Morgunblaðið - 24.09.2003, Blaðsíða 35
MINNINGAR
MORGUNBLAÐIÐ MIÐVIKUDAGUR 24. SEPTEMBER 2003 35
það færa mér aftur gleði og töfra lið-
inna samverustunda. Ég mun alltaf
minnast þín með bros á vör þegar ég
skemmti og ég bið góðan Guð að ann-
ast þig. Þakka þér fyrir að gefa mér
hlutdeild í lífi þínu. Stuttar samveru-
stundir okkar urðu mér sannarlega til
blessunar. Þín verður sárt saknað.
Þinn vinur
Oliver.
Árni, þú varst skemmtilegur og
góður vinur. Ég minnist allra þeirra
góðu stunda sem ég átti með þér og
þú varst besti vinur minn. Ég sakna
þín mjög mikið. Ég mun alltaf minn-
ast þín og hugsa vel til þín. Ég mun
aldrei gleyma hversu góður vinur þú
varst og skemmtilegur. Ég sam-
hryggist fjölskyldu þinni innilega
mikið.
Þinn vinur
Guðjón Viðar.
Árni litli, bíóvinur minn, var alveg
einstakur.
Hann Árni litli heitinn kom oft til
mín í heimsókn á skrifstofuna til að
ræða skemmtilegasta áhugamál okk-
ar beggja, nefnilega kvikmyndir og
bíó.
Við ræddum um kvikmyndir, leik-
ara, leikkonur, kvikmyndafyrirtæki,
kvikmyndaframleiðslu og já 70 mín-
útur enda Árni litli aðdáandi #1 og
Sveppi í miklu uppáhaldi hjá honum.
Hann ætlaði svo sannarlega að fylgj-
ast með Birgittu Haukdal þegar hún
var gestastjórnandi þáttarins eitt
kvöldið. Já, Árni litli vinur minn og ég
áttum margar og skemmtilegar bíó-
stundir saman. Hann var líka frábær
eftirherma rétt eins og pabbinn hann
Alfreð en þeir feðgar náðu mörgum
leikurum mjög vel, ég tala nú ekki um
kæki og annað sem fylgdu ákveðnum
leikurum. Þeir feðgar voru hreinir
meistarar í þessu.
Ég man líka að Árni litli gat engan
veginn sætt sig við það að Vin Diesel
væri með skegg í myndinni „A Man
Apart“ og hann var alls ekki sáttur
við það að Vin Diesel væri ekki með í
framhaldsmyndinni „2 Fast 2 Fur-
ious“.
Snemma beygist krókurinn eins og
sagt er. Hann Árni litli hafði svo sann-
arlega ákveðnar skoðanir þegar um-
ræðan snerist um kvikmyndir.
Árni litli vinur minn var líka með öll
kvikmyndafyrirtækin í Hollywood á
hreinu, þ.e. þegar maður spurði hann
um hvaðan þessi mynd eða önnur
kæmi, þá gat hann auðveldlega svar-
að þeim spurningum, hvort sem það
var Universal Pictures, Disney,
Warner Bros, Fox, Paramount Pict-
ures, Columbia Pictures eða Dream-
Works Pictures. Já, bíó og kvikmynd-
ir voru hans líf og yndi.
Ég sá alveg fyrir mér að hann Árni
litli vinur minn yrði næsti Kvik-
myndasérfræðingur Íslands.
Árni litli vinur minn var svo sann-
arlega með bíómyndirnar á hreinu
enda fjölskyldan sannkölluð stórbíó-
myndafjölskylda.
Ég fékk áfall og felldi mörg tárin
þegar mér bárust þær fréttir að Árni
litli vinur minn væri látinn. Mikil
hryggð og sorg greip mig enda hafði
hann sótt að mér deginum áður (á
sunnudeginum). Það getur enginn
ímyndað sér hvernig það er að missa
barnið sitt. Það mun taka sinn tíma að
vinna úr sorginni. Ég votta fjölskyldu
Árna litla alla mína dýpstu samúð.
