningn-
um þegar Bubbi Morthens mætti
með hljómsveit sína Stríð og frið í
lok janúar,“ sagði Árni en Ísólfur
bætt því við að hljómburður Bíóhall-
arinnar væri einstakur.
Góð meðmæli frá Bubba
„Bubbi sagði að þetta væri besta
tónleikahúsið á landinu og það eru
góð meðmæli. Við vonumst til að
geta staðfest það á næstunni að Páll
Rósinkrans verði með tónleika hér í
byrjun mars.“ Hægt er að sýna frá
íþróttaviðburðum á sýningartjaldinu
og hafa þeir Árni og Ísólfur verið að
feta sig áfram í þeim efnum við góðar
undirtektir.
Búið er að ganga frá samningum
við leiklistarfélag Fjölbrautaskóla
Vesturlands á Akranesi þess efnis að
leikritið Grænjaxlar verði sýnt í Bíó-
höllinni og sjá þeir Árni og Ísólfur
fram á annasamt afmælisár. „Það
var verið að skipta um meira en
hálfrar aldar gamla útidyrahurð og
það er kannski táknræn breyting
fyrir okkur, enda erum við afar
ánægðir með hve mikil breyting hef-
ur orðið á aðsókninni á undanförnum
mánuðum,“ sagði Ísólfur.
Bíóhöllin vaknar
til lífsins á sex-
tugsafmælinu
Akranes
FULLTRÚAR Landsvirkjunar
kynntu á dögunum „Drög að til-
lögu að matsáætlun“ fyrir rann-
sóknaboranir á svonefndu Vestur-
svæði, fyrir sveitarstjórn,
landeigendum Reykjahlíðar og al-
menningi í Mývatnssveit.
Fyrirhuguð rannsókn felst í
borun tveggja holna á svæði sem
er um 2,5 km suðvestur frá
Kröfluvirkjun, eða á Leirhnjúks-
hrauni. Þarna hafa yfirborðsmæl-
ingar gefið til kynna að mikill
jarðhiti geti leynst undir hraun-
breiðunni frá 1724–29 þó ekki sjá-
ist mikil merki þess á yfirborði.
Finnist þarna öflugur jarðhiti
binda menn vonir við að í framtíð-
inni rísi þar ný jarðgufuvirkjun.
Heimamenn sýndu kynning-
unni mikinn áhuga þar sem aukin
umsvif og atvinnurekstur er
áhugavert fyrir bætt mannlíf á
svæðinu. Það kom fram í máli
manna að gerð vegslóða að fyr-
irhuguðu borstæði muni einnig
skapa aukna möguleika fyrir
ferðaþjónustuna á sama hátt og
Kröfluvirkjun hefur þegar gert í
ríkum mæli.
Nýtt umhverf-
ismat á Kröflu-
svæðinu
Mývatnssveit