Morgunblaðið - 13.05.2003, Side 10

FRÉTTIR
10 ÞRIÐJUDAGUR 13. MAÍ 2003 MORGUNBLAÐIÐ
LJÓST er að eitt þingsæti færist úr Norðvestur-
kjördæmi yfir til Suðvesturkjördæmis eða Kragans
svonefnda í næstu alþingiskosningum vegna at-
kvæðavægis og mun landskjörstjórn væntanlega
auglýsa slíka breytingu í Stjórnartíðindum í næstu
viku. Við það fækkar þingmönnum Norðvesturkjör-
dæmis úr tíu í níu og þingmönnum Suðvesturskjör-
dæmis fjölgar jafnframt úr ellefu í tólf.
Þorvaldur Lúðvíksson, hæstaréttarlögmaður,
formaður landskjörstjórnar, sagði í samtali við
Morgunblaðið að landskjörstjórn myndi taka
ákvörðun á föstudaginn kemur og auglýsa vænt-
anlega breytingu í Stjórnartíðindum í næstu viku
þess efnis að kjördæmakjörið þingsæti færðist frá
Norðvesturkjördæmi til Suðvesturkjördæmis.
Við þessa breytingu verða kjördæmakjörin þing-
sæti í Norðvesturkjördæmi átta talsins, auk eins
jöfnunarsætis eða samtals níu og í Suðvesturkjör-
dæmi verða kjördæmasætin tíu talsins, auk tveggja
jöfnunarsæta eða samtals tólf.
Þorvaldur sagði að þetta fyrirkomulag myndi
gilda við næstu alþingiskosningar og mannfjölda-
þróun fram að þeim myndi ekki hafa frekari breyt-
ingar í för með sér.
Meira en helmingi fleiri að baki
hverju þingsæti í Kraganum
Í 31. grein stjórnarskrárinnar segir að ef kjós-
endur á kjörskrá að baki hverju þingsæti, að með-
töldum jöfnunarsætum, séu eftir alþingiskosningar
helmingi færri í einu kjördæmi en einhverju öðru
kjördæmi skuli landskjörstjórn breyta fjölda þing-
sæta í kjördæmum í því skyni að draga úr mun-
inum. Samkvæmt kosningavef dómsmálaráðuneyt-
isins var 21.221 á kjörskrá í Norðvesturkjördæmi
eða 2.122 kjósendur að baki hverju þingsæti. Á
kjörskrá í Suðvesturkjördæmi voru hins vegar
48.857 eða 4.442 að baki hverju þingsæti.
Í kosningalögunum segir síðan í 9. gr.: „Eftir
hverjar alþingiskosningar skal landskjörstjórn
reikna út hvort kjósendur á kjörskrá að baki hverju
þingsæti, að meðtöldum jöfnunarsætum skv. 2.
mgr. 8. gr., séu helmingi færri í einu kjördæmi en
kjósendur að baki hverju þingsæti í einhverju öðru
kjördæmi, miðað við kjörskrá í nýafstöðnum kosn-
ingum, sbr. 5. mgr. 31. gr. stjórnarskrárinnar. Ef
svo er skal landskjörstjórn breyta fjölda kjördæm-
issæta í kjördæmum þannig að dregið verði úr þess-
um mun. Sú breyting má þó aldrei verða meiri en
þörf krefur hverju sinni til þess að fullnægja fyr-
irmælum þessa stjórnarskrárákvæðis.“
Of mikill munur að baki hverju þingsæti í Kraganum og Norðvesturkjördæmi
Eitt þingsæti til Kragans
fyrir næstu kosningar
GUÐMUNDUR Jónsson, kosn-
ingastjóri Frjálslynda flokksins,
segir að framkvæmd utankjörfund-
arkosningar í Suðurkjördæmi hafi
ekki verið samkvæmt lögum og vill
að dómsmálaráðuneytið fari í málið.