Að lokum langar mig til að færa
Árna litla vini mínum lokakveðju
mína: Kæri litli vinur, það eru til
margar sígildar og ódauðlegar kvik-
myndir, en þú slærð þeim öllum við.
Ég dáðist að baráttu þinni og þreki
þessa síðustu mánuði. Ég mun alltaf
minnast þín enda góðar minningar
um þig sem ég geymi og varðveiti að
eilífu. Góða nótt, Árni litli vinur minn,
sofðu rótt og guð geymi þig og blessi.
Þinn bíóvinur,
Christof Wehmeier.
Hann Árni var mjög góður vinur
minn og mér þótti afskaplega vænt
um hann.
Við kynntumst á spítalanum þegar
við lágum þar saman. Fyrst fórum við
í heimsókn á stofurnar hvor hjá öðr-
um og eftir það vorum við eiginlega
alltaf saman. Svo fór hann að bjóða
mér heim til sín og fleira, og þegar ég
lagðist inn á spítala aftur kom hann
og heimsótti mig og ég gerði það
sama þegar hann lagðist inn á spít-
alann. Ég bara trúi því ekki að hann
sé horfinn og á svo erfitt með að sætta
mig við það, því mér þótti svo vænt
um hann. En ég vona að guð taki vel á
móti honum á himnum. Kæru Alfreð,
Magnea, Guðný og fjölskylda: Ég bið
guð að veita ykkur styrk í sorginni og
blessa ykkur öll.
Hrafnkell Fjölnisson.
Þeir deyja ungir sem guðirnir
elska.
Við munum öll eftir litla stráknum
sem kom hérna upp í bíó og var með
það á kristaltæru hvernig allt gengi
fyrir sig. Frá því að hann var bara lít-
ill strákur hefur hann verið fastagest-
ur. Markmið hans var alltaf að vinna
hjá fyrirtækinu. Fyrst lét hann sér
nægja að vera í sjoppunni og fá bún-
ing eins og við. En undanfarin ár hafa
markmið hans orðið háleitari, hann
ætlaði að verða alveg eins og pabbi,
hann var meira að segja búinn að
finna sér skrifstofu. Það er svo ótrú-
legt að hann skuli ekki eiga eftir að
koma hingað aftur að segja okkur
brandara eða spyrja okkur spurninga
um allt milli himins og jarðar. Við
munum sakna heimsókna hans.
Þar sem englarnir syngja sefur þú,
sefur í djúpinu væra.
Við hin sem lifum, lifum í trú,
að ljósið bjarta skæra
veki þig með sól að morgni,
veki þig með sól að morgni.
Faðir minn láttu lífsins sól
lýsa upp sorgmætt hjarta.
Hjá þér ég finn frið og skjól.
Láttu svo ljósið þitt bjarta
vekja hann með sól að morgni,
vekja hann með sól að morgni.
Farðu í friði vinur minn kær.
Faðirinn mun þig geyma.
Um aldur og ævi þú verður mér nær.
Aldrei ég skal þér gleyma.
Svo vöknum við með sól að morgni.
Svo vöknum við með sól að morgni.
(Bubbi Morthens.)
Elsku Alfreð, Magnea, Guðný og
aðstandendur, við biðjum góðan Guð
að styrkja ykkur á þessum erfiðu tím-
um. Sofðu rótt, elsku Árni.
Starfsfólk sjoppunnar,
Sambíóunum Álfabakka.
Það fá engin orð því lýst hvernig
okkur leið þegar við fengum þær
hræðilegu fréttir að Árni litli væri dá-
inn. Þegar við heyrðum af veikindum
hans hvarflaði það aldrei að okkur að
svona myndi fara. Síðustu daga hefur
varla liðið sú stund þar sem við hugs-
um ekki til hans og fjölskyldunnar.
Þetta eru erfiðar tilfinningar en svo
koma inn á milli minningar um þenn-
an yndislega dreng sem gaf svo mikið
af sér. Ég gleymi aldrei svipnum á
strák þegar hann mætti í vinnuna
með pabba, uppáklæddur, í hvítri
skyrtu, svörtum buxum með þver-
slaufu og það sem skipti öllu máli
lyklakippu með keðju. Hann var stolt-
ur þann daginn og greinilegt hvert
hugur hans stefndi. Heimsóknirnar í
Stuðlabergið voru alltaf skemmtileg-
ar. Þá þurfti alltaf að koma og skoða
dótið og grípa í Playstation. Uppi í
sumarbústað var líka gaman að vera.
Þá var farið í indíánaleik og úlfar
veiddir. En vænt þótti mér um þegar
hann og Aron frændi bönkuðu upp á
hjá okkur einn laugardaginn. Það var
langt síðan við höfðum sést og ákváðu
þeir frændur því að kíkja á vin sinn og
auðvitað var gripið í tölvuspil.
Elsku Alfreð, Magna og Guðný,
það er erfitt að vita hvernig ykkur líð-
ur og geta ekkert gert til að bæta líð-
an ykkar. Við erum með ykkur í hug-
anum og finnum gríðarlega til með
ykkur. Elsku Árni, Guðný, Björn, El-
ísabet, Beta, Snorri, Hrefna, Hrönn,
makar og börn, þið eruð sterk og
samheldin fjölskylda og með ást ykk-
ar og umhyggju komist þið í gegnum
þetta. Í huga okkar geymum við
mynd af yndislegum, fallegum dreng
með grallarabros og smitandi hlátur.
Kæru vinir, guð geymi ykkur og leiði
ykkur til gleðinnar á ný.
Björn, Berglind
og Birgitta.
Kynni okkar Alfreðs Ásbergs eru
orðin löng og góð og hafa vaxið í vin-
áttu, sem mér er mjög kær.
Vinir deila með sér gleði og mót-
læti. Mér er sú minning mjög í huga,
er Alfreð Ásberg sagði mér, að fædd-
ur væri sonur. Þá ríkti gleði og björt
von í huga foreldra og ástvina þessa
fallega drengs. Honum var gefið
nafnið Árni Ásberg. Ég hef notið
þeirrar ánægju að fá að fylgjast með
vexti hans og þroska og síðar fékk ég
að kynnast honum sjálfum og eiga
með honum og föður hans margar
skemmtilegar stundir.
Árni Ásberg var afar fallegur
drengur, með bjartan svip og gleði-
glampa í augum. Ég sagði honum
stundum sögur frá kynnum mínum af
pabba hans og þá ljómaði hann af
áhuga og vildi ávallt fá meira að
heyra.
Síðast er ég sá hann sat ég við hlið
hans og föður hans á kvikmyndasýn-
ingu. Um miðbik sýningarinnar hall-
aði ég mér að honum og spurði:
„Jæja, finnst þér ekki þessi leikari
vera sterkur?“ Hinn ungi vinur minn
svaraði: „Ég verð sko miklu sterkari,
þegar ég verð stór.“ Það voru líka
vonir okkar allra, að hann yrði stór og
sterkur. Sú von rættist ekki. Lífsljós
hans slokknaði og okkur varð öllum
dimmt fyrir augum. Ég finn sárt til
með vini mínum og hugsa til foreldr-
anna, systur hans og annarra ástvina
með djúpri samúð. Við fráfall þessa
unga lífsglaða drengs leitar spurning-
in sterkt á mig: Hvers vegna voru
honum þessi örlög búin? Hvað veldur
því að svo skammt er milli gleði og
sorgar? Þessi reynsla verður flestum
erfið og svarið vandfundið. Oft er
sunginn sálmur, sem geymir þessi
orð:
Ég spurði fyrr, hvað hjálpar heilög trú
og hennar ljós.
Mér sýndist bjart, en birtan þvarr og nú
er burt mitt hrós.
Skáldið góða séra Matthías Joch-
umsson svarar þessu í næsta versi og
kveður:
Þú ljós, sem ávallt lýsa vildir mér, þú logar
enn,
gegnum bárur, brim og voðasker.
Nú birtir senn.