„Ég er mjög hamingjusamur
með árangurinn en ég er fyrst og
fremst að setja út á framkvæmd
kosninganna í Suðurkjördæmi, þar
sem ekki var farið að lögum,“ segir
Guðmundur Jónsson. Hann segir
að þegar kjósendur hafi ætlað að
skila utankjörfundaratkvæðum í
Keflavík hafi þeim verið vísað frá á
þeirri forsendu að þeir byggju í
Grindavík, Hornafirði, Vestmanna-
eyjum eða annars staðar í kjör-
dæminu og sagt að þeir yrðu að
koma utankjörfundaratkvæðum
þangað. „Það er skýlaust brot á
lögum,“ segir hann og vísar til þess
að í lögunum standi að utankjör-
fundaratkvæði megi skila í hvaða
kjördeild sem er innan kjördæm-
isins. Þetta hafi gerst víðar, m.a. á
Selfossi, en hann hafi farið þangað
og þá hafi málið verið lagfært og
eftir það hafi þar verið tekið við ut-
ankjörfundaratkvæðum alls staðar
frá í kjördæminu. „En það voru
margir sjómenn sem urðu fúlir og
hentu atkvæðum sínum,“ segir
hann um gang mála í Keflavík.
Guðmundur segir að málið snúist
ekki endilega um atkvæði sem
Frjálslyndi flokkurinn hefði fengið
heldur alla sem brotið hafi verið á.
Ljóst sé að upplýsingastreymi hafi
skort á milli dómsmálaráðuneytis-
ins og sýslumanna og yfirkjör-
stjórna og það sé það sem hann sé
að gagnrýna. „Við sendum eftirlits-
menn til Kuala Lumpur og fleiri
staða en ætli við þurfum ekki að fá
eftirlitsmenn þaðan til Íslands,“
segir hann.
Gagnrýnir einnig kjörstjórnir
Gagnrýni Guðmundar beinist
einnig að kjörstjórnum. „Út frá
hvaða sjónarmiðum dæmdu kjör-
stjórnir utankjörfundaratkvæði
ógild ef þekking þeirra á kosn-
ingalögunum er ekki meiri en
þetta?“ spyr hann og segist vilja fá
að sjá umrædd atkvæði sérstak-
lega. „Ég er fyrst og fremst að
gæta lýðræðis,“ segir hann og legg-
ur áherslu á að þetta þurfi ekki að
þýða að Frjálslyndi flokkurinn fái
fleiri atkvæði vegna þessa en aðrir
flokkar. „Þetta snýst um sann-
girni.“
Guðmundur segir að Frjálslynda
flokkinn hafi vantað 13 atkvæði á
landsvísu til að Sigurður Ingi Jóns-
son kæmist inn sem uppbótarþing-
maður í Reykjavík norður í staðinn
fyrir Árna Magnússon af B-lista.
„Ég er ekki að fara fram á end-
urtalningu,“ segir hann og að hann
vilji fá svör við spurningum sínum,
hvort atkvæði hafi verið dæmd
ógild vegna vanþekkingar eða ein-
hvers annars.
Kosningastjóri Frjálslynda flokksins um utankjörfundarkjör í Suðurkjördæmi
Telur framkvæmdina ekki
hafa verið samkvæmt lögum
TVÖ hnífstungumál í Þorláks-
höfn komu til kasta lögreglunn-
ar á Selfossi snemma á sunnu-
dagsmorgun.
Í dagbók lögreglunnar segir
að ráðist hafi verið á ungan
mann við Skálholtsbraut í Þor-
lákshöfn og hann stunginn í
hendina með hnífi en meiðsl
hans reyndust þó minniháttar.
Árásarmaðurinn fór inn í gamla
Audi bifreið sem fannst ekki
þrátt fyrir leit. Talið er að árás-
armaðurinn sé af erlendu bergi
brotinn.
Þeir sem veitt geta upplýs-
ingar um málið eru beðnir að
hafa samband við lögregluna á
Selfossi í síma 480 1010. Sama
morgun var ungur maður skor-
inn í andlitið með dúkahníf.
Hann er ekki alvarlega slasað-
ur en hann hefur lagt fram
kæru og er málið í rannsókn.
Tvö hníf-
stungumál
í Þorláks-
höfn
MIKLAR útstrikanir voru í
Norðvesturkjördæmi í nýaf-
stöðnum alþingiskosningum og
strikuðu flestir yfir nafn Sturlu
Böðvarssonar, samgönguráð-
herra.
Gísli Kjartansson, formaður
yfirkjörstjórnar í Norðvestur-
kjördæmi, segir að útstrikanir
hafi fyrst og fremst verið á D-
og B-lista.
Á D-lista hafi 449 strikað yfir
nafn Sturlu Böðvarssonar, 142
yfir nafn Einars Odds Krist-
jánssonar, 99 yfir nafn Guðjóns
Guðmundssonar og 34 yfir nafn
Einars K. Guðfinnssonar. Á
B-lista hafi 164 strikað yfir
nafn Kristins H. Gunnarssonar
og 35 yfir nafn Magnúsar Stef-
ánssonar.
Á S-lista hafi 58 strikað yfir
nafn Jóhanns Ársælssonar, 53
yfir nafn Gísla S. Einarssonar
og 49 yfir nafn Önnu Kristínar
Gunnarsdóttur. Nánast engar
útstrikanir hafi verið á öðrum
listum.
449 strikuðu
yfir nafn
Sturlu
ÖSSUR Skarphéðinsson, for-
maður Samfylkingarinnar,
ræddi á sunnudag við Halldór
Ásgrímsson, formann Fram-
sóknarflokksins, um mögu-
leikann á ríkisstjórnarsamstarfi
flokkanna að loknum kosningum.
„Það er engin launung að við
höfum heyrt hvor í öðrum,“ sagði
Össur við Morgunblaðið. „Ég hef
líka heyrt hljóðið í forystumönn-
um í öðrum flokkum. Hins vegar
eru málefni ríkisstjórna við-
kvæm og ég kýs að ræða ekki op-
inberlega hvað mönnum hefur
farið á milli.“
Össur ræddi
við Halldór
JEPPLINGUR valt eftir harð-
an árekstur við fólksbíl á gatna-
mótum Nýbýlavegar og Þver-
brekku um klukkan 14:30 í gær.
Að sögn lögreglunnar í Kópa-
vogi voru tveir fluttir á slysa-
deild en meiðsl þeirra voru tal-
in minniháttar. Olía og bensín
lak á götuna og sá Slökkvilið
höfuðborgarsvæðisins um þrif-
in.
Jepplingur-
inn valt við
árekstur
PHARMANOR og hollenska fyrir-
tækið Philips Medical Systems
(PMS) hafa gert með sér samning
þess efnis að PharmaNor verði eina
samstarfsfyrirtæki PMS á Íslandi.
Sigurður H. Sigurðarson, fram-
kvæmdastjóri heilbrigðistæknisviðs
hjá PharmaNor, segir að Pharma-
Nor sé forystufyrirtæki í innflutn-
ingi, markaðssetningu og dreifingu á
lyfjum, lækningatækjum og rann-
sóknar- og hjúkrunarvörum frá
mörgum af virtustu framleiðendum
heims. PMS hafi verið atkvæðamikið
í kaupum á fyrirtækjum og hafi m.a.
keypt ADAC Laboratories, Hewlett
Packard Medical, ATL Ultrasound
og Marconi Medical Systems.
PharmaNor hafi þjónað kaupendum
Hewlett Packard Medical tækja um
árabil, en Bræðurnir Ormsson,
Heimilistæki og síðar Eirberg hafi
átt margra ára samstarf við hin fyr-
irtækin. Í kjölfar uppkaupa hafi
PMS ákveðið að fækka umboðs-
mönnum. Stefna fyrirtækisins sé að
hafa aðeins einn samstarfsaðila á
sviði sölu og þjónustu í hverju landi
og hafi verið gert samkomulag um að
PharmaNor yrði umboðsfyrirtæki
PMS á Íslandi á öllum sviðum.
Sigurður segir að með samningn-
um fari fyrirtækið inn á nýjan mark-
að.
PharmaNor
samstarfs-
fyrirtæki
PMS hér
VEÐRIÐ hefur leikið við landsmenn að undanförnu og
flestir kunna vel að meta það. Ekki síst ungir strákar,
sem hafa gjarnan nóg fyrir stafni, en þykir gott að
staldra við og fá sér ís áður en lengra er haldið.
Morgunblaðið/Árni Torfason
Bráðnauðsynlegur ís í góða veðrinu