Ég hugsa til þín, kæri vinur, og
ykkar ástvina allra með þeirri ein-
lægu von, að nú birti senn við ljómann
frá bjartri minningu fallega drengs-
ins ykkar og við það ljós, sem ávallt
vill lýsa okkur gegnum dimman dal
sorgar og saknaðar. Það ljós er Jesús
Kristur, sem nú hefur búið syninum
unga stað um eilífð hjá sér.
Gunnar Ólafsson.
Kveðja frá Setbergsskóla
Fyrir þér lá fögur
framtíð starfs og dáða.
Lífi alls og allra
æðri kraftar ráða.
Er engill banableikur
brjóst þitt nakið signdi,
var sem heiður himinn
heitum tárum rigndi.
(Davíð Stef.)
Ungur, glaðvær og hress drengur
sem á allt lífið framundan er fallinn
frá. Vegir Guðs eru sannarlega
órannsakanlegir. Við í Setbergsskóla
munum minnast Árna fyrir glaðværð
og það hversu góður félagi hann var.
Hann hafði þau áhrif að þeir sem í
kringum hann voru urðu ánægðari og
brostu, hann var sólargeisli í um-
hverfi sínu. Árni hefur verið hér í
skólanum síðan í fjórða bekk en síð-
asta vetur veiktist hann af þeim sjald-
gæfa sjúkdómi sem nú hefur tekið
hann frá okkur.
Við í Setbergsskóla sendum for-
eldrum, systur og öðrum ættingjum
okkar innilegustu samúðarkveðjur.
Okkur langar að minnast Árna Ás-
berg Alfreðssonar sem kom í bekkinn
til okkar haustið 2000. Þá þegar
þekkti hann allmarga í bekknum og
féll strax vel inn í hópinn. Hann var
góður vinur, alltaf hress og kátur,
brosið og hláturinn voru aldrei langt
undan.
Afmælin hans eru okkur minnis-
stæð. Þá var öllum bekknum boðið í
bíó, á frumsýningu nýrrar myndar og
það fannst krökkunum spennandi.
Árni vissi mjög mikið um kvikmyndir
og var þar fremstur í flokki þegar um
þær var rætt.
Það var svo um síðustu páska að
Árni veiktist og varð að vera frá
skóla. Hann kom í stutta heimsókn til
okkar í bekkinn í haust og það var
gaman að hitta hann aftur. Við eigum
öll góðar minningar um góðan dreng
og sendum foreldrum hans, systur og
öðrum aðstandendum innilegustu
samúðarkveðjur okkar.
Drýpur sorg á dáins vinar rann,
Drottinn, huggaðu alla er syrgja hann,
börnin ung sem brennheit fella tár,
besti faðir, græddu þeirra sár.
Þú ert einn sem leggur líkn með þraut
á lífsins örðugustu þyrnibraut.
(Guðrún Jóhannsdóttir.)
Margrét Böðvars,
Ingibjörg, Elfa Dís
og nemendur í 7. MB
Setbergsskóla.
Þú varst forvitinn og eðlilegur.
Hvað ertu að gera? Hvers vegna?
Hvernig? Fékkst að koma í vinnuna
með pabba eftir að hann hafði sótt þig
á leikskólann.
Stóðst við borðið mitt með tómat-
kinnar og sand í munnvikinu og vildir
vita hvað ég væri að gera. Efnilegur
pabbastrákur. Og stutt í glensið. Sett-
ir upp svipinn þar sem augun skelli-
hlógu. „Raggi rúsína,“ … og svo var
hlaupið út af skrifstofunni og fram á
gang. Og ég á eftir. Hvell hláturinn að
kafna í fyndninni yfir prakkarastrik-
inu bergmálaði um ganginn svo gestir
hússins héldu að þeir væru á þrjúsýn-
ingu.
Þú hafðir það sem til þarf.
Ég veit að hæfileikar þínir hafa
hjálpað þér við að takast á við veik-
indin af æðruleysi. Og okkur hinum
styrk til þess að leyfa minningunni að
lifa.
Elsku Alfreð, Magnea, Guðný og
öll ykkar samheldna fjölskylda. Hug-
ur okkar er með ykkur.
Ragnar Óskarsson og fjölskylda.
Ástkær eiginkona mín, móðir okkar, tengda-
móðir, amma og langamma,
MÁLFRÍÐUR ÓLÍNA ÞORSTEINSDÓTTIR,
Framnesvegi 17,
Keflavík,
sem lést miðvikudaginn 17. september sl.,
verður jarðsungin frá Fossvogskirkju föstu-
daginn 26. september kl. 13.30.
Matthías Baldur Einarsson,
Þorsteinn Arnberg,
Helga Arnberg Matthíasdóttir, Erlendur Yngvason,
Guðbjörg Arnberg Matthíasdóttir, Kjartan Gunnarsson,
Matthías Arnberg Matthíasson, Sigríður Jóhannesdóttir,
Jóhanna Arnberg Matthíasdóttir, Benedikt Gunnarsson,
barnabörn og barnabarnabörn.
Okkar innilegustu þakkir sendum við öllum
þeim, er sýndu okkur samúð, hlýhug og vin-
áttu við andlát og útför elskulegrar eiginkonu
minnar, móður okkar, tengdamóður, ömmu og
langömmu,
ELÍSABETAR MAACK THORSTEINSSON,
Smáraflöt 22,
Garðabæ.
Ragnar Thorsteinsson,
Geir Thorsteinsson, Helga S. Helgadóttir,
Pétur Thorsteinsson, A. Anna Stefánsdóttir,
Hallgrímur Thorsteinsson, Ragnheiður Óskarsdóttir,
Sigríður Thorsteinsson, Þórhallur Andrésson,
Ragnheiður Thorsteinsson, Einar Rafnsson,
barnabörn og barnabarnabörn.
Hjartans þakkir til allra þeirra, sem auðsýndu
okkur innilega samúð, vinarhug og stuðning
við andlát og útför elskulegs eiginmanns,
föður okkar, tengdaföður, afa, sonar og
bróður,
VILHJÁLMS KETILSSONAR
skólastjóra,
Háholti 19,
Keflavík.
Guð blessi ykkur öll.
Sigrún Birna Ólafsdóttir,
Garðar Ketill Vilhjálmsson, Kristín Jóna Hilmarsdóttir,
Margeir Vilhjálmsson, Herborg Arnarsdóttir,
Svanur Vilhjálmsson, Kellyanne Boyce,
Vala Rún Vilhjálmsdóttir, Jón Ingi Jónsson
og barnabörn,
Ketill Vilhjálmsson,
Magnús Ketilsson, Auður Tryggvadóttir,
Sigurgísli Stefán Ketilsson, Halldóra Jóhannesdóttir,
Páll Hilmar Ketilsson, Ásdís Björk Pálmadóttir,
Valur Ketilsson, Hjördís Hilmarsdóttir.
Afmælis- og minningargreinum má skila í tölvupósti (netfangið er minning@mbl.is, svar er
sent sjálfkrafa um leið og grein hefur borist) eða á disklingi. Ef greinin er á disklingi þarf út-
prentun að fylgja. Nauðsynlegt er að tilgreina símanúmer höfundar og/eða sendanda (vinnu-
síma og heimasíma). Þar sem pláss er takmarkað getur þurft að fresta birtingu greina, enda
þótt þær berist innan hins tiltekna frests. Nánari upplýsingar eru á mbl.is. Um hvern látinn
einstakling birtist formáli og ein aðalgrein af hæfilegri lengd á útfarardegi, en aðrar greinar
skulu ekki vera lengri en 300 orð, u.þ.b. 1.500 slög (með bilum) eða um 50 línur í blaðinu (17
dálksentimetrar). Tilvitnanir í sálma eða ljóð takmarkast við eitt til þrjú erindi. Einnig er
hægt að senda örstutta kveðju, HINSTU KVEÐJU, 5–15 línur, og votta virðingu án þess að
það sé gert með langri grein. Greinarhöfundar eru beðnir að hafa skírnarnöfn sín en ekki
stuttnefni undir greinunum